2 Chronicles 6

Ilonggo (Maayong Balita nga Biblia (2012))

← Chapter 5 Jump to: Chapter 7 →

1Dayon si Haring Solomon nagpangamuyo, “O Ginoo, nagpili ka sa pag-estar sa mga panganod kag sa madamol nga mga gal-om.

2Karon nagpatindog ako sang isa ka matahom nga templo para sa imo, isa ka lugar nga pagaestaran mo sa wala sing katapusan.”

3Ang tanan nga mga tawo sang Israel nagatindog didto. Ang hari nagliso sa pag-atubang sa mga tawo kag nagpangayo nga bendisyunan sila sang Dios.

4Nagsiling sia, “Dayawon ang Ginoo, ang Dios sang Israel! Gintuman niya ang saad nga ginhimo niya sa akon amay nga si David sang pagsiling niya,

5‘Halin sa tion nga ginpagwa ko ang akon mga tawo sa Ehipto tubtob karon, wala ako magpili sang bisan ano nga siudad sa duta sang Israel subong isa ka lugar nga patindugan sang templo sa diin ako simbahon, kag wala ako magpili sa bisan kay sin-o sa pagpangulo sang akon mga katawhan nga Israelinhon.

6Pero karon ginpili ko ang Jerusalem subong isa ka lugar sa diin ako simbahon, kag ikaw David, ang magagahom sa akon mga tawo.’”

7Kag si Solomon nagpadayon, “Ang akon amay nagplano sa pagpatindog sang templo sa diin pagasimbahon ang Ginoo, ang Dios sang Israel,

8pero ang Ginoo nagsiling sa iya, ‘Husto ang luyag mo sa pagpatindog sang templo para sa akon,

9pero indi ikaw ang makapatindog sini. Ang imo anak nga lalaki, ang imo kaugalingon nga anak amo ang magapatindog sang akon templo.’

10“Karon ang Ginoo nagtuman sang iya saad: ginbuslan ko ang akon amay subong hari sang Israel, kag nagpatindog ako sang isa ka templo sa diin pagasimbahon ang Ginoo nga Dios sang Israel.

11Ginbutang ko sa Templo ang Kaban sang Kasugtanan nga nasudlan sang mga lapida nga bato sang kasugtanan nga ginhimo sang Ginoo upod sa mga tawo sang Israel.”

12Dayon, sa atubang sang mga tawo, nagkadto kag nagtindog si Solomon sa atubangan sang altar kag nagbayaw sang iya mga kamot sa pagpangamuyo.

13Naghimo si Solomon sang plataporma nga bronsi kag ginbutang ini sa tunga sang pasiyuhan. Walo ka tapak ini nga kwadrado kag lima ka tapak ang kataason. Nagsaka sia sa plataporma, nagluhod sa diin ang tanan makakita sa iya, kag ginbayaw ang iya mga kamot.

14Nagpangamuyo sia, “O Ginoo, ang Dios sang Israel, sa bug-os nga langit kag duta wala sing dios kaangay sa imo. Ginatuman mo ang imo kasugtanan upod sa imo mga tawo kag ginpakita mo ang imo gugma sa ila, kon sila magakabuhi nga nagatuman sa imo sa ila bug-os nga tagipusoon.

15Gintuman mo ang imo saad sa akon amay nga si David; karon ang imo tagsa ka pulong natuman.

16Karon, O Ginoo ang Dios sang Israel, tumana ang iban nga mga saad mo sa akon amay, sang pagsiling mo sa iya nga may isa sang iya mga kaliwat nga magagahom sa gihapon subong hari sang Israel, kon sila magtuman gid sang imo Kasugoan subong sang iya pagtuman.

17Gani karon, O Ginoo ang Dios sang Israel, kabay ang tagsa ka butang nga imo ginsaad sa imo alagad nga si David matuman.

18“Pero matuod gid bala nga ikaw, O Dios, makaestar sa duta upod sa mga tawo? Bisan gani ang bug-os nga langit indi pa makaigo sa imo, gani paano ikaw makaigo sa sini nga Templo nga akon ginpatindog para sa imo?

19O Ginoo nga akon Dios, ako imo alagad. Pamatii ang akon pangamuyo kag sabta ang akon mga pangabay sa imo.

20Bantayi ini nga Templo sa adlaw kag gab-i. Nagsaad ikaw nga diri ikaw pagasimbahon, gani pamatii ako kon mag-atubang ako sa sini nga Templo kag magpangamuyo.

21Pamatii ang akon mga pangamuyo kag ang mga pangamuyo sang imo mga katawhan nga Israelinhon kon sila mag-atubang sa sini nga lugar kag magpangamuyo. Gikan sa imo ilistaran sa langit, pamatii kag patawara kami.

22“Kon ang isa ka tawo makasala batok sa isa ka tawo kag dalhon sa imo altar sa sini nga Templo sa pagsumpa nga wala sia sing sala,

23O Ginoo, pamati ka sa langit kag hukmi ang imo mga alagad. Siluti ang may sala nga nagakabagay sa iya, kag hilwaya ang wala sing sala.

