2 Chronicles 25

Ilonggo (Maayong Balita nga Biblia (2012))

← Chapter 24 Jump to: Chapter 26 →

1Si Amasias nanginhari sang nagaedad sia sing baynte-singko ka tuig, kag naggahom sia sa Jerusalem sa sulod sang baynte-nwebe ka tuig. Ang iya iloy amo si Joadan nga taga-Jerusalem.

2Naghimo sia sing matarong sa Ginoo, pero pasapayan lang ini sa iya.

3Sang malig-on na ang iya paggahom, ginpapatay niya ang mga opisyales nga nagpatay sang iya amay.

4Pero wala niya ginpapatay ang ila mga kabataan, kundi ginsunod niya ang sugo sang Ginoo sa Kasugoan ni Moises: “Ang mga ginikanan indi pagpatyon tungod sa mga sala nga ginhimo sang ila mga kabataan, kag ang mga kabataan indi pagpatyon tungod sa mga sala nga ginhimo sang ila mga ginikanan. Ang isa ka tawo pagapatyon lamang tungod sa iya kaugalingon nga sala.”

5Si Haring Amasias nagtipon sang tanan nga mga lalaki sang mga tribo ni Juda kag Benjamin kag gingrupo sila suno sa ila mga kabarangayan kag ginbutangan sing mga opisyales sa pagpangulo sa mga grupo nga may linibo ka tawo kag sang grupo nga may ginatos ka tawo. Ini nagalakip sang tanan nga mga lalaki nga nagaedad sing baynte ka tuig paibabaw, 300,000 sila tanan. Pinili ini sila tanan, handa para sa inaway, kag maabtik sa paggamit sang mga bangkaw kag mga taming.

6Dugang pa sini, nagsuhol sia sang 100,000 ka mga soldado gikan sa Israel kag nagbayad sing apat ka tonelada nga pilak.

7Pero ang isa ka propeta nagkadto sa hari kag nagsiling sa iya, “Indi pagdalha ini nga mga soldado sang Israel upod sa imo. Ang Ginoo wala nagaupod sa sini nga mga tawo nga naggikan sa Naaminhan nga Ginharian.

8Ayhan nagahunahuna ikaw nga makabulig sila sa pagpabakod sa imo sa inaway, pero ang Dios magatugot nga malutos ikaw sang imo mga kaaway, kay may gahom sia sa paghatag sing kadalag-an ukon kapierdihan.”

9si Amasias nagpamangkot sa propeta, “Pero paano ang pilak nga akon na nabayad sa ila?” Ang propeta nagsabat, “Ang Ginoo magauli sa imo sang sobra pa sina!”

10Gani ginpapauli ni Amasias ang mga sinuholan nga mga hangaway. Tungod sini nagpauli sila nga nainit kag naakig gid sa mga tawo sang Juda.

11Si Amasias nagpakaisog kag ginpangulohan ang iya mga hangaway pakadto sa Kapatagan sang Asin. Didto nag-away sila kag nagpamatay sang 10,000 ka mga hangaway sang Edom.

12Ang mga hangaway sang Juda nagdakop man sang 10,000 ka mga hangaway kag gindala nila sila sa ibabaw sang pil-as sang siudad sang Sela kag ginpanghulog, agod magkalamatay sila sa mga bato sa idalom.

13Sa pihak nga bahin, ang mga hangaway nga mga Israelinhon nga wala pagtugoti ni Amasias sa pag-upod sa inaway nagsalakay sa mga siudad sang Juda sa gintung-an sang Samaria kag Bet-horon. Nagpamatay sila sang 3,000 ka mga tawo, kag nagkuha sang madamo nga mga pagkabutang.

14Sang makabalik si Amasias halin sa paglutos sang mga Edomnon, gindala niya pabalik upod sa iya ang ila mga diosdios, ginpatindog ini, ginsimba, kag nagsunog sang mga insyenso para sa ila.

15Nagpaakig ini sa Ginoo, gani nagpadala sia sing propeta kay Amasias. Ang propeta nagsiling sa iya, “Ngaa nga nagsimba ka sa iban nga mga diosdios nga indi gani makaluwas sa ila kaugalingon nga mga tawo gikan sa imo gahom?”

16Si Amasias nagsabat, “San-o pa bala namon ikaw ginhimo nga palamangkutan sang hari? Hipos ka, kay kon indi gani ipapatay ko ikaw!” Ang propeta nag-untat, pero nagsiling sia anay, “Karon nahibaluan ko nga ang Dios nagpamat-od sa paglaglag sa imo, tungod kay ginhimo mo ini tanan, kag wala ka magpamati sa akon laygay.”

17Si Haring Amasias sang Juda kag ang iya mga manuglaygay nagplano batok sa Israel. Dayon nagpadala sia sing mensahe kay Haring Jehoas sang Israel nga amo ang anak ni Joacaz kag apo ni Jehu, nga nagahangkat sa iya sa pag-away.

18Si Jehoas nagbalos sining mensahe kay Amasias: “Sang una sa Kabukiran sang Libano, ang isa ka talungon nagpadala sang mensahe sa kahoy nga Sedro nga nagasiling: ‘Ipaasawa ang imo anak nga babayi sa akon anak nga lalaki!’ Ang isa ka sapat nga talunon naglabay kag gintasak ang talungon.

19Karon ikaw, Amasias, nagapabugal nga ginlutos mo ang mga Edomnon, pero nagalaygay ako sa imo nga magpahimuyong ka sa imo balay. Ngaa nga magtuga ka sing gamo nga magalaglag lamang sa imo kag sa imo mga tawo?”

20Pero si Amasias wala magpamati. Kabubot-on sang Dios nga si Amasias malutos tungod kay nagsimba sia sa diosdios sang mga Edomnon.

21Gani si Haring Jehoas sang Israel nagkadto sa inaway batok kay Haring Amasias sang Juda. Nagsugataay sila sa Bet-semes sa Juda,

22kag ang mga soldado sang Juda nalutos kag nagpalalagyo sila pauli.

23Gindakop ni Jehoas si Amasias kag gindala sa Jerusalem. Didto ginguba niya ang pader sang siudad halin sa Pwerta sang Efraim pakadto sa Pamusod nga Pwerta nga may kalayuon nga 100 ka dupa.

24Gindala niya balik sa Samaria subong mga inagaw ang tanan nga bulawan kag pilak sa Templo, ang mga gamit sang Templo nga ginbantayan sang mga kaliwat ni Obed-edom, kag ang manggad sa palasyo. Gindala man niya ang mga bihag upod sa iya.

25Si Haring Amasias sang Juda nagkabuhi pa sing kinse ka tuig labaw kay Haring Jehoas sang Israel.

26Ang tanan nga mga butang nga ginhimo ni Amasias halin sa ginsugoran tubtob sa katapusan sang iya paggahom nasulat sa Maragtas sang mga Hari sang Juda kag Israel.

27Halin sang tion nga nagtalikod sia sa Ginoo, may mga pagplano batok sa iya sa Jerusalem. Sang ulihi nagpalagyo sia sa siudad sang Lakis, pero ang iya mga kaaway nagsunod sa iya didto kag ginpatay sia.

28Ang iya bangkay gindala sa Jerusalem nga ginkarga sa kabayo, kag ginlubong sia didto sa lulobngan sang mga hari, sa Siudad ni David.

← Chapter 24 Jump to: Chapter 26 →

Recommended Reading

Commentary 2 Chronicles Commentaries → Devotional 2 Chronicles Devotional Guide → Get This Bible 2012 Study Bible →