2 Chronicles 21

Ilonggo (Maayong Balita nga Biblia (2012))

← Chapter 20 Jump to: Chapter 22 →

1Si Josafat napatay kag ginlubong sa mga lulobngan sang mga hari sa Siudad ni David, kag ang iya anak nga si Jehoram nagbulos sa iya subong hari.

2Si Jehoram nga anak ni Haring Josafat may anom ka mga utod nga lalaki nga amo sanday: Azarias, Jeiel, Zacarias, Azariahu, Micael, kag Sefatias. Sila tanan mga anak ni Haring Josafat sang Juda.

3Ang ila amay naghatag sa ila sing madamo nga bulawan, pilak, kag iban nga malahalon nga mga pagkabutang, kag ang tagsatagsa sa ila ginhimo nga pangulo sang isa sang napamakuran nga mga siudad sang Juda. Pero tungod kay si Jehoram amo ang magulang, si Josafat naghimo sa iya nga amo ang magabulos sa iya subong hari.

4Sang malig-on na ang paggahom ni Jehoram sang iya ginharian, ginpapatay niya ang iya tanan nga mga utod nga lalaki, kag amo man ang iban nga mga opisyales nga Israelinhon.

5Nanginhari si Jehoram sang nagaedad sia sing trayntay dos ka tuig kag naggahom sia sa Jerusalem sa sulod sang walo ka tuig.

6Ginsunod niya ang malaut nga ginhimo ni Haring Acab kag sang iban nga mga hari sang Israel, tungod kay ginpangasawa niya ang isa sang mga anak ni Acab. Nagpakasala sia batok sa Ginoo,

7pero ang Ginoo indi luyag maglaglag sang ginharian ni David, tungod kay naghimo sia sing kasugtanan kay David kag nagsaad nga ang iya mga kaliwat magapadayon sa paggahom.

8Sa panahon sang paggahom ni Jehoram, ang Edom nagrebelde batok sa Juda kag naghimo sang ila kaugalingon nga hari.

9Gani si Jehoram kag ang iya mga opisyales naggwa nga nagasakay sa mga karwahi sa pagsalakay sang Edom. Didto ang mga soldado nga Edomnon nagkibon sa ila pero sang gab-i nakapalagyo sila.

10Halin sadto ang Edom nanginhilway sa Juda. Sa amo man nga panahon ang siudad sang Libna nagrebelde man, tungod kay si Jehoram nagbiya sa Ginoo, ang Dios sang iya mga katigulangan.

11Nagpatindog pa gani sia sang mga lugar sa diin ginasimba ang mga diosdios sa kabakuloran sang Juda kag nagdala sang mga tawo sang Juda kag sang Jerusalem sa pagpakasala batok sa Ginoo.

12Si Elias nga propeta nagpadala sang sulat kay Jehoram nga nagasiling: “Ang Ginoo, ang Dios sang isa sang imo mga katigulangan nga si David, nagakondenar sa imo, tungod kay wala mo ginsunod ang ginhimo sang imo amay nga si Haring Josafat ukon sang imo lolo nga si Haring Asa sang Juda.

13Sa baylo ginsunod mo ang ginhimo sang mga hari sang Israel kag nagdala sa mga pumoluyo sang Juda kag Jerusalem sa pagtalikod sa Dios, subong sang ginhimo ni Acab kag sang mga nagbulos sa iya sa pagdala sang Israel sa pagtalikod sa Dios. Ginpamatay mo man ang imo mga utod nga lalaki, nga mas maayo pa nga mga tawo sang sa imo.

14Tungod sini ang Ginoo magasilot sang tama sa imo mga tawo, sa imo mga kaanakan, kag sa imo mga asawa, kag laglagon ang imo mga pagkabutang.

15Ikaw mismo magaangkon sang masakit sa tinai kag magalala ini adlaw-adlaw.”

16May mga Filistinhon kag mga Arabo nga nag-estar malapit sa ginaestaran sang mga taga-Etiopia sa baybayon. Ginhimo sang Ginoo nga ini nga mga tawo mag-away batok kay Jehoram.

17Ginsalakay nila ang Juda, ginkawatan ang palasyo, kag gindala ang tanan nga mga asawa kag mga kabataan sang hari subong bihag, luas kay Ocozias, ang iya kamanghuran nga anak.

18Dayon tapos sini tanan, ang Ginoo nagpadala sa hari sing balatian sa tinai.

19Sa sulod sang duha ka tuig naglala pa gid ini, tubtob sang ulihi ang hari napatay nga nagaantos. Ang iya mga sakop wala magdabok sang kalayo sa paglalaw sa iya subong sang ginhimo sa iya mga katigulangan.

20Nanginhari si Jehoram sang nagaedad sia sing trayntay dos ka tuig kag naggahom sia sa Jerusalem sa sulod sang walo ka tuig. Wala sing may nagkasubo sang napatay sia. Ginlubong nila sia sa Siudad ni David, pero indi sa lulobngan sang mga hari.

← Chapter 20 Jump to: Chapter 22 →

Recommended Reading

Commentary 2 Chronicles Commentaries → Devotional 2 Chronicles Devotional Guide → Get This Bible 2012 Study Bible →