2 Chronicles 7

Ilonggo (Maayong Balita nga Biblia (2012))

← Chapter 6 Jump to: Chapter 8 →

1Sang makatapos pangamuyo si Haring Solomon, ang kalayo nag-abot halin sa langit kag nagsunog sang mga halad nga gindulot, kag ang masilaw nga kapawa nga nagapahayag sang presensya sang Ginoo nagpuno sang Templo.

2Tungod kay ang Templo napuno sang masilaw nga kapawa, ang mga pari indi na makasulod.

3Sang makita sang mga tawo sang Israel nga ang kalayo nag-abot halin sa langit kag ang kapawa nagpuno sang Templo, naghapa sila sa duta nga nagasimba sa Dios kag nagadayaw sa iya, tungod sang iya kaayo kag sang iya walay katapusan nga gugma.

4Dayon si Haring Solomon kag ang tanan nga mga tawo nagdulot sing mga halad sa Ginoo.

5Naghalad sia sing 22,000 ka mga baka kag 120,000 ka mga karnero subong mga halad sa paghiambit. Gani sia kag ang tanan nga mga tawo naghalad sang Templo.

6Ang mga pari nagtindog sa mga lugar nga ginpatungod sa ila, kag nagaatubang sa ila ang mga Levita, nga nagadayaw sa Ginoo paagi sa mga instrumento sa musika nga ginhatag ni Haring David kag nagaamba sila sing kalantahon, “Ang iya Gugma Wala sing Katapusan!” nga ila anay ginaamba sang buhi pa si David. Ang mga pari nagtukar sang mga trumpeta, samtang ang tanan nga mga tawo nagatindog.

7Ginhalad ni Solomon ang natunga nga bahin sang pasiyuhan, ang lugar sa atubangan sang Templo, kag dayon gindulot didto ang mga halad nga nasunog sing bug-os, ang mga halad nga kalan-on gikan sa uyas kag ang sapay nga gikan sa mga halad sa pagpakig-ambit. Ginhimo niya ini tungod kay ang bronsi nga altar nga iya ginhimo tama ka diutay para sa sini tanan nga mga halad.

8Si Solomon kag ang tanan nga mga tawo sang Israel naghiwat sang Piesta sang mga Palasilungan sa sulod sang pito ka adlaw. May madamo nga mga tawo nga nagtilipon didto nga ang iban sa ila halin pa sa Alagyan sang Hamat sa naaminhan kag sa dulonan sang Ehipto sa nabagatnan.

9Ang ikawalo nga adlaw amo ang katapusan nila nga paghiwat. Pito ka adlaw ang paghalad nila sang altar kag pito pa gid ka adlaw ang paghiwat sang piesta.

10Sa ika-23 nga adlaw sang ikapito nga bulan, ginpapauli ni Solomon ang mga tawo. Nagkalipay gid sila kag nagkasadya tungod sang tanan nga mga kaayuhan sang Ginoo nga ginhatag sa iya mga tawo nga Israelinhon, kay David, kag kay Solomon.

11Madinalag-on nga natapos ni Haring Solomon ang Templo kag ang palasyo suno sa iya tanan nga plano para sa sini.

12Dayon ang Ginoo nagpakita kay Solomon sang gab-i kag nagsiling sa iya, “Nabatian ko ang imo pangamuyo, kag ginbaton ko ini nga Templo subong isa ka lugar sa diin ang mga halad pagaidulot sa akon.

13Kon indi ako magpadala sang ulan, ukon magpadala sang mga apan sa pagkaon sang mga patubas, ukon magpadala ako sing pamalatian sa akon mga tawo,

14nga akon gintawag nga akon, kon magpangamuyo sila sa akon kag maghinulsol, kag magbiya sa mga malauton nga ila ginahimo, dayon pamatian ko sila gikan sa langit, patawaron ko ang ila mga sala, kag himuon ko nga mapatubason liwat ang ila duta.

15Bantayan ko ini nga Templo kag manginhanda sa pagpamati sang tanan nila nga mga pangamuyo nga ginahimo diri.

16Ginpili ko ini nga templo kag ginpakabalaan subong isa ka lugar sa diin ako pagasimbahon sa wala sing katapusan. Bantayan kag apinan ko ini sa tanan nga tion.

17Kon mag-alagad ka sing matutom sa akon subong sang ginhimo sang imo amay nga si David, nga nagatuman sang akon mga kasugoan kag nagahimo sang tanan nga butang nga akon ginsugo sa imo,

18tumanon ko ang saad nga ginhimo ko sa imo amay nga si David sang pagsiling ko sa iya nga ang Israel gamhan sa gihapon sang iya mga kaliwat.

19Pero kon ikaw kag ang imo mga tawo indi magtuman sa akon mga sugo kag mga mando nga ginhatag ko sa imo, kag magsimba sa iban nga mga dios,

20dayon tabugon ko kamo sa duta nga ginhatag ko sa inyo, kag bayaan ko ini nga Templo nga akon ginpakabalaan subong lugar sa diin ako pagasimbahon. Ang mga tawo bisan diin magayaguta kag magatamay sini.

21“Karon daku gid ang pagpasidungog sa Templo, pero sa ulihi ang tagsatagsa nga magaagi sini matingala kag magapamangkot, ‘Ngaa bala ginhimo ini sang Ginoo sa sini nga duta kag sa sini nga Templo?’

22Ang mga tawo magasabat, ‘Tungod kay ginsikway nila ang Ginoo nga ila Dios, nga nagpaggwa sang ila mga katigulangan sa Ehipto. Nag-alagad sila sa iban nga mga dios kag nagsimba sa ila. Amo ini ang kabangdanan nga ang Ginoo nagpadala sa ila sini nga kalalat-an.’”

← Chapter 6 Jump to: Chapter 8 →