2 Chronicles 36

Ilonggo (Maayong Balita nga Biblia (2012))

← Chapter 35 Jump to:

1Ang mga tawo sang Juda nagpili kay Joacaz nga anak ni Josias, kag ginhaplas sia nga manginhari sang Jerusalem.

2Si Joacaz nanginhari sang Juda sang nagaedad sia sing baynte-tres ka tuig, kag naggahom sia sa Jerusalem sa sulod sang tatlo ka bulan.

3Si Haring Neco sang Ehipto nagdala sa iya subong bihag kag ginpabayad ang Juda sing 7,500 ka libra nga pilak kag setentay singko ka libra nga bulawan subong buhis.

4Si Neco naghimo kay Eliaquim nga utod ni Joacaz nga hari sang Juda kag gin-ilisan ang iya ngalan kay Joaquim. Si Joacaz gindala ni Neco sa Ehipto.

5Si Joaquim nanginhari sang Juda sang nagaedad sia sang baynte-singko ka tuig, kag naggahom sia sa Jerusalem sing onse ka tuig. Nagpakasala sia batok sa Ginoo nga iya Dios.

6Si Haring Nabucodonosor sang Babilonia naggubat sang Juda, gindakop si Joaquim, kag gindala sia sa Babilonia nga nakadenahan.

7Gindala ni Nabucodonosor ang iban nga mga manggad sang Templo kag ginbutang ini sa iya palasyo sa Babilonia.

8Ang tanan nga mga binuhatan ni Joaquim lakip ang iya makangilil-ad nga pagginawi kag malaut nga hinimuan nasulat sa Maragtas sang mga Hari sang Israel kag Juda. Ang iya anak nga si Joaquin nagbulos sa iya subong hari.

9Si Joaquin nanginhari sang Juda sang nagaedad sia sing desi-otso ka tuig, kag naggahom sia sa Jerusalem sing tatlo ka bulan kag napulo ka adlaw. Nagpakasala man sia batok sa Ginoo.

10Sang pagsugod sang bag-o nga tuig, si Haring Nabucodonosor nagdala kay Joaquin sa Babilonia subong bihag, kag gindala man niya ang mga manggad sang Templo. Dayon si Nabucodonosor naghimo kay Sedequias, ang tiyo ni Joaquin, nga hari sang Juda kag Jerusalem.

11Si Sedequias nanginhari sang Juda sang nagaedad sia sang baynte uno ka tuig, kag naggahom sia sa Jerusalem sing onse ka tuig.

12Nagpakasala sia batok sa Ginoo, kag wala sia magpamati nga may pagpaubos kay Jeremias nga propeta nga naghambal sang pulong sang Ginoo.

13Si Sedequias nagrebelde batok kay Haring Nabucodonosor nga nagpilit sa iya sa pagsumpa sa ngalan sang Dios nga magaunong sia. Nagpatig-a sia sang iya tagipusoon nga indi maghinulsol kag indi magbalik sa Ginoo, ang Dios sang Israel.

14Wala labot sini, ang mga pangulo sang Juda, ang mga pari, kag ang mga tawo nagsunod sang malaut nga ginahimo sang mga pungsod sa ila palibot sa pagsimba sa mga diosdios, kag gindagtaan nila ang Templo nga ginpakabalaan sang Ginoo mismo.

15Ang Ginoo, ang Dios sang ila mga katigulangan, nagpadayon sa pagpadala sang mga propeta sa pagpaandam sa iya mga katawhan tungod kay luyag niya nga luwason sila kag ang iya Templo.

16Pero gin-uligyat nila ang mga mensahero sang Dios, wala ginsapak ang iya mga pulong, kag ginkadlawan ang iya mga propeta, tubtob nga sang ulihi ang kaakig sang Ginoo nagdabdab batok sa ila nga indi na sila makapalagyo.

17Gani ginpadala sang Ginoo ang hari sang Babilonia nga nagpamatay sang mga pamatan-on nga mga lalaki sang Juda, bisan yara sila sa sulod sang Templo. Wala sia sing kaluoy sa bisan kay sin-o, bata ukon tigulang, lalaki ukon babayi, masakiton ukon maayo sing lawas. Gintugyan sila tanan sang Dios sa iya.

18Ginkawatan sang hari sang Babilonia ang Templo, ang talaguan sang manggad sa Templo, kag ang manggad sang hari kag sang iya mga opisyales, kag gindala ang tanan pabalik sa Babilonia.

19Ginsunog niya ang Templo kag ang siudad, lakip ang tanan nga mga palasyo kag manggad diri, kag ginguba ang pader sang siudad.

20Ang nabilin nga buhi iya gindala sa Babilonia, sa diin nag-alagad sila sa iya kag sa iya mga kaliwat subong mga ulipon, tubtob sa paggahom sang Ginharian sang Persia.

21Amo ini ang katumanan sang ginsiling sang Ginoo paagi sa iya propeta nga si Jeremias: “Ang duta manginmamingaw sa sulod sang setenta ka tuig, bilang bayad sang Inugpahuway sang duta nga wala gintuman.”

22Sa nahauna nga tuig nga si Ciro amo ang hari sang Persia, ang Ginoo nagpanghikot sa iya nga maghimo sang isa ka mando paagi sa pagpadala sang sulat nga pagabasahon sang matunog bisan diin sa bug-os nga ginharian. Ini ginhimo sa pagtuman sang ginsiling sang Ginoo paagi kay Jeremias nga propeta.

23“Amo ini ang mando ni Ciro, ang hari sang Persia. Ang Ginoo, ang Dios sang Langit, naghimo sa akon nga hari sa bug-os nga kalibutan kag naghatag sa akon sing katungdanan sa pagpatindog sing templo para sa iya sa Jerusalem sa Juda. Karon, tanan kamo nga mga katawhan sang Dios, magpauli didto, kag kabay ang Ginoo nga inyo Dios mag-upod sa inyo.”

← Chapter 35 Jump to:

Recommended Reading

Commentary 2 Chronicles Commentaries → Devotional 2 Chronicles Devotional Guide → Get This Bible 2012 Study Bible →