2 Chronicles 33

Ilonggo (Maayong Balita nga Biblia (2012))

← Chapter 32 Jump to: Chapter 34 →

1Si Manases nanginhari sang Juda sang nagaedad sia sang dose ka tuig, kag naggahom sia sa Jerusalem sa sulod sing singkwentay singko ka tuig.

2Nagpakasala sia batok sa Ginoo, nga nagasunod sa makahuloya nga mga butang nga ginhimo sang mga pungsod nga gintabog sang Ginoo paggwa sa duta samtang ang mga Israelinhon nagapasulod.

3Ginpatindog liwat ni Manases ang mga lugar sa diin ginasimba ang mga diosdios nga ginguba sang iya amay nga si Ezequias. Nagpatindog sia sing mga altar nga ginasimbahan kay Baal, nagpahimo sang mga imahen sang diosa nga si Asera, kag nagsimba sa mga bituon.

4Nagpatindog sia sang mga altar para sa diosdios sa Templo, ang lugar nga ginsiling sang Ginoo sa diin sia dapat pagasimbahon sa walay katapusan.

5Sa duha ka pasiyuhan sang Templo nagpatindog sia sang mga altar sa pagsimba sang mga bituon.

6Ginhalad niya ang iya mga anak nga lalaki sa Kapatagan sang Hinom subong mga halad nga sinunog. Naghimo sia sang bulohaton sang babaylan kag madyikero, nagpamangkot sia sa mga manughimalad kag mga espiritista. Nagpakasala sia sing tama gid sa panulok sang Ginoo, kag ginpaakig niya ang Ginoo.

7Nagbutang sia sang imahen sa Templo, ang lugar nga ginsiling sang Dios kay David kag sa iya anak nga si Solomon: “Diri sa Jerusalem sa sini nga Templo, amo ang lugar nga akon ginpili gikan sa tanan nga kadutaan sang dose ka tribo sang Israel subong nga lugar sa diin ako pagasimbahon.

8Kag kon ang mga tawo sang Israel magatuman sang tanan ko nga mga sugo, kag maghimo sang bug-os nga Kasugoan nga ginhatag sa ila ni Moises nga akon alagad, dayon indi ko sila pagtugotan nga tabugon halin sa duta nga akon ginhatag sa ila mga katigulangan.”

9Gindala ni Manases ang mga tawo sang Juda sa paghimo sing mas dalagku pa gid nga mga sala sang sa ginhimo sang mga pungsod nga gintabog sang Ginoo paggwa samtang ang mga Israelinhon nagapasulod sa duta.

10Bisan nga ang Ginoo nagpaandam kay Manases kag sa iya mga tawo, wala sila magpamati.

11Gani ang Ginoo nagtugot sa mga pangulo sang hangaway sang Asiria sa paggubat sang Juda. Gindakop nila si Manases paagi sa mga kaw-it kag ginkadenahan sia, kag gindala sa Babilonia.

12Sa iya pag-antos nagpaubos sia, nagdangop sa Ginoo nga iya Dios, kag nagpakitluoy nga buligan sia.

13Ginbaton sang Dios ang pangamuyo ni Manases kag ginsabat ini paagi sa pagpabalik sa iya sa Jerusalem kag ginpagahom sia liwat. Dayon si Manases nagkilala nga ang Ginoo amo ang Dios.

14Sa tapos sini, ginpataas ni Manases ang naggwa nga pader sa nasidlangan nga kilid sang Siudad ni David, halin sa pwerta sang kapatagan malapit sa Tuboran sang Gihon sa naaminhan pakadto sa Pwerta sang Isda kag ang lugar sang siudad nga ginatawag Ofel. Ginbutang man niya ang isa ka opisyal nga hangaway nga nagapangulo sang mga soldado sa tagsa ka napamakuran nga mga siudad sang Juda.

15Ginkuha niya sa Templo ang dumoluong nga mga dios kag ang imahen nga iya ginbutang didto, kag ang mga altar sang diosdios nga didto sa bakulod sa diin nagatindog ang Templo kag sa iban nga mga lugar sang Jerusalem; gindala niya ini tanan nga butang sa gwa sang siudad kag ginhaboy ini.

16Ginpakaayo man niya ang altar sa diin ang Ginoo ginasimba, kag sa sini nagdulot sia sing mga halad sa paghiambit kag mga halad sa pagpasalamat. Ginsugo niya ang tanan nga mga tawo sang Juda sa pagsimba sa Ginoo, ang Dios sang Israel.

17Bisan ang mga tawo nagpadayon sa pagdulot sing mga halad sa iban nga mga lugar nga ginasimbahan, ginadulot lamang nila ini sa Ginoo.

18Ang tanan nga mga butang nga ginhimo ni Manases, ang pangamuyo nga iya ginhimo sa iya Dios, kag ang mga mensahe sang mga propeta nga ginhambal sa iya sa ngalan sang Ginoo, ang Dios sang Israel, nasulat tanan sa Maragtas sang mga Hari sang Israel.

19Ang pangamuyo sang hari kag ang sabat sang Dios sa sini nga pangamuyo, kag ang iya mga sala nga ginhimo sa wala pa sia makahinulsol—ang malaut nga iya ginhimo, ang mga lugar nga ginasimbahan sang mga diosdios kag ang mga simbulo sang diosa nga si Asera nga iya ginhimo, kag ang mga diosdios nga iya ginsimba—nasulat tanan sa Maragtas sang mga Propeta.

20Si Manases napatay kag ginlubong sa palasyo kag ang iya anak nga si Amon nagbulos sa iya subong hari.

21Si Amon nanginhari sang Juda sang nagaedad sia sang baynte-dos ka tuig kag naggahom sia sa Jerusalem sa sulod sang duha ka tuig.

22Subong sang iya amay nga si Manases, nagpakasala sia batok sa Ginoo, kag nagsimba sia sa mga diosdios nga ginsimba sang iya amay.

23Pero indi sia subong sang iya amay nga nagpaubos sang iya kaugalingon kag nagbalik sa Ginoo; nagpakasala sia sing sobra pa gani sang sa iya amay.

24Ang mga opisyales ni Amon nagplano batok sa iya kag ginpatay sia sa palasyo.

25Pero ang mga tawo sang Juda nagpatay man sang mga nagpatay kay Amon kag naghimo nga hari kay Josias nga iya anak.

← Chapter 32 Jump to: Chapter 34 →