2 Chronicles 29

Ilonggo (Maayong Balita nga Biblia (2012))

← Chapter 28 Jump to: Chapter 30 →

1Si Ezequias nanginhari sang Juda sang nagaedad sia sing baynte singko ka tuig kag naggahom sia sa Jerusalem sa sulod sang baynte nwebe ka tuig. Ang iya iloy amo si Abia nga anak ni Zacarias.

2Naghimo sia sing matarong sa panulok sang Ginoo, nga nagasunod sa ginhimo sang isa sang iya mga katigulangan nga si David.

3Sa nahauna nga bulan sang tuig sa tapos si Ezequias nanginhari, ginpaabrihan niya liwat ang mga pwerta sang Templo kag ginpakaayo.

4Gintipon niya ang mga pari kag ang mga Levita sa nasidlangan nga pasiyuhan sang Templo,

5kag naghambal sia sa ila didto. Nagsiling sia, “Kamo nga mga Levita dapat magpakabalaan sang inyo kaugalingon kag pakabalaana ninyo ang Templo sang Ginoo, ang Dios sang inyo mga katigulangan. Kuhaa ninyo sa Templo ang tanan nga butang nga nagadagta sini.

6Ang aton mga katigulangan naglapas sa Ginoo nga aton Dios kag naghimo sang wala niya maluyagi. Ginsikway nila sia kag gintalikdan nila ang lugar sa diin sia ginasimba.

7Ginsirahan nila ang mga pwertahan sang Templo, ginpatay ang mga suga, kag wala magsunog sang mga insyenso ukon magdulot sang mga halad nga sinunog sa Templo sang Dios sang Israel.

8Tungod sini, ang Ginoo nagkaakig sa Juda kag Jerusalem, kag ang iya ginhimo sa ila nagpakugmat kag nagpahadlok sang tagsatagsa. Nahibal-an gid ninyo ini sing maayo.

9Ang aton mga ginikanan nagkalamatay sa inaway, kag ang aton mga asawa kag mga kabataan gindala subong mga bihag.

10“Karon nagpamat-od ako sa paghimo sing kasugtanan sa Ginoo, ang Dios sang Israel, agod nga indi na sia magkaakig sa aton.

11Mga anak ko, indi na kamo mag-usik sang tion. Kamo ang ginpili sang Ginoo sa pagsunog sang insyenso sa iya kag sa pagdala sa mga tawo sa pagsimba sa iya.”

12Ang masunod nga mga Levita yadto didto: Gikan sa kabarangayan ni Kohat, si Mahat nga anak ni Amasai kag si Joel nga anak ni Azarias Gikan sa kabarangayan ni Merari, si Kis nga anak ni Abdi kag si Azarias nga anak ni Jehalelel Gikan sa kabarangayan ni Gerson, si Joah nga anak ni Zimna kag si Eden nga anak ni Joah Gikan sa kabarangayan ni Elisafan, si Simri kag si Jeuel Gikan sa kabarangayan ni Asaf, si Zacarias kag si Matanias Gikan sa kabarangayan ni Heman, si Jehuel kag si Semei Gikan sa kabarangayan ni Jeduton, si Semaya kag si Uziel.

15Gintipon nila ang ila kapareho nga mga Levita kag nagpaninlo sila tanan sang ila kaugalingon. Dayon suno sa ginsugo sang hari sa ila nga himuon, gintinluan nila ang Templo suno sa kasugoan sang Ginoo.

16Ang mga pari nagsulod sa Templo sa pagpakabalaan sini, kag ginpagwa nila sa pasiyuhan sang Templo ang tanan nga di-matinlo. Halin didto, ang mga Levita nagdala sini tanan pagwa sa siudad pakadto sa Kapatagan sang Kidron.

17Nagsugod sila sa pag-obra sa nahauna nga adlaw sang nahauna nga bulan, kag sa ikawalo nga adlaw gintapos nila ini tanan, lakip ang kwarto nga alagyan pakadto sa Templo. Dayon nag-obra sila sa masunod nga walo ka adlaw, tubtob natapos nila ini sa ika-16 nga adlaw sang bulan, nga nagaaman sang Templo para sa pagsimba.

18Ang mga Levita nagsugid sa kay Haring Ezequias sining masunod: “Natapos na namon ang mga tulomanon sa pagpakabalaan sang bug-os nga Templo, lakip ang altar para sa mga halad nga sinunog kag ang tanan nga mga gamit sini, kag ang lamisa para sa balaan nga tinapay kag ang tanan nga mga gamit sini.

