Isaiah 43

Chinese TTVR (現代台語譯本羅馬字版)

← Chapter 42 Jump to: Chapter 44 →

1Ngá-kok ah, chhòng-chō lí ê Siōng Chú án-ni kóng; Í-sek-lia̍t ah, lia̍p-chō lí--ê Hit-ūi án-ni soan-pò͘: M̄-bián kiaⁿ, in-ūi góa í-keng ū kiù-sio̍k lí; góa ū kiò lí ê miâ ho͘-tiàu lí, lí sio̍k góa.

2Lí keng-kè tōa-chúi ê sî, góa beh kap lí tông-chāi; lí kè tōa-hô ê sî, chúi bōe kā lí im-bia̍t. Lí tùi hé tiong keng-kè, it-tēng bōe siong--tio̍h; hé-iām mā bōe kā lí thun-bia̍t.

3In-ūi góa sī Siōng Chú — lí ê Siōng-tè; góa sī Í-sek-lia̍t sîn-sèng ê Siōng-tè — lí ê Kiù-chú. Góa ēng Ai-ki̍p chòe tāi-kè kā lí sio̍k-hôe, ēng I-soh-phit-a kap Se-pa chòe lí ê thòe-sin.

4In-ūi lí tī góa gán-tiong chin pó-kùi, góa khòaⁿ-tāng lí, chin thiàⁿ lí; só͘-í góa ēng pa̍t-lâng lâi tāi-thòe lí, ēng bān-kok lâi kau-ōaⁿ lí ê sìⁿ-miā.

5M̄-bián kiaⁿ, góa kap lí tông-chāi; góa beh tùi tang-hng chhōa lí ê hō͘-tāi, tùi se-hng chū-chi̍p lí ê kiáⁿ-sun tò-tńg--lâi.

6Góa beh tùi pak-hng kóng: Pàng in khì! Kā lâm-hng kóng: M̄-thang khàu-liû in! Hō͘ góa ê kiáⁿ-jî tùi chin hn̄g ê só͘-chāi, góa ê jî-lú tùi thiⁿ-piⁿ-hái-kak tò-tńg--lâi.

7Só͘-ū kui góa ê miâ, sio̍k góa ê lâng, chiū-sī góa só͘ chhòng-chō sok-chō, ūi-tio̍h góa ê êng-kng chō ê lâng, lóng ōe tò-tńg--lâi.

8Siōng-tè kóng: Ū ba̍k-chiu m̄-kú bōe-tàng khòaⁿ--ê, ū hī-khang bōe-tàng thiaⁿ--ê, lóng kā in chhōa--chhut-lâi.

9Tio̍h tiàu-chi̍p bān-kok chū-chi̍p chòe-hé, só͘-ū ê jîn-bîn lóng chū-chi̍p chòe-tui. Só͘ hoat-seng ê sū, tó chi̍t ê sîn-bêng bat seng soan-kò? Kè-khì ê tāi-chì, tó chi̍t ê bat ūi lán ū-chhek? Tio̍h hō͘ in thê-chhut chèng-jîn chèng-si̍t in kóng--ê sī tio̍h, hō͘ jîn-bîn thiaⁿ--tio̍h ōe kóng: Che sī sū-si̍t.

10Siōng Chú kóng: Í-sek-lia̍t ah, lín sī góa ê kiàn-chèng-jîn; góa ū kéng-soán lín chòe góa ê po̍k-jîn. Góa beh hō͘ lín bat góa, hō͘ lín sìn góa, thang liáu-kái góa sī Siōng-tè. Tī góa í-chêng m̄-bat ū Siōng-tè, tī góa í-āu mā bōe ū.

11Chí-ū góa sī Siōng Chú; góa í-gōa bô pa̍t-ê Chín-kiù-chiá.

12Góa bat soan-kò, bat chín-kiù, bat kóng-bêng; sī góa, m̄-sī lín tiong-kan ê pa̍t-ê sîn-bêng. Lín sī góa ê kiàn-chèng-jîn. Siōng Chú án-ni soan-pò͘.