24“Kon ang imo mga katawhan nga Israelinhon malutos sang ila mga kaaway tungod kay nagpakasala sila batok sa imo, kag sang ulihi magdangop sila sa imo kag magkadto sa sini nga Templo nga nagapangayo sing mapainuboson nga patawaron mo sila,

25pamatii sila gikan sa langit. Patawara ang mga sala sang imo mga tawo, kag dalha sila pabalik sa duta nga imo ginhatag sa ila kag sa ila mga katigulangan.

26“Kon indi ka magpadala sang ulan tungod kay ang imo mga tawo nagpakasala batok sa imo, kag sang ulihi maghinulsol sila kag mag-atubang sa sini nga Templo nga nagapangamuyo sing mapainuboson sa imo,

27O Ginoo, pamatii gikan sa langit kag patawara ang mga sala sang imo mga alagad, ang mga tawo sang Israel. Tudloi sila sa paghimo sing matarong. Dayon, O Ginoo, padalhi sing ulan ining imo duta, nga ginhatag mo sa imo mga tawo subong ila ginapanag-iyahan sa wala sing katapusan.

28“Kon may gutom sa duta, ukon may kamatay, ukon ang mga patubas nalaglag paagi sa mainit nga hangin ukon nagapanong nga mga apan, ukon ang imo mga tawo ginsalakay sang ila mga kaaway, ukon may pamalatian ukon masakit sa ila tunga,

29pamatii ang ila mga pangamuyo. Ang bisan sin-o sang imo mga katawhan nga Israelinhon, gikan sa ila pagpangasubo, magbayaw sang ila mga kamot sa pagpangamuyo sa sini nga Templo,

30pamatii ang ila pangamuyo. Pamatii sila gikan sa imo ilistaran sa langit, kag patawara sila. Ikaw lamang ang nakahibalo sang yara sa tagipusoon sang tawo. Himua sa tagsa ka tawo ang nagakabagay sa iya,

31agod nga ang imo mga tawo magpasidungog kag magtuman sa imo sa tanan nga tion sa ila pag-estar sa duta nga imo ginhatag sa amon mga katigulangan.

32“Kon ang isa ka dumoluong nga nagaestar sa malayo nga duta makabati kon daw ano kadako kag kagamhanan sa imo kag handa sa gihapon sa paghimo sang imo luyag, kag dayon magaabot sia sa pagpangamuyo sa sini nga Templo,

33pamatii ang iya pangamuyo. Gikan sa langit diin ka nagaestar, himua ang iya ginapangayo sa imo, agod ang tanan nga mga tawo sang kalibutan makakilala sa imo kag magtuman sa imo, subong sang ginhimo sang imo mga katawhan nga Israelinhon. Kag makahibalo sila nga ini nga Templo nga ginpatindog ko amo ang lugar sa diin ikaw pagasimbahon.

34“Kon magsugo ka sa imo mga tawo sa pagpakig-away batok sa ila mga kaaway, kag magpangamuyo sila sa imo bisan diin sila, nga nagaatubang sa sini nga siudad nga imo ginpili kag sa sini nga Templo nga akon ginpatindog para sa imo,

35pamatii ang ila mga pangamuyo. Pamatii sila gikan sa langit kag padag-a sila.

36“Kon ang imo mga tawo magpakasala batok sa imo—kay wala sing isa nga wala nagapakasala—kag sa imo kaakig ginpadaog mo ang ila mga kaaway kag gindala sila subong mga bihag sa iban nga duta, bisan pa sa malayo nga duta,

37pamatii ang pangamuyo sang imo mga tawo. Kon didto sadto nga duta maghinulsol kag magpangamuyo sila sa imo, magtuad kon daw ano ka makasasala kag kalaut sa ila, pamatii ang ila mga pangamuyo, O Ginoo.

38Kon sa sadto nga duta maghinulsol sila sing maminatud-on kag magpangamuyo sa imo samtang nagaatubang sa sini nga duta nga imo ginhatag sa amon mga katigulangan, ini nga siudad nga imo ginpili, kag sa sini nga Templo nga akon ginpatindog para sa imo,

39dayon pamatii ang ila mga pangamuyo. Gikan sa imo balay sa langit, pamatii kag kaluoyi sila, kag patawara ang tanan nga mga sala sang imo mga tawo.

40“Karon, O Dios ko, magtulok ka sa amon kag pamatii ang mga pangamuyo nga gindulot sa sini nga lugar.

41Tindog na, O Ginoong Dios, kag upod sa Kaban sang Kasugtanan nga simbulo sang imo gahom, sulod ka sa Templo, kag mag-estar diri sa wala sing katapusan. Bendisyuni ang imo mga pari sa tanan nga ila ginahimo, kag kabay nga ang tanan mo nga mga tawo magkalipay tungod sang imo kaayo sa ila.

42O Ginoong Dios, indi pag-isikway ang hari nga imo ginpili. Dumdoma ang imo paghigugma sa imo alagad nga si David.”

← Chapter 5 Jump to: Chapter 7 →