2 Chronicles 26

Ilonggo (Maayong Balita nga Biblia (2012))

← Chapter 25 Jump to: Chapter 27 →

1Ang tanan nga mga tawo sang Juda nagpili kay Uzias nga nagaedad sang desi-sais ka tuig sa pagbulos sa iya Amay nga si Amasias subong hari.

2Sa tapos mapatay si Amasias, si Uzias nag-agaw sang Elat kag ginpakaayo ang siudad.

3Si Uzias naghari sang nagaedad sia sing desi-sais ka tuig kag naggahom sia sa Jerusalem sa sulod sang singkwentay dos ka tuig. Ang iya nga iloy amo si Jecolia nga naghalin sa Jerusalem.

4Ginhimo niya ang matarong sa presensya sang Ginoo, nga nagasunod sa ginhimo sang iya amay.

5Samtang nagakabuhi pa si Zacarias, ang iya manuglaygay sa espirituhanon nga mga butang, nag-alagad sia sa Ginoo sing matutom, kag ang Dios nagbendisyon sa iya.

6Si Uzias nagpakig-away batok sa mga Filistinhon. Ginguba niya ang mga pader sang mga siudad sang Gat, Jamnia kag Asdod, kag nagpatindog sia sang mga siudad nga napamakuran malapit sa Asdod kag sa iban nga bahin sang Filistia.

7Ang Dios nagbulig sa iya sa paglutos sang mga Filistinhon, sang mga Arabo nga nagaestar sa Gurbaal, kag sang mga Meunhon.

8Ang mga Amonhon nagbayad sang buhis kay Uzias, kag nangingamhanan sia nga ang iya kabantog naglapnag bisan pa sa Ehipto.

9Ginpalig-on ni Uzias ang mga pamakod sang Jerusalem paagi sa pagpatindog sing mga tore sa Pamusod nga Pwerta, sa Pwerta sa Kapatagan kag sa ginlikuan sang pader.

10Nagpatindog man sia sing malig-on nga mga tore sa desierto kag nagkutkot sang mga bubon tungod kay may madamo sia nga mga baka sa nakatundan nga mga kabakuloran kag mga kapatagan. Tungod kay luyag niya ang panguma nagpahimo sia sing mga talamnan sang ubas sa kabakuloran kag palangumhan sa maayo nga duta.

11May madamo sia nga mga hangaway nga handa sa inaway. Ang mga lista sang mga soldado ginatago sang iya mga sekretaryo nga si Jeiel kag si Maasias, sa idalom sang pagdumala ni Hananias, isa ka katapo sang mga opisyales sang hari.

12Ang mga hangaway ginapangulohan sang 2,600 ka mga opisyales.

13Sa idalom nila may 307,500 ka mga soldado nga sarang makaaway nga may daku nga kusog para sa hari batok sa iya mga kaaway.

14Ginhatagan ni Uzias ang mga soldado sing mga taming, mga bangkaw, mga helmet, mga panagang sa dughan, mga pana kag mga baslay kag mga bato para sa labyog.

15Sa Jerusalem, naghimo ang iya sampaton nga mga tinawo sang mga gamit sa pagtira sang mga baslay kag sa pagpaligid sang dalagku nga mga bato halin sa mga tore kag mga pamusod sang pader sang siudad. Ang iya pagkabantog naglapnag bisan diin, kag naggamhanan gid sia tungod sang bulig nga iya nabaton halin sa Dios.

16Pero sang naggamhanan si Haring Uzias nagbugalon sia kag amo ini ang nagdala sa iya sa kalaglagan. Ginlalis niya ang Ginoo nga iya Dios paagi sa pagsulod sa Templo sa pagsunog sang insyenso sa altar nga ginasunogan.

17Si Azarias nga pari, upod sang otsenta ka mabakod kag maisog nga mga pari, nagsunod sa hari,

18sa pagpamatok. Nagsiling sila, “Uzias! Wala ikaw sing kinamatarong sa pagsunog sang insyenso sa Ginoo. Mga pari lamang nga kaliwat ni Aaron ang ginpakabalaan sa paghimo sini. Gwa ka sa sining balaan nga lugar. Ginpaakig mo ang Ginoong Dios, kag indi sia magpasidungog sa imo.”

19Si Uzias nagatindog didto sa Templo sa kilid sang altar sang insyenso kag nagauyat sang sulodlan sang nagadabdab nga insyenso. Naakig sia sa mga pari, kag sa gilayon ang aro nagtubo sa iya agtang.

20Si Azarias nga pangulo nga pari kag ang iban nga mga pari nagtulok sa agtang sang hari nga nahadlok, kag dayon ginpilit nila sia sa pagwa sa Templo. Nagdalidali sia sa pagwa, tungod kay ang Ginoo nagsilot sa iya.

21Tubtob napatay si Haring Uzias mahigko sia tungod sang iya balatian. Tungod kay indi sia makasulod liwat sa Templo, nag-estar sia sa iya kaugalingon nga balay, ginkuhaan sia sang tanan niya nga mga katungdanan, samtang ang iya anak nga si Jotam naggahom sa pungsod.

22Si Isaias nga propeta nga anak ni Amoz nagsulat sang iban nga mga butang nga ginhimo ni Uzias sa tion sang iya paggahom.

23Napatay si Uzias kag ginlubong sia sa lulobngan sang mga hari, pero tungod sang iya balatian wala sia ginlubong sa lulobngan sang mga hari. Ang iya anak nga si Jotam nagbulos sa iya subong hari.

← Chapter 25 Jump to: Chapter 27 →