2 Chronicles 2

Ilonggo (Maayong Balita nga Biblia (2012))

← Chapter 1 Jump to: Chapter 3 →

1Si Haring Solomon nagpamat-od sa pagpatindog sang templo sa diin pagasimbahon ang Ginoo kag subong man sa pagpatindog sang palasyo para sa iya kaugalingon.

2Nagbutang sia sang 70,000 ka mga tawo sa paghakot sang mga gamit, kag 80,000 ka mga tawo sa pagbasbas sang mga bato sa kabakuloran. May 3,600 ka mga tawo nga gintugyanan sa pagdumala sang obra.

3Si Solomon nagpadala sing mensahe kay Haring Hiram sang Tiro nga nagasiling: “Himua man sa akon ang imo ginhimo sa akon amay nga si Haring David sang imo pagbaligya sa iya sang mga kahoy nga sedro para sa pagpatindog sang iya palasyo.

4Magapatindog ako sang isa ka templo sa kadungganan sang Ginoo nga akon Dios. Manginbalaan ini nga lugar sa diin ang akon mga tawo kag ako magasimba sa iya paagi sa pagsunog sang mga pahamot nga insyenso, sa diin magadulot kami sa iya sing balaan nga tinapay sa gihapon, kag sa diin magadulot sing mga halad nga sinunog kada aga kag hapon, kag sa Adlaw nga Inugpahuway, sa Piesta sang Lati, kag sa iban nga mga adlaw nga balaan nga nagapasidungog sa Ginoo nga amon Dios. Ginsugo niya ang Israel sa paghimo sini sa walay katapusan.

5Nagaplano ako sa pagpatindog sang isa ka daku nga templo, tungod kay ang amon Dios mas gamhanan sang sa iban nga dios.

6Walay sapayan wala gid sang isa nga makapatindog sing templo para sa Dios, tungod kay bisan ang tanan nga kasangkaron sang langit indi makaigo sa iya. Paano ako makapatindog sang isa ka templo nga labaw pa sang sa isa ka lugar nga pagasunogan sang insyenso sa presensya sang Dios?

7Karon padalhi ako sing tawo nga sampaton sa pagsinsil sa bulawan, pilak, bronsi, kag salsalon kag sa paghimo sang tela nga asol, granate kag pula. Magaobra sia upod sa sampaton nga mga manug-obra sang Juda kag Jerusalem nga ginpili sang akon amay nga si David.

8Nakahibalo ako kon daw ano ka sampaton sang imo manug-utod sang kahoy, gani padalhi ako sing kahoy nga sedro, sipres, kag sandalo halin sa Libano. Handa ako sa pagpadala sang akon mga tawo sa pagbulig sang imo mga tawo,

9sa pag-aman sang madamo nga tablon, tungod kay ang templo nga akon ginaplano nga patindugon daku kag matahom kaayo.

10Ihatag ko sa imo mga manug-utod sang kahoy, ang 50,000 ka sako nga trigo, 50,000 ka sako nga sebada, 20,000 ka galon nga bino, kag 20,000 ka galon nga lana nga olivo.”

11Si Haring Hiram sang Tiro nagpadala kay Solomon sing sulat sa pagsabat sa iya, “Tungod kay ang Ginoo naghigugma sang iya mga tawo, ginhimo niya ikaw nga ila hari.

12Dayawon ang Ginoong Dios sang Israel, nga nagtuga sang langit kag duta! Ginhatagan niya si Haring David sing isa ka maalam nga anak nga lalaki, napun-an sing paghangop kag abilidad, nga karon nagaplano sa pagpatindog sang isa ka templo para sa Ginoo kag isa ka palasyo para sa iya kaugalingon.

13Padalhan ko ikaw sang isa ka maalam kag sampaton nga panday nga si Huram.

14Ang iya iloy katapo sang tribo ni Dan, kag ang iya amay isa ka tumandok sang Tiro. Kahibalo sia sa paghimo sang mga butang gikan sa bulawan, pilak, bronsi, salsalon, bato kag kahoy. Makahimo sia sang tela nga asol, granate, kag pula, kag lino. Makahimo sia sang tanan nga sahi sang pagsinsil, kag makasunod sang tanan nga korte nga isiling sa iya. Paupda sia obra sa imo sampaton nga mga tawo kag subong man sa mga tawo nga nag-obra sa imo amay nga si Haring David.

15Gani, karon ipadala sa amon ang trigo, sebada, bino kag lana sang olivo nga imo ginsaad.

16Sa mga bukid sang Libano magapang-utod kami sang tanan nga kahoy nga sedro nga inyo kinahanglanon. Higtan namon ini sing tingob nga mangin-balsa, kag palutawon ini sa higad sang dagat tubtob sa Jope. Halin didto madala na ninyo ini sa Jerusalem.”

17Si Haring Solomon nag-isip sang tanan nga mga dumoluong nga nagaestar sa duta sang Israel, pareho sang pag-isip sang iya amay nga si David. May 153,600 ka mga pumoluyo nga dumoluong.

18Ang 70,000 sa ila ginhimo niya nga manughakot sang mga galamiton kag ang 80,000 sa pagbasbas sang mga bato sa kabakuloran, kag ang 3,600 sa pagdumala sang obra sang mga tawo.

← Chapter 1 Jump to: Chapter 3 →