19Gindala man namon pabalik ang tanan nga mga gamit nga ginkuha ni Haring Acaz sang mga tinuig nga wala sia nagmatutom sa Ginoo, kag ginhalad namon ini liwat. Yari ini tanan sa atubangan sang altar sang Ginoo.”

20Sa gilayon, si Haring Ezequias nagtipon sang pangulo nga mga tawo sang siudad, kag upod sa ila naglakat sia sa Templo.

21Nagdala sila sang pito ka toro nga baka, pito ka karnero, pito ka kordero, kag pito ka kanding, subong halad sa pagkuha sang mga sala sang panimalay sang hari, kag sang mga tawo sang Juda, kag sa pagpakabalaan sang Templo. Ang hari nagsugo sa mga pari nga mga kaliwat ni Aaron sa paghalad sang mga sapat subong mga dulot sa altar.

22Ang mga pari una nga nag-ihaw sang mga baka, dayon sang mga karnero, kag dayon sang mga kordero, kag ginwisik ang dugo sang tagsa ka halad sa altar.

23Sang ulihi gindala nila ang mga kanding sa hari kag sa iban nga mga sumilimba, nga nagtungtong sang ila mga kamot sa sini.

24Dayon ang mga pari nag-ihaw sang mga kanding kag gin-ula ang dugo sini sa altar subong halad sa pagkuha sang sala sang tanan nga mga tawo, kay ang hari nagmando nga ang mga halad nga sinunog kag ang mga halad sa sala himuon para sa tanan nga mga Israelinhon.

25Ang hari nagsunod sang mga gintudlo sang Ginoo sa kay Haring David paagi kay Gad nga palamangkutan sang hari kag paagi kay Natan nga propeta kag iya ginbutang sa Templo ang mga Levita nga may mga arpa kag mga platilyos.

26Nagtindog sila didto nga may mga instrumento kaangay sadtong gingamit ni Haring David, kag ang mga pari nagtindog man didto nga may mga trumpeta.

27Si Ezequias nagsugo nga ang halad nga sinunog idulot, kag sang nagsugod ang paghalad, ang mga tawo nagkanta sang pagdayaw sa Ginoo, kag ang mga musikero nagsugod sa pagtukar sang mga trumpeta kag sang iban nga mga instrumento.

28Ang tagsatagsa nga yadto didto nagbuylog sa pagsimba, kag ang pag-amba kag ang mga pagtinukar nagpadayon tubtob ang tanan nga mga halad nasunog.

29Dayon ang hari kag ang tanan nga mga tawo nagluhod kag nagsimba sa Dios.

30Si Haring Ezequias kag ang mga pangulo sang pungsod nagsugo sa mga Levita sa pagkanta sa Ginoo sang mga ambahanon sang pagdayaw nga ginsulat ni David kag ni Asaf nga propeta. Gani nagkanta sila sa daku nga kalipay samtang nagaluhod kag nagsimba sa Dios.

31Si Ezequias nagsiling sa mga tawo, “Karon nga matinlo na kamo, magdala kamo sing mga halad subong mga dulot sa pagpasalamat sa Ginoo.” Nagtuman sila, kag ang iban sa ila kinabubot-on nga nagdala man sang mga sapat nga idulot subong mga halad nga sinunog.

32Nagdala sila sing setenta ka toro nga mga baka, 100 ka mga karnero, kag 200 ka mga kordero subong mga halad nga sinunog para sa Ginoo;

33nagdala man sila sang 600 ka toro nga mga baka kag 3,000 ka mga karnero subong mga halad para nga kaunon sang mga tawo.

34Tungod kay kulang ang mga pari nga magaihaw sini tanan nga mga sapat, ang mga Levita nagbulig sa ila tubtob nga matapos ang hilikuton. Sang ulihi madamo na nga mga pari ang nagpaninlo sa ila kaugalingon. Ang mga Levita mas matutom pa sang sa mga pari sa pagpaninlo sang ila kaugalingon.

35Wala labot sa mga halad nga ginsunog sing bug-os, ang mga pari may katungdanan pa sa pagsunog sang sapay nga gindulot halin sa mga halad nga ginkaon sang mga tawo, kag sa pagbubo sang bino nga gindulot upod sa mga halad nga sinunog. Gani, ang pagsimba sa Templo ginsugoran liwat.

36Si Haring Ezequias kag ang mga tawo nagkalipay tungod kay ang Dios nagbulig sa ila sa paghimo sini tanan sa labing madali.

← Chapter 28 Jump to: Chapter 30 →