2 Chronicles 14

Ilonggo (Maayong Balita nga Biblia (2012))

← Chapter 13 Jump to: Chapter 15 →

1Si Haring Abias napatay kag ginlubong sia sa mga lulobngan sang mga hari sa Siudad ni David. Ang iya anak nga si Asa nagbulos sa iya subong hari, kag sa idalom sang paggahom ni Asa may paghidait sa duta sa sulod sang napulo ka tuig.

2Nalipay kay Asa ang Ginoo nga iya Dios tungod sa iya paghimo sang matarong kag maayo.

3Ginkuha niya ang mga altar sang mga dumoluong kag ang mga lugar nga ginasimbahan sang mga pagano, ginpanumba niya ang balaan nga mga haligi nga bato kag ginpang-utod ang mga simbulo sang diosa nga si Asera.

4Ginsugo niya ang mga tawo sang Juda sa pagtuman sang kabubot-on sang Ginoo, ang Dios sang ila mga katigulangan kag sa pagtuman sang iya mga pagtulon-an kag mga sugo.

5Tungod kay ginkuha niya ang mga lugar nga ginasimbahan sang mga pagano kag ang mga altar sang insyenso gikan sa tanan nga mga siudad sang Juda, ang ginharian may kalinong sa idalom sang iya paggahom.

6Nagpatindog sia sing mga pamakod sa mga siudad sang Juda sang iya paggahom kag sa sulod sang pila ka tuig wala sing inaway, tungod kay ang Ginoo naghatag sa iya sing kalinong.

7Nagsiling sia sa mga tawo sang Juda, “Pamakuran ta ang mga siudad paagi sa pagpatindog sang mga pader, kag mga tore, kag sang mga pwerta nga masirahan kag mapintalan. Kita ang nagagahom sa duta, kay gintuman naton ang kabubot-on sang Ginoo nga aton Dios kag ginhatagan niya kita sang kalinong sa bug-os nga palibot.” Gani nagpatindog sila kag nagmainuswagon.

8Si Haring Asa may mga hangaway nga 300,000 ka mga tawo halin sa Juda, nga nasangkapan sang mga taming kag mga bangkaw, kag 280,000 ka mga tawo halin sa tribo ni Benjamin nga nasangkapan sing mga taming kag mga pana. Tanan sila maisog kag nahanas sing maayo nga mga lalaki.

9Si Zera nga Etiopiahanon naggubat sang Juda nga may 1,000,000 ka mga hangaway kag 300 ka mga karwahi kag naglambot sia tubtob sa Maresa.

10Si Asa naggwa kag nagpakig-away sa iya, kag sila nga duha nagpahamtang sang ila mga hangaway sa magkatimbang nga bahin sa Kapatagan sang Zepata malapit sa Maresa.

11Si Asa nagpangamuyo sa Ginoo nga iya Dios, “O Ginoo, makatabang ikaw sa mga hangaway nga maluya sa pag-away batok sa mga hangaway nga gamhanan. Tabangi kami karon, O Ginoo nga amon Dios, tungod kay nagasalig kami sa imo, kag sa imo ngalan nagagwa kami sa pagpakig-away batok sining madamo nga mga hangaway. O Ginoo, ikaw amon Dios, wala sing isa nga makalutos sa imo.”

12Ang Ginoo naglutos sa mga hangaway nga Etiopiahanon sang si Asa kag ang mga hangaway sang Juda nagsalakay sa ila. Nagpalagyo sila

13kag si Asa kag ang iya mga hangaway naglagas sa ila tubtob sa Gerar. Madamo kaayo sang mga Etiopiahanon nga nagkalamatay sa bagay nga indi na sila makabato sa pag-away. Gindaog sang mga hangaway ni Asa ang mga Etiopiahanon sa bulig sang Ginoo kag ang mga hangaway may madamo nga ginpang-agaw.

14Dayon natigayon nila ang pagpanglaglag sang mga siudad sa palibot sang Gerar, tungod kay ang mga pumoluyo didto hinadlukan gid sa Ginoo. Ginpang-agaw sang mga hangaway ini tanan nga mga siudad kag nakakuha sila sang madamo nga mga pagkabutang.

15Ginsalakay man nila ang mga kampo sang mga manugbantay sang mga kahayupan kag madamo ang ila naagaw nga mga karnero, mga kanding kag mga kamelyo. Dayon nagbalik sila sa Jerusalem.

← Chapter 13 Jump to: Chapter 15 →

Recommended Reading

Commentary 2 Chronicles Commentaries → Devotional 2 Chronicles Devotional Guide → Get This Bible 2012 Study Bible →