13Góa sī Siōng-tè, tùi khí-thâu góa chiū-sī Siōng-tè; bô lâng ōe-tàng thoat-lī góa chiáng-ak ê koân. Góa ê chok-ûi, siáⁿ-lâng ōe-tàng kái-piàn?

14Í-sek-lia̍t sîn-sèng ê Siōng-tè, Siōng Chú — lín ê Kiù-sio̍k-chú án-ni kóng: In-ūi lín ê iân-kò͘, góa í-keng chhe lâng khì Pa-pí-lûn; góa beh kòng-chhùi in só͘-ū siâⁿ-mn̂g ê mn̂g-chhòaⁿ, beh hō͘ Ka-le̍k-tí -lâng ê hoan-ho͘ pìⁿ-chòe ai-ko.

15Góa sī Siōng Chú — lín sîn-sèng ê Siōng-tè; góa sī Í-sek-lia̍t ê Chhòng-chō-chú — lín ê Kun-ông.

16Kó͘-chá, Siōng Chú tī hái-tiong chō chi̍t tiâu lō͘, tī tōa-chúi tiong khui chi̍t tiâu tōa-lō͘.

17I châu-bia̍t chiàn-chhia, bé, kun-tūi, ióng-sū, hō͘ in lóng phak--lo̍h-khì, bōe-tàng koh khí--lâi. In siū siau-bia̍t, chhin-chhiūⁿ teng-hé choân-pō͘ hoa--khì.

18Siōng Chú án-ni kóng: M̄-thang chí-ū ōe-kì-tit kè-khì ê sū-kiāⁿ; m̄-thang it-ti̍t siàu-liām kó͘-chá ê tāi-chì.

19Góa teh-beh chòe chi̍t hāng sin ê sū, chit-chūn í-keng teh hoat-seng, lín kiám m̄ chai? Góa beh tī khòng-iá khui tō-lō͘, tī soa-bô͘ khui kang-hô.

20Iá-siù lóng ōe chun-tiōng góa; liân chhâi-lông kap tô-chiáu to chun-kèng góa. In-ūi góa hō͘ khòng-iá ū chúi, tī ta-sò ê soa-bô͘ ū hô, hō͘ góa ê soán-bîn thang lim.

21Chit-ê chú-bîn sī góa chhin-chhiú chō--ê; in ōe chheng-chàn soan-iông góa!

22Siōng Chú kóng: Ngá-kok ah, lí bô kiû-kiò góa; Í-sek-lia̍t ah, lí tian-tò it-ti̍t thó-ià góa.

23Lí pèng bô chiong lí ê iûⁿ chòe sio-hòa-chè hiàn hō͘ góa, mā bô hiàn chè-mi̍h tùi góa piáu kèng-ì. Góa m̄-bat iau-kiû lí hiàn sò͘-chè hō͘ lí chhau-lô, mā m̄-bat iau-kiû lí hiàn jú-hiuⁿ hō͘ lí chhau-hoân.

24Lí m̄-bat ēng chîⁿ bóe phang-liāu hō͘ góa, mā m̄-bat ēng chi̍t chiah pûi-nńg ê cheng-siⁿ hō͘ góa pá-chiok. Lí tian-tò in-ūi lí ê chōe-ok hō͘ góa chhau-hoân, in-ūi lí hoān ê chōe-kò hō͘ góa thó-ià.

25Chí-ū góa sī Siōng-tè, góa chiong lí ê chōe-kò chhat-siau; góa bōe éng-kiú kì-tiâu lí ê chōe.

26Lâi! Lán lâi-khì chiūⁿ hoat-têng, lí thang khòng-kò; lí thê-chhut sin-sò͘, chèng-si̍t lí kong-chèng.

27Lí tē-it ê chó͘-sian hoān-chōe, lí ê tāi-giân-jîn pōe-poān góa,

28lí ê siú-léng phah lâ-sâm góa ê sèng-só͘. Só͘-í, góa hō͘ Ngá-kok húi-bia̍t, hō͘ Í-sek-lia̍t siū lêng-jio̍k.

← Chapter 42 Jump to: Chapter 44 →