2 Chronicles 1

Ilonggo (Maayong Balita nga Biblia (2012))

Jump to: Chapter 2 →

1Si Solomon nga anak ni Haring David nagmalig-on sa iya ginharian, tungod kay ang Ginoo nga iya Dios nagbendisyon sa iya kag naghimo sa iya nga gamhanan gid.

2Si Haring Solomon nagsugo sa tanan nga mga opisyales nga gintugyanan sang mga linibo kag sang mga ginatos nga mga tawo, sang tanan nga mga opisyales sa gubyerno, sang tanan nga mga pangulo sang mga panimalay, kag sang iban nga mga tawo,

3nga nagamando sa ila sa pagkadto upod sa iya sa lugar nga ginasimbahan sa Gabaon. Nagkadto sila didto tungod kay yadto didto ang Tolda sang presensya sang Ginoo nga ginhimo ni Moises nga alagad sang Dios, sang didto sila sa desierto. (

4Pero ang Kaban sang Kasugtanan didto sa Jerusalem, gintago sa tolda nga ginpatindog ni Haring David sang pagdala niya sang Kaban halin sa Kiryat-jearim.)

5Ang altar nga bronsi nga ginhimo anay ni Besalel nga anak ni Uri kag apo ni Hur, didto man sa Gabaon sa atubangan sang Tolda sang presensya sang Ginoo. Si Haring Solomon kag ang tanan nga mga tawo nagsimba sa Ginoo didto.

6Sa atubangan sang Tolda ang hari nagsimba sa Ginoo paagi sa pagdulot sang mga halad sa altar nga bronsi. Naghalad sia sing 1,000 ka mga sapat kag ginsunog ini sing bug-os sa ibabaw sang altar.

7Sadto nga gab-i ang Dios nagpakita kay Solomon kag nagpamangkot sa iya, “Ano bala ang luyag mo nga ihatag ko sa imo?”

8Si Solomon nagsabat, “Nagpakita ka sing daku kag mapinadayunon nga gugma sa akon amay nga si David, kag karon ginhimo mo ako nga hari sa pagbulos sa iya.

9O Ginoong Dios, karon tumana ang imo saad sa akon amay. Ginhimo mo ako nga hari sa sining tama gid kadamo nga mga tawo sa bagay nga indi sila maisip.

10Gani hatagi ako sing kaalam kag ihibalo nga kinahanglan ko sa paggahom sa ila, kay kon indi, ano ang pagkasarang ko sa paggahom sining imo mga tawo nga tama kadamo?”

11Ang Dios nagsabat kay Solomon, “Husto ang imo ginpili. Sa baylo nga magpangayo ka sing manggad, ukon pagkabutang, ukon kadungganan, ukon kamatayon sang imo mga kaaway, ukon malawig nga kabuhi para sa imo kaugalingon, nagpangayo ka sing kaalam kag ihibalo agod nga makasarang ka sa paggahom sa akon mga katawhan sa diin ginhimo ko ikaw nga hari.

12Hatagan ko ikaw sing kaalam kag ihibalo. Wala labot sini, hatagan ko ikaw sing dugang nga manggad, pagkabutang, kag kadungganan nga wala pa gid maangkon sang bisan sin-o nga hari nga una sa imo ukon sa ulihi nimo.”

13Gani naghalin si Solomon sa lugar nga ginasimbahan sa Gabaon sa diin didto ang Tolda sang presensya sang Ginoo kag nagbalik sia sa Jerusalem. Didto naggahom sia sa Israel.

14Gintipon niya ang 1,400 ka mga karwahi kag 12,000 ka mga manugkabayo para sa inaway. Ang iban sa ila sini ginbutang niya sa Jerusalem kag ang iban ginbutang niya sa lainlain nga mga siudad.

15Sa tion sang iya paggahom, ang pilak kag bulawan sa Jerusalem daw pareho lang ka ordinaryo sang mga bato, kag ang kahoy nga sedro madamo man pareho lang ka ordinaryo sang kahoy nga sikomoro sa salamputan sang mga kabukiran sang Juda.

16Ang mga tulogyanan sang hari nagbakal para sa iya sang mga kabayo halin sa Musri kag sa Cilicia.

17Nagbakal man sila sang mga karwahi halin sa Ehipto. Sila ang nagbaligya sang mga kabayo kag mga karwahi sa mga hari nga Hethanon kag Siriahanon. Ang bili sang isa ka karwahi tag-600 ka bilog nga pilak kag ang isa ka kabayo tag-150 ang bilog.

Jump to: Chapter 2 →