2 Chronicles 32

Ilonggo (Maayong Balita nga Biblia (2012))

← Chapter 31 Jump to: Chapter 33 →

1Sa tapos sining mga hitabo, nga si Haring Ezequias nag-alagad sing matutom sa Ginoo, si Senaquerib, ang hari sang Asiria naggubat sang Juda. Ginkibon niya ang napamakuran nga mga siudad, kag nagmando sa iya mga hangaway sa pagbungkal sang pader agod makasulod sila.

2Sang makita ni Ezequias nga si Senaquerib may tuyo sa pagsalakay man sa Jerusalem,

3sia kag ang iya mga opisyales nagpamat-od sa pagsira sang ginhalinan sang tubig sa gwa sang siudad agod nga ang mga Asiriahanon wala sing kuhaan sing tubig kon makalambot sila malapit sa Jerusalem. Ang mga opisyal nagpangulo sang madamo nga mga tawo paggwa kag sa pagtampok sang tanan nga tuboran, agod nga wala na sing tubig nga maggwa sa sini.

5Ang hari nagpalig-on sang mga pamakod sang siudad. Ginpakaayo niya ang pader, nagpatindog sing mga tore sa sini, kag nagpatindog sang isa ka pader sa gwa. Dugang pa sini ginpakaayo niya ang mga pamakod nga ginpatindog sa duta nga gintampok sa nasidlangan nga kilid sang daan nga bahin sang Jerusalem. Nagpahimo man sia sing madamo nga mga bangkaw kag mga taming.

6Gintugyan sang hari ang tanan nga lalaki sa siudad sa idalom sang pagmando sang mga opisyales sang mga hangaway, kag ginpatipon sila sa plasa sa pwerta sang siudad. Ginsingganan niya sila,

7“Magpakabakod kamo kag magsalig, kag indi magkahadlok sa hari sang Asiria ukon sa mga hangaway nga iya ginapangulohan. Ang nagaapin sa aton mas gamhanan pa sang sa nagaapin sa iya.

8Ang iya gahom tawhanon, pero ang nagabulig sa aton amo ang Ginoo nga aton Dios kag magapakig-away para sa aton.” Ang mga tawo nagapakaisog tungod sining ginhambal sang ila hari.

9Sang ulihi, samtang si Senaquerib kag ang iya mga hangaway didto pa sa Lakis, nagpadala sia sing mensahe kay Ezequias kag sa mga tawo sang Juda nga upod sa iya sa Jerusalem:

10“Ako, si Senaquerib, hari sang Asiria, nagapamangkot sa inyo kon ano ang ginasaligan ninyo sa pagpabilin sa Jerusalem nga ginakibon.

11Si Ezequias nagasiling sa inyo nga ang Ginoo nga inyo Dios magaluwas sa inyo sa amon gahom, pero ginadayaan niya kamo, kag pabay-an niya kamo nga magakalamatay sa gutom kag kauhaw.

12Sia amo ang naglaglag sang mga altar kag sang mga lugar sa diin ginasimba ang Ginoo kag dayon nagsiling sia sa mga tawo sang Juda kag Jerusalem sa pagsimba kag sa pagsunog sang insyenso sa isa lamang ka altar.

13Wala bala kamo makahibalo sang akon ginhimo kag sang akon mga katigulangan sa iban nga mga pungsod? Naluwas bala sang mga dios sang iban nga mga pungsod ang ila mga tawo gikan sa hari sang Asiria?

14San-o bala ginluwas sang mga dios sadto nga mga pungsod ang ila pungsod gikan sa amon? Karon ngaa bala nga nakahunahuna kamo nga ang inyo dios makaluwas sa inyo?

15Karon mag-andam kamo nga indi pagpatalangon ukon dayaan ni Ezequias. Indi kamo magpati sa iya! Wala pa gid sang dios sang bisan ano nga pungsod nga nakaluwas sa iya mga tawo gikan sa hari sang Asiria. Gani pat-od gid nga ining inyo dios indi makaluwas sa inyo!”

16Ang mga opisyales sang Asiria naghambal sang dugang pa gid nga mga pagpasipala batok sa Ginoo nga Dios kag kay Ezequias, ang alagad sang Ginoo.

17Ang hari nagsulat sang pagpakanubo sa Ginoo, ang Dios sang Israel. Nagasiling ini, “Ang mga dios sang mga kapungsoran wala makaluwas sang ila mga tawo gikan sa akon gahom, kag bisan pa ang dios ni Ezequias indi makaluwas sang iya mga tawo sa akon.”

