2 Chronicles 8

Ilonggo (Maayong Balita nga Biblia (2012))

← Chapter 7 Jump to: Chapter 9 →

1Ginpatindog ni Solomon ang Templo kag ang iya palasyo sa sulod sang baynte ka tuig.

2Ginpakaayo man niya ang mga siudad nga ginhatag sa iya ni Haring Hiram kag ginpaestaran niya ini sa mga taga-Israel.

3Gin-agaw niya ang mga kadutaan sang Hamat kag Soba,

4kag ginpamakuran ang siudad sang Palmira sa desierto. Ginpakaayo niya ang tanan nga mga siudad sang Hamat nga amo ang nabutangan sang mga bodega.

5Ginpakaayo man ni Solomon ang masunod nga mga siudad: ang Naibabaw kag ang Naubos nga Bet-horon nga napamakuran nga mga siudad nga may mga pwerta nga sarang mapintalan,

6ang siudad sang Baalat, tanan nga mga siudad nga nabutangan sang mga bodega, kag ang mga siudad sa diin ang iya mga kabayo kag mga karwahi ginabutang. Ginhimo niya ang tanan niya nga mga plano sa pagpatindog sa Jerusalem, sa Libano, kag sa bug-os nga kadutaan nga iya ginagamhan.

7Ginpilit ni Solomon sa pag-obra ang tanan nga mga kaliwatan sang mga tawo sang Canaan nga wala ginpamatay sang mga Israelinhon sang pag-agaw nila sang duta. Ini sila nagalakip sang mga Hethanon, Amornon, Peresnon, Hevhanon, kag sang mga Jebusnon nga ang ila mga kaliwat nagapadayon nga mga ulipon tubtob sini nga adlaw.

9Wala niya pagpilita ang mga Israelinhon sa pag-obra kundi ginhimo niya sila nga iya mga soldado, mga opisyales, mga pangulo sa mga karwahi, kag mga manugkabayo.

10Si Solomon may 250 ka mga opisyales nga gintugyanan agod piliton ang mga tawo sa pag-obra sa nagakalainlain nga mga bulohaton.

11Gindala ni Solomon ang iya asawa, nga anak sang hari sang Ehipto halin sa Siudad ni David pakadto sa balay nga iya ginpatindog para sa iya. Nagsiling si Solomon “Indi sia dapat mag-estar sa palasyo ni Haring David sang Israel, tungod kay balaan ang kada lugar sa diin ginbutangan sang Kaban sang Kasugtanan.”

12Si Solomon nagdulot sing mga halad sa Ginoo sa altar nga iya ginpatindog sa atubangan sang Templo.

13Nagdulot sia sing mga halad nga sinunog suno sa mga pagsulondan sa Kasugoan ni Moises sa tagsa ka balaan nga adlaw: ang Adlaw nga Inugpahuway, ang mga Piesta sang Lati, kag ang tatlo ka piesta kada tuig—Piesta sang Tinapay nga wala sing Lebadora, Piesta sang Pag-ani, kag Piesta sang mga Palasilungan.

14Sa pagtuman sang mga pagsulondan nga ginbilin sang iya amay nga si David, ginhatagan niya sing bulohaton ang mga pari adlaw-adlaw, kag ang mga Levita nga nagabulig sa mga pari sa pagkanta kag sa paghimo sang ila mga bulohaton. Amo man ang iya ginhimo sa mga gwardya sa Templo, sa pagtuman sang ila mga katungdanan adlaw-adlaw sa tagsa ka pwerta, suno sa mga sugo ni David, ang tawo sang Dios.

15Ang mga pagsulondan nga ginhatag ni David sa mga pari kag sa mga Levita nahanungod sa mga bodega kag sa iban nga mga bagay gintuman gid tanan.

16Sa amo nga tion ang tanan nga mga bulohaton ni Solomon natapos. Halin sa pagpasad sang sadsaran sang Templo sang Ginoo tubtob natapos ini, ang tanan nga mga bulohaton nagmadinalag-on.

17Dayon si Haring Solomon nagkadto sa Eziongeber kag sa Elat, ang mga pantalan sa Baybayon sang Aqaba, sa duta sang Edom.

18Si Haring Hiram nagpadala sa iya sang mga sakayan nga ginadumalahan sang iya kaugalingon nga mga opisyales kag ginadala sang mga batid nga mga sakayanon. Nagpanakayon sila upod sa mga opisyales ni Solomon pakadto sa duta sang Ofir kag sang pagbalik nila kay Solomon nagdala sila sang malapit sa desi-sais ka tonelada nga bulawan.

← Chapter 7 Jump to: Chapter 9 →