2 Chronicles 9

Ilonggo (Maayong Balita nga Biblia (2012))

← Chapter 8 Jump to: Chapter 10 →

1Ang rayna sang Seba nakabati sang pagkabantog ni Haring Solomon, kag nagpanglakaton sia pakadto sa Jerusalem sa pagtilaw sa iya sang mabudlay nga mga pamangkot. Nagdala sia sang madamo nga mga alagad, madamo nga mga kamelyo nga nakargahan sing mga pahamot, mga malahalon nga mga bato, kag madamo nga mga bulawan. Sang pagkitaay nila ni Solomon, ginpamangkot niya si Solomon sang tanan nga mga pamangkot nga iya madumdoman.

2Ginsabat ini tanan ni Solomon, wala gid sing mabudlay nga pamangkot nga wala niya masabat.

3Nabatian sang rayna sang Seba ang kaalam ni Solomon kag nakita niya ang palasyo nga iya ginpatindog.

4Nakita niya ang pagkaon sa iya lamisa, ang mga ginaestaran sang iya mga opisyales, ang maayo nga pagdumala sang iya mga alagad sa palasyo kag ang mga uniporme nga ila ginasuksok, ang mga bayu sang mga suloguon nga nagaalagad sa iya sa mga piesta, kag ang mga halad nga iya ginadulot sa Templo. Nahalawhaw gid sia sang iya nakita.

5Nagsiling sia sa hari, “Ang akon nabatian sa akon kaugalingon nga pungsod nahanungod sa imo kag sa imo kaalam matuod!

6Wala ako magpati sang ila ginsugid tubtob nag-abot ako kag nakita ko gid. Bisan ang katunga sang imo kaalam wala ko pa mabatii, sobra pa ang imo kaalam sang sa ginsugid sang mga tawo.

7Daw ano ka malipayon ang mga tawo nga nagaalagad sa imo, nga yara pirme sa imo tupad, sa diin makapamati sila sang imo kaalam!

8Dayawon ang Ginoo nga imo Dios! Nalipay gid sia sa paghimo sa imo nga hari, sa paggahom sa iya ngalan. Tungod kay ginahigugma niya ang mga tawo sang Israel kag luyag niya nga amligan sila sa gihapon, ginhimo niya ikaw nga hari sa pagpatuman sang kasugoan kag katarungan.”

9Dayon naghatag sia sing mga dulot kay Haring Solomon: malapit sa lima ka tonelada nga bulawan, kag madamo gid kaayo nga mga pahamot kag malahalon nga mga bato. Wala gid sing mga pahamot nga pareho sang ginhatag sang rayna sang Seba kay Haring Solomon.

10Ang mga tinawo ni Haring Hiram kag ni Haring Solomon nga nagdala sang bulawan halin sa Ofir, nagdala man sang mga kahoy nga sandalo kag malahalon nga mga bato.

11Gingamit ni Solomon ang kahoy sa paghimo sang hagdanan sang Templo kag sang iya palasyo, kag sa paghimo sang mga arpa kag sang mga lira para sa mga musikero. Wala gid sang subong sini nga nakita sang una sa duta sang Juda.

12Si Haring Solomon naghatag sa rayna sang Seba sang tanan nga iya ginpangayo. Wala labot ini sang mga ginhatag sa iya nga baylo sang mga dulot nga gindala niya para kay Solomon. Dayon sia kag ang iya mga alagad nagpauli sa duta sang Seba.

13Sa tagsa ka tuig si Haring Solomon nagabaton sing sobra sa baynte-singko ka tonelada sang bulawan,

14wala labot sa mga buhis nga ginabayad sang mga negosyante kag mga manugpatikang. Ang mga hari sang Arabia kag ang mga gobernador sa mga distrito sang Israelinhon nagdala man sa iya sang pilak kag bulawan.

15Si Solomon nagpahimo sing 200 ka dalagku nga mga taming, ang kada-isa sini nahaklapan sang mga kinse ka libra nga pinapa nga bulawan,

16kag 300 ka magamay nga mga taming nga ang kada-isa sini nahaklapan sang walo ka libra nga pinapa nga bulawan. Ginbutang niya ini tanan sa Tilipunan sa Kagulangan sang Libano.

17Ang hari nagpahimo man sang daku nga trono nga tiposo, nga nahaklapan sang puraw nga bulawan.

18May anom ka mga halintang pasaka sa trono, kag may palatungan nga nahaklapan sang bulawan nga natakod sa trono. May mga halambuyan sa tagsa ka kilid sang trono, kag may estatwa sang mga leon nga nagatindog sa tagsa ka kilid.

19May dose ka mga estatwa sang leon nga nagatindog sa mga halintang, isa ka leon sa tagsa ka punta sang halintang. Wala sing trono nga nahimo kaangay sini sa bisan diin nga ginharian.

20Ang tanan nga ilimnan nga mga kupa ni Haring Solomon nahimo sa bulawan, kag ang tanan nga mga galamiton sa Tilipunan Sa Kagulangan Sang Libano puraw nga bulawan. Sa panahon ni Solomon ang pilak ginakabig nga daw wala sing bili.

21May mga sakayan sia nga nagabiyahe sa Tarsis upod sa mga sakayan ni Haring Hiram, kag makaisa sa tatlo ka tuig nagaabot ini. Ang mga sakayan nagadala pabalik sing bulawan, pilak, tiposo, mga dalagku kag magamay nga mga amo.

22Si Haring Solomon mas manggaranon kag mas maalam sang sa bisan sin-o nga hari sa bug-os nga kalibutan.

23Tanan sila nagakadto sa iya, sa pagpamati sang kaalam nga ginhatag sang Dios sa iya.

24Ang tagsatagsa sa ila nagdala sang mga regalo sa iya—mga gamit nga nahimo sa pilak kag bulawan, mga bayu nga malaba, mga armas, mga pahamot, mga kabayo kag mga mula. Ini nagapadayon tuigtuig.

25Si Haring Solomon may 4,000 ka kwadra para sa iya mga karwahi kag mga kabayo, kag may 12,000 sia ka mga manugkabayo para sa inaway. Ang iban sini sa ila iya ginbutang sa Jerusalem, kag ang nabilin ginbutang niya sa lainlain nga mga siudad.

26Sia ang labing gamhanan sa tanan nga mga hari sa kadutaan halin sa Suba sang Eufrates pakadto sa Filistia kag sa dulonan sang Ehipto.

27Sa tion sang iya paggahom, ang pilak sa Jerusalem pareho lang ka ordinaryo sang bato, kag ang kahoy nga sedro pareho kadamo sang kahoy nga sikomoro sa mga kunsaran sang Juda.

28Si Solomon nagkuha sang mga kabayo sa Musri kag sa iban nga mga pungsod.

29Ang iban sang mga binuhatan ni Solomon halin sa ginsugoran tubtob sa katapusan nasulat sa Maragtas ni Natan nga Propeta, sa Tagna ni Ahias nga taga-Silo kag sa Mga Palanan-awon ni Ido nga Propeta nga nagasugid man sang paggahom ni Haring Jeroboam sang Israel.

30Si Solomon naggahom sa Jerusalem para sa bug-os nga Israel sa sulod sang kwarenta ka tuig.

31Napatay sia kag ginlubong sa Siudad ni David nga iya amay, kag ang iya anak nga si Rehoboam nagbulos sa iya subong hari.

← Chapter 8 Jump to: Chapter 10 →