2 Chronicles 31

Ilonggo (Maayong Balita nga Biblia (2012))

← Chapter 30 Jump to: Chapter 32 →

1Sa tapos ang piesta, ang tanan nga mga tawo sang Israel nagkadto sa tagsa ka siudad sang Juda kag ginrumpag nila ang mga haligi nga bato, ginpulod ang mga simbulo sang diosa nga si Asera, kag ginguba ang mga altar sa diin ginasimba ang mga diosdios. Amo man ang ila ginhimo sa mga kadutaan ni Juda, Benjamin, Efraim, kag Manases, kag dayon nagpauli sila tanan.

2Si Haring Ezequias nagtukod liwat sang katilingban sang mga pari kag mga Levita, nga ang tagsatagsa may iya nga mga katungdanan. Ini nagalakip sang pagdulot sang mga halad nga sinunog kag mga halad sa paghiambit, ang pagpakigbahin sa pagsimba sa Templo, kag ang pagdayaw kag pagpasalamat sa nagakalainlain nga bahin sang Templo.

3Gikan sa iya kaugalingon nga panong sang mga karnero kag mga baka, naghatag sia sing mga sapat para sa mga halad nga sinunog tagsa ka aga kag hapon, kag para sa mga dulot sa Adlaw nga Inugpahuway, sa Piesta sang Lati, kag sa iban nga mga piesta nga ginasugo sang Kasugoan sang Ginoo.

4Wala labot sini, ang hari nagsugo sa mga tawo sang Jerusalem sa pagdala sang mga dulot para sa mga pari kag mga Levita, agod nga mabug-os nila ang ila tion sa mga ginasugo sang Kasugoan sang Ginoo.

5Sa tapos mahatag ang sugo, ang mga tawo sang Israel nagdala sang ila mga dulot sang ila pinakamaayo nga trigo, bino, lana sang olivo, dugos, kag iban nga mga patubas sang uma, kag nagdala man sila sang mga ikapulo sang tanan nila nga mga pagkabutang.

6Ang tanan nga mga tawo nga nag-estar sa mga siudad sang Juda nagdala sang ikapulo sang ila kabakahan kag mga karnero, kag nagdala man sang madamo nga mga dulot nga ila ginhalad sa Ginoo nga ila Dios.

7Ang mga dulot nagsugod sa pag-abot sa ikatlo nga bulan kag nagpadayon sa pagtumpok sa masunod nga apat ka bulan.

8Sang makita ni Haring Ezequias kag sang iya mga opisyales kon daw ano kadamo ang ginhatag, gindayaw nila ang Ginoo kag gindayaw nila ang iya mga tawo nga Israelinhon.

9Ang hari naghambal sa mga pari kag mga Levita nahanungod sining mga dulot,

10kag si Azarias, ang Pinakamataas nga Pari, isa ka kaliwat ni Sadoc nagsiling sa iya, “Halin sang ang mga tawo nagsugod sa pagdala sang ila mga dulot sa Templo, may tuman na nga kalan-on, kag may madamo pa nga sobra. Naangkon naton ini tanan tungod kay ang Ginoo nagbendisyon sa iya mga tawo.”

11Sa sugo sang hari, nag-aman sila sing mga bodega sa lugar nga sakop sang Templo,

12kag ginbutang sa sini ang mga dulot kag mga ikapulo agod indi maano. Gintugyanan nila si Conanias nga isa ka Levita sa pagbantay sini kag ginhimo ang iya utod nga si Simei nga iya kabulig.

13Napulo ka mga Levita ang gintugyanan sa pag-obra sa idalom nila: sila amo sanday Jehiel, Azazias, Nahat, Asael, Jerimot, Jozabad, Eliel, Ismaquias, Mahat kag Benaya. Ini tanan ginhimo sa idalom sang awtoridad ni Haring Ezequias kag ni Azarias nga Pinakamataas nga Pari.

14Si Kore nga anak ni Imna, nga isa ka Levita nga amo ang pangulo nga gwardya sa Nasidlangan nga Pwerta sang Templo, amo ang gintugyanan sang pagbaton sang mga dulot nga ginahatag sa Ginoo kag sa pagpanagtag sini.

15Sa iban nga mga siudad sa diin nagaestar ang mga pari, ginabuligan sia sang mga Levita nga amo sanday Eden, Miniamin, Jesua, Semaya, Amarias, kag si Secanias. Ginapanagtag nila ang pagkaon sing pareho sa ila kapareho nga mga Levita suno sa ila mga katungdanan,

16kag indi paagi sa mga kabarangayan. Ginahatagan nila sing bahin ang tanan nga mga lalaki nga nagaedad sing traynta ka tuig paibabaw nga may katungdanan adlaw-adlaw sa Templo suno sa ila mga palangakuan.

17Ang mga pari ginhatagan sing mga katungdanan suno sa mga kabarangayan, kag ang mga Levita nga nagaedad sing baynte ka tuig paibabaw ginhatagan sing mga katungdanan suno sa ila mga grupo.

18Ginlista sila tanan upod ang ila mga asawa, mga kabataan, kag ang iban nga yara sa idalom sang ila pagtatap, tungod kay ginsugo sila sa paghanda sa paghimo sang ila balaan nga mga katungdanan sa bisan ano nga tion.

19Sa mga pari nga nagaestar sa mga siudad nga ginhatag sa mga kaliwat ni Aaron, ukon sa mga duta nga palahalban nga iya sining mga siudad, may mga tawo nga gintugyanan sa pagpanagtag sang pagkaon sa tanan nga mga lalaki sa panimalay sang mga pari kag sa tagsa nga yara sa listahan sang mga kabarangayan sang Levita.

20Sa bug-os nga Juda, si Haring Ezequias naghimo sing matarong kag kahalamut-an sa Ginoo nga iya Dios.

21Nagmadinalag-on sia tungod kay sa tanan nga iya ginahimo para sa Templo, ukon may kaangtanan sa Kasugoan, ginhimo niya ini sa bug-os nga katutom kag paghigugma sa iya Dios.

← Chapter 30 Jump to: Chapter 32 →

Recommended Reading

Commentary 2 Chronicles Commentaries → Devotional 2 Chronicles Devotional Guide → Get This Bible 2012 Study Bible →