18Ginsinggit ini sang mga opisyales sa Hebreo agod kulbaan kag luyahan ang mga tawo sang Jerusalem nga yadto sa pader sang siudad, agod mas mahapos ang pag-agaw sang siudad.

19Naghambal sila nahanungod sang Dios sang Jerusalem pareho sang paghambal nila nahanungod sang mga dios sang iban nga mga tawo, mga diosdios nga nahimo lamang sang mga kamot sang tawo.

20Dayon si Haring Ezequias kag si Isaias nga propeta nga anak ni Amoz nagpangamuyo sa Dios kag nagpangayo sang bulig sa iya.

21Ang Ginoo nagpadala sang isa ka anghel nga nagpamatay sang maisog nga mga soldado kag mga opisyales sang mga hangaway sang Asiria. Gani ang hari nagbalik sa Asiria nga nahuy-an. Isa ka adlaw sang didto sia sa templo sang iya dios, ang iban sang iya mga anak nga lalaki nagpatay sa iya paagi sa ila mga espada.

22Sa sini nga paagi, ang Ginoo nagluwas kay Haring Ezequias kag sa mga tawo sang Jerusalem gikan sa gahom ni Senaquerib, ang hari sang Asiria, kag gikan man sa iban nila nga mga kaaway. Gintugotan niya ang mga tawo sa pagkabuhi nga may kalinong upod sa bug-os nga mga pungsod sa ila palibot.

23Madamo nga mga tawo ang nagkadto sa Jerusalem, nga nagadala sang mga dulot sa Ginoo kag mga regalo kay Ezequias, gani sugod sadto ang tanan nga mga kapungsoran nagapasidungog kay Ezequias.

24Sa sini nga tion, si Haring Ezequias nagmasakit kag diutayan lang mapatay. Nagpangamuyo sia, kag ang Ginoo naghatag sa iya sang tanda nga magaayo sia.

25Pero si Ezequias nagbugalon kag indi sia magpasalamat sang ginhimo sang Ginoo sa iya, gani ang Juda kag ang Jerusalem nag-antos tungod sini.

26Pero sang ulihi, si Ezequias kag ang mga tawo sang Jerusalem nagpaubos sang ila kaugalingon, gani ang Ginoo wala magsilot sang mga tawo tubtob sa tapos mapatay si Ezequias.

27Si Haring Ezequias nagmanggaranon gid kaayo, kag ang tagsatagsa nagpasidungog sa iya. May mga bodega sia nga ginpatindog para sa iya bulawan, pilak, malahalon nga mga bato, mga pahamot, mga taming, kag iban nga malahalon nga mga butang.

28Wala labot sini, nagpatindog sia sing mga bodega nga sulodlan sang iya trigo, bino, kag lana sang olivo; mga toril para sa iya mga baka; kag mga tangkal para sa iya mga karnero.

29Wala labot sini tanan, ang Dios naghatag sa iya sang mga karnero, kag mga baka kag iban nga mga manggad nga tama kadamo nga sa bagay nga nagpatindog sia sing madamo nga mga siudad.

30Si Haring Ezequias amo ang nagpunong sang ginailigan sang Tuboran sang Gihon kag ginpalikaw ang pag-ilig sang tubig paagi sa isa ka alagyan pakadto sa sulod sang mga pader sang Jerusalem. Si Ezequias nagmadinalag-on sa tanan nga butang nga iya ginhimo.

31Bisan sang pag-abot sang mga embahador halin sa Babilonia sa pag-usisa nahanungod sang pinasahi nga natabo sa duta, ang Dios nagtugot kay Ezequias sa paghimo sang iya kaugalingon nga luyag agod mahibaluan kon ano ang yara sa iya tagipusoon.

32Ang tanan nga mga butang nga ginhimo ni Haring Ezequias, kag ang iya katutom sa Ginoo nasulat sa Palanan-awon ni Propeta Isaias nga Anak ni Amoz kag sa Maragtas sang mga Hari sang Juda kag Israel.

33Si Ezequias napatay kag ginlubong sa naibabaw nga bahin sang lulobngan sang mga hari. Ang tanan nga mga pumoluyo sang Juda kag Jerusalem nagpasidungog sa iya sang pagkapatay niya. Ang iya anak nga si Manases nagbulos sa iya subong hari.

← Chapter 31 Jump to: Chapter 33 →