2 Chronicles 16

Ilonggo (Maayong Balita nga Biblia (2012))

← Chapter 15 Jump to: Chapter 17 →

1Sa ika-36 nga tuig sang paggahom ni Haring Asa sang Juda, si Haring Baasa sang Israel naggubat sa Juda kag nagpatindog sang pamakod sa Rama, agod nga wala sing makaagi paggwa kag pasulod sa Juda.

2Gani si Asa nagkuha sing pilak kag bulawan gikan sa mga talaguan sang manggad sang Templo kag sang palasyo kag ginpadala ini sa Damasco, kay Haring Benhadad sang Siria upod sini nga mensahe:

3“Magdampiganay kita, subong sang aton mga amay. Ining pilak kag bulawan regalo ini sa imo. Karon untata ang imo pagdampig kay Haring Baasa sang Israel agod nga iya kuhaon ang iya mga hangaway sa akon kadutaan.”

4Nagsugot si Benhadad sa hingyo ni Asa, kag nagpadala sia sang iya pangulo nga mga opisyales kag sang ila mga hangaway sa pagsalakay sang mga siudad sang Israel. Gin-agaw nila ang Ijon, Dan, Abel-Bet-Maaca, kag ang tanan nga mga siudad sang Neftali sa diin ginabutang ang mga bodega.

5Sang pagkabati ni Haring Baasa sang natabo, gin-untatan niya ang pag-obra sang pamakod sa Rama kag ginbayaan ini.

6Dayon gintipon ni Haring Asa ang mga tawo sa bug-os nga Juda kag ginpakuha sa ila ang mga bato kag mga tablon nga gingamit ni Baasa sa Rama, kag gingamit nila ini sa pagbutang sang pamakod sa mga siudad sang Geba kag Mispa.

7Sa sadto nga tion si Hanani nga propeta nagkadto kay Haring Asa kag nagsiling, “Tungod kay nagsalig ka sa hari sang Siria sa baylo nga magsalig ka sa Ginoo nga imo Dios, ang mga hangaway sang hari sang Israel nakapalagyo gikan sa imo.

8Indi bala nga ang mga Etiopiahanon kag Libyanhon may madamo nga mga hangaway kag mga karwahi kag mga manugkabayo? Pero tungod kay nagsalig ka sa Ginoo, ginpadaog ka niya batok sa ila.

9Ang Ginoo nagabantay gid sa bug-os nga duta, sa paghatag sing kusog sa ila nga nagahigugma sa iya. Naghimo ikaw sang binuang, kag gani sugod karon pirme ikaw magapakig-away.”

10Tungod sini naakig gid si Asa sa propeta sa bagay nga ginpakadenahan niya sia. Sa amo man nga tion nagsugod si Asa sa pagpamintas sa iban nga mga tawo.

11Ang tanan nga mga hitabo sa paggahom ni Asa halin sa ginsugoran tubtob sa katapusan nasulat sa Maragtas sang mga hari sang Juda kag Israel.

12Sa ika-39 nga tuig sang paghari ni Asa, napiang sia paagi sa isa ka malala nga balatian sa tiil, kag nagdangop sia sa mga manugbulong sa baylo sang sa Ginoo sa pagpangayo sang bulig.

13Sang makaligad ang duha ka tuig napatay sia

14kag ginlubong sa lulobngan nga bato nga ginpahimo niya para sa iya kaugalingon sa Siudad ni David. Gingamit nila ang mga pahamot kag mga lana sa pag-aman sang iya bangkay sa paglubong, kag nagdabok sila sang daku nga kalayo sa paglalaw sa iya kamatayon.

← Chapter 15 Jump to: Chapter 17 →

Recommended Reading

Commentary 2 Chronicles Commentaries → Devotional 2 Chronicles Devotional Guide → Get This Bible 2012 Study Bible →