2 Chronicles 35

Ilonggo (Maayong Balita nga Biblia (2012))

← Chapter 34 Jump to: Chapter 36 →

1Ginsaulog ni Haring Josias ang Pascua sa Jerusalem sa kadungganan sang Ginoo, kag sa ika-14 nga adlaw sang nahauna nga bulan nag-ihaw sila sang mga kordero para sa piesta.

2Ginhatagan niya ang mga pari sang ila mga katungdanan sa Templo kag ginlaygayan sila sa paghimo sang ila mga bulohaton sing maayo.

3Ginsingganan man niya ang mga Levita, ang mga manunodlo sang Israel, nga nahalad sa Ginoo kon ano ang ila himuon: “Ibutang ninyo ang Kaban sang Kasugtanan sa Templo nga ginhimo ni Haring Solomon, ang anak ni David. Indi na ninyo ini pagdaladalahon, kundi mag-alagad kamo sa Ginoo nga inyo Dios kag sa iya mga tawo nga Israelinhon.

4Magpahamtang kamo sang inyo kaugalingon sa Templo suno sa mga kabarangayan kag suno sa mga katungdanan nga ginhatag sa inyo ni Haring David kag sang iya anak nga si Haring Solomon,

5kag pasunora ninyo ang inyo kaugalingon agod nga ang iban sa inyo sarang makabulig sa tagsa ka panimalay sang mga tawo sang Israel.

6Ihawa ninyo ang mga kordero kag mga kanding nga para sa Pascua. Karon magpaninlo kamo sang inyo kaugalingon kag ihanda ang mga halad agod ang inyo kapareho nga mga Israelinhon maghimo sang ginsiling sang Ginoo paagi kay Moises.”

7Si Haring Josias naghatag sa mga tawo para sa pascua sing 30,000 ka mga karnero, mga kordero, kag tinday nga mga kanding, kag 3,000 ka toro nga mga baka. Ini tanan naghalin sa iya kaugalingon nga mga kasapatan.

8Nag-amot man ang iya mga opisyales para gamiton sang mga tawo, mga pari, kag mga Levita. Kag ang mga opisyales nga gintugyanan sang Templo nga amo sanday Helkias nga Pinakamataas nga Pari, Zacarias, kag Jehiel—naghatag sa mga pari sing 2,600 ka mga kordero kag tinday nga mga kanding, kag 300 ka toro nga mga baka para sa mga halad sa tion sang piesta.

9Ang mga pangulo sang mga Levita nga amo sanday Conanias, Semaya, kag ang iya utod nga si Netanael, Hasabias, Jeiel, kag Jozabad, nag-amot sing 5,000 ka mga kordero kag tinday nga mga kanding, kag 500 ka toro nga mga baka para sa mga Levita agod ila idulot subong mga halad.

10Sang maaman na ang tanan para sa Pascua, ang mga pari kag mga Levita nagkadto sa mga lugar sa diin sila magaalagad suno sa ginsugo sang hari.

11Sa tapos maihaw ang mga kordero kag mga kanding, ginpanitan ini sang mga Levