2 Chronicles 19

Ilonggo (Maayong Balita nga Biblia (2012))

← Chapter 18 Jump to: Chapter 20 →

1Si Haring Josafat sang Juda nagbalik sa iya palasyo sa Jerusalem nga wala maano.

2Ang propeta nga si Jehu nga anak ni Hanani nagkadto sa pagpakigkita sa hari kag nagsiling sa iya, “Nagahunahuna ka bala nga matarong ang pagbulig sa mga malaut, kag pag-apin sa mga nagadumot sa Ginoo? Tungod sang paghimo mo sina, ginpaakig mo ang Ginoo sa imo.

3Walay sapayan, may maayo nga butang nga yara sa imo. Ginlaglag mo ang tanan nga mga simbulo sang diosa nga si Asera nga ginasimba sang mga tawo, kag gintinguhaan mo ang pagsunod sa kabubot-on sang Dios.”

4Bisan si Josafat nag-estar sa Jerusalem, nagakadto sia pirme sa iya mga tawo, halin sa Beerseba sa bagatnan tubtob sa punta sang kabakuloran sang Efraim sa aminhan, agod sa pagtawag sa ila pabalik sa Ginoo, ang Dios sang ila mga katigulangan.

5Nagbutang sia sang mga hukom sa tagsa ka napamakuran nga mga siudad sang Juda

6kag nagtudlo sa ila: “Mag-andam kamo sa inyo paghukom, kay ang inyo paghukom indi suno sa awtoridad sang tawo kundi sa awtoridad sang Ginoo, kag sia nagaupod sa inyo kon kamo nagahukom.

7Pasidunggi ninyo ang Ginoo, kag magginawi sang maayo, tungod kay ang Ginoo nga aton Dios wala nagatugot sang dinaya, ukon pagpasulabi, ukon pagbaton sing hamham.”

8Sa Jerusalem, si Josafat nagpili sing mga Levita, mga pari, kag sang iban nga mga pangulo sang mga pumoluyo subong mga hukom sa mga kaso nga may kaangtanan sa pagsupak sang Kasugoan sang Ginoo, ukon sang mga binais sa tunga sang mga pumoluyo sang siudad.

9Ginhatagan niya sila sining masunod nga mga pagtudlo: “Dapat ninyo himuon ang inyo mga katungdanan nga may pagtahod sa Ginoo, kag magmatutom sa pagtuman sa iya sa tanan ninyo nga ginahimo.

10Kon ang inyo mga kasimanwa nga naghalin sa bisan diin sang inyo mga siudad magdala sa inyo sang kaso sa pagpatay, ukon sang pagsupak sang bisan ano nga kasugoan ukon sugo, dapat tudloan ninyo sila sang maayo agod nga indi sila magpakasala batok sa Ginoo. Kon indi ninyo ini paghimuon, kamo kag ang inyo mga kasimanwa magabatyag sang kasakit sang kaakig sang Ginoo. Pero kon tumanon ninyo ang inyo katungdanan, wala kamo sing salabton.

11Si Amarias, ang Pinakamataas nga Pari, amo ang may awtoridad sa tanan nga bagay nga may kaangtanan sa Ginoo, kag si Zebedias nga anak ni Ismael, gobernador sang Juda, amo ang may awtoridad sa mga bagay nga may kaangtanan sa gubyerno. Ang mga Levita amo ang may katungdanan sa pagtan-aw nga ang mga pamat-od sang mga korte ginatuman. Magpakaisog kamo, kag tumana ninyo ini nga mga pagtudlo, kag kabay ang Ginoo magaapin sang mga matarong!”

← Chapter 18 Jump to: Chapter 20 →

Recommended Reading

Commentary 2 Chronicles Commentaries → Devotional 2 Chronicles Devotional Guide → Get This Bible 2012 Study Bible →