2 Chronicles 34

Ilonggo (Maayong Balita nga Biblia (2012))

← Chapter 33 Jump to: Chapter 35 →

1Si Josias nanginhari sang Juda sang nagaedad sia sing walo ka tuig, kag naggahom sia sa Jerusalem sa sulod sang trayntay uno ka tuig.

2Ginhimo niya ang matarong sa panulok sang Ginoo, kag nagsunod sia sa ginhimo sang isa sang iya mga katigulangan nga si Haring David, nga nagtuman sing tul-id sang tanan nga mga kasugoan sang Dios.

3Sa ikawalo nga tuig sang paghari ni Josias, samtang bataon pa gid sia, nagsugod sia sa pagsimba sa Dios sang isa sang iya mga katigulangan nga si Haring David. Makaligad ang apat ka tuig ginpangguba niya ang mga lugar sa diin ginasimba ang mga diosdios, ang mga simbulo sang diosa nga si Asera, kag ang tanan nga mga diosdios.

4Sa idalom sang iya pagdumala, ang iya mga tinawo nagpangguba sang mga altar nga ginsimbahan kay Baal kag malapit sa sini ginrumpag ang mga altar sang insyenso. Ginbukbok kaangay sang yab-ok ang mga imahen ni Asera kag ang tanan nga mga diosdios, dayon ginsabwag ang yab-ok sa mga lulobngan sang mga tawo nga naghalad sa ila.

5Ginsunog man niya ang mga tul-an sang mga pari sang mga diosdios sa mga altar sa diin sila nagsimba, kag sa sini nga paagi ginhimo niya ang Juda kag Jerusalem nga matinlo liwat.

6Ginhimo niya ang amo man nga butang sa mga siudad kag sa mga naguba nga mga lugar ni Manases, Efraim, kag Simeon, kag tubtob sa aminhan ni Neftali.

7Sa bug-os nga kadutaan sang Naaminhan nga Ginharian, ginpangguba niya ang mga altar kag ang mga simbulo sang diosa nga si Asera, ginpangdugmok ang mga diosdios tubtob nanginyab-ok, kag ginpangrumpag ang mga altar sang insyenso. Dayon nagpauli sia sa Jerusalem.

8Sa ika-18 nga tuig sang paggahom ni Haring Josias, sa tapos niya matinluan ang duta kag ang Templo paagi sa pagpauntat sa pagsimba sa mga diosdios, ginpadala niya ang tatlo ka lalaki sa pagkaayo sang Templo sang Ginoo nga Dios: sila amo sanday Safan nga anak ni Azalias, si Maasias nga gobernador sang Jerusalem, kag si Joas nga anak ni Joacaz, isa ka mataas nga opisyal.

9Ang kwarta nga gintipon sang mga gwardya nga Levita sa Templo gintugyan kay Helkias, ang Pinakamataas nga Pari. Naghalin ini nga kwarta sa mga tawo sang Efraim kag Manases kag sa nabilin sang Naaminhan nga Ginharian, kag halin sa mga tawo sang Juda, Benjamin, kag Jerusalem.

10Karon ginhatag ini nga kwarta sa tatlo ka mga tawo nga gintugyanan sa pagpakaayo sang Templo, kag ginhatag nila ini

11sa mga panday kag sa mga kantero sa pagbakal sang mga bato kag sang mga tablon nga gamiton sa pagpakaayo sang mga balay nga ginpabay-an sang mga hari sang Juda nga maguba.

12Ang mga tawo nga nag-obra masaligan gid. Ginapangulohan sila sang apat ka mga Levita: sila amo sanday Jahat kag Obadias sang kabarangayan ni Merari, kag ni Zacarias kag Mesullam sang kabarangayan ni Kohat. Ang mga Levita mga batid nga mga musikero.

13Ang iban nga mga Levita gintugyanan sa pagdala sang mga galamiton kag sa pagdumala sang mga manug-obra sa nagakalainlain nga mga bulohaton, kag ang iban nagaalagad subong mga sekretaryo ukon mga gwardya.

14Samtang ang kwarta ginakuha sa talaguan, nakita ni Helkias ang libro sang Kasugoan sang Ginoo, ang Kasugoan nga ginhatag sang Dios kay Moises.

15Ginsingganan niya si Safan, “Nakita ko ang libro sang Kasugoan diri sa Templo.” Ginhatag niya kay Safan ang libro,

16kag si Safan nagdala sini sa hari. Nagsugid sia, “Ginhimo namon ang tanan nga imo ginsugo.

17Ginkuha namon ang kwarta nga gintago sa Templo kag ginhatag sa mga manug-obra kag sa mga nagapangulo sa ila.”

18Dayon nagsiling pa gid sia, “Yari ang libro nga ginhatag ni Helkias sa akon.” Kag ginbasa niya ini sing mabaskog sa hari.

19Sang mabatian sang hari ang ginbasa sa libro, gingisi niya ang iya bayu sa kasubo.

20Ginsugo niya si Helkias, si Ahikam nga anak ni Safan, si Abdon nga anak ni Micaya, si Safan nga sekretaryo sang korte kag si Asaya nga alagad sang hari. Nagsiling sia sa ila:

21“Lakat kamo kag magpamangkot sa Ginoo para sa akon kag sa mga tawo nga nabilin pa sa Israel kag sa Juda. Usisaa ninyo ang mga ginatudlo sini nga libro. Ang Ginoo naakig sa aton, tungod kay ang aton mga katigulangan wala magtuman sang pulong sang Ginoo kag wala naghimo sang ginasiling sini nga libro nga dapat himuon.”

22Sa sugo sang hari, si Helkias kag ang iban naglakat sa pagpamangkot sa isa ka babayi nga ginhingalanan kay Hulda, isa ka propeta nga nag-estar sa bag-o nga bahin sang Jerusalem. Ang iya nga bana amo si Salum nga anak ni Tikva kag apo ni Hasra, nga gintugyanan sang malaba nga mga bayu sa Templo. Ginsaysay nila sa iya kon ano ang natabo,

23kag ginsingganan niya sila sa pagbalik sa hari kag isugid sa iya

24ang masunod nga mensahe gikan sa Ginoo: “Akon silutan ang Jerusalem kag tanan niya nga mga pumoluyo suno sa mga pagpakamalaut nga ginsulat sa libro nga ginbasa sa hari.

25Ginsikway nila ako kag nagdulot sang mga halad sa iban nga mga dios, kag ginpaakig nila ako tungod sang tanan nila nga ginhimo. Ang akon kaakig nag-ibwal batok sa Jerusalem, kag indi gid ini mag-ugdaw.

26Nahanungod sa hari mismo, amo ini ang ginasiling ko, ang Ginoo nga Dios sang Israel: Nagpamati ka sa ginsulat sa libro,

27kag naghinulsol ka kag nagpaubos sang imo kaugalingon sa akon atubang, nga nagisi sang imo mga bayu kag naghibi, sang imo mabatian ang akon tuyo sa pagsilot sang Jerusalem kag sang iya mga pumoluyo. Ginpamatian ko ang imo pangamuyo,

28kag samtang buhi pa ikaw indi ko pagsilutan ang Jerusalem. Tugotan ko nga mapatay ka sa paghidait.” Ang mga tawo nagbalik sa kay Haring Josias nga dala ini nga mensahe.

29Ginpatawag ni Haring Josias ang tanan nga mga pangulo sang Juda kag Jerusalem,

30kag tingob sila nga nagkadto sa Templo, nga ginaupdan sang mga pari kag mga Levita kag sang tanan nga nabilin sang mga tawo sa Jerusalem, imol kag manggaranon. Sa atubang nila tanan, ginbasa sang hari sing mabaskog ang bug-os nga libro sang kasugtanan, nga nakita sa Templo.

31Nagtindog sia sa tupad sang haligi sang hari kag naghimo sia sing kasugtanan sa Ginoo, sa pagtuman sa iya, sa paghimo sang iya mga kasugoan kag mga sugo sa bug-os niya nga tagipusoon kag kalag, kag sa pagbutang sa buhat sang ginasiling sa kasugtanan, suno sa nasulat sa libro.

32Ginpasumpa niya ang mga tawo sang Benjamin, kag ang tagsatagsa nga yadto didto sa Jerusalem sa pagtuman sang kasugtanan. Gani ang mga tawo sang Jerusalem nagtuman sa ginasiling sang kasugtanan nga ila ginhimo sa Dios sang ila mga katigulangan.

33Ginlaglag ni Haring Josias ang tanan nga makangilil-ad nga mga diosdios nga yara sa kadutaan nga iya sang mga tawo sang Israel, kag samtang nagakabuhi sia, ginpaalagad niya ang mga tawo sa Ginoo, ang Dios sang ila mga katigulangan.

← Chapter 33 Jump to: Chapter 35 →

Recommended Reading

Commentary 2 Chronicles Commentaries → Devotional 2 Chronicles Devotional Guide → Get This Bible 2012 Study Bible →