2 Chronicles 22

Ilonggo (Maayong Balita nga Biblia (2012))

← Chapter 21 Jump to: Chapter 23 →

1Ang iban sang mga Arabo nagpanggubat kag nagpamatay sang tanan nga mga anak nga lalaki ni Haring Jehoram luas kay Ocozias, ang kamanghuran nga anak. Gani karon ang mga pumoluyo sang Jerusalem naghimo kay Ocozias nga hari sa pagbulos sa iya amay.

2Si Ocozias nanginhari sang nagaedad sia sing baynte dos ka tuig kag naggahom sia sa Jerusalem sing isa ka tuig. Ang iya iloy amo si Atalia, apo ni Haring Omri sang Israel.

3Ginsunod man ni Ocozias ang ginhimo sang panimalay ni Acab, tungod kay ang iya iloy naglaygay sa iya nga amo ang nagdala sa iya sa paghimo sing malaut.

4Nagpakasala sia batok sa Ginoo tungod kay sang napatay ang iya amay, ang iban nga mga katapo sang panimalay ni Haring Acab amo ang iya mga manuglaygay kag sila amo ang nagdala sa iya sa pagkapukan.

5Sa pagsunod sang ila mga laygay, nag-upod sia kay Haring Joram sang Israel sa pagpakig-away batok kay Haring Hazael sang Siria. Ang mga hangaway nag-inaway sa Ramot sang Galaad, kag si Joram napilas sa inaway.

6Nagbalik sia sa siudad sang Jezreel sa pagpabulong agod mag-ayo ang iya mga pilas kag si Ocozias nagkadto didto sa pagbisita sa iya.

7Ang Dios naggamit sini nga pagbisita kay Joram sa pagdala sang pagkapukan ni Ocozias. Samtang si Ocozias yadto didto, sia kag si Joram ginpakigkitaan ni Jehu nga anak ni Nimsi, nga ginpili sang Ginoo sa paglaglag sang mga panimalay ni Acab.

8Samtang si Jehu nagatuman sang pagsilot sang Dios sa panimalay ni Acab, nasugata niya ang isa ka grupo sang mga pangulo sang Juda kag mga hinablos ni Ocozias nga nag-upod sa iya sa pagbisita kay Joram. Ginpatay sila tanan ni Jehu.

9Ginpangita nila si Ocozias kag nakita nila sia nga nagapanago sa Samaria. Gindala nila sia kay Jehu, kag ginpatay sia. Pero ginlubong nila ang iya bangkay tungod sang ila pagtahod sa iya lolo nga si Haring Josafat, nga naghimo sang iya masarangan sa pag-alagad sa Ginoo. Wala sing nabilin sa katapo sang panimalay ni Ocozias nga makagahom sa ginharian.

10Sang mahibal-an ni Atalia nga iloy ni Haring Ocozias nga ang iya anak ginpatay, ginpapatay man niya ang tanan nga mga katapo sang panimalay sang hari sa Juda.

11Si Ocozias may utod nga babayi sa amay nga si Josaba nga napangasawa sang pari nga si Joiada. Ginluwas ni Josabet sa tago ang isa sang mga anak ni Ocozias nga si Joas, nga upod sang iban nga mga prinsipe nga palatyon na kuntani, kag gintago niya sia sa kwarto sang Templo upod sa isa ka yaya. Ginluwas niya si Joas sa kamatayon gikan sa mga kamot ni Atalia paagi sa pagtago sa iya.

12Nagpabilin sia didto sa pagpanago sa sulod sang anom ka tuig, samtang si Atalia nagagahom subong rayna.

← Chapter 21 Jump to: Chapter 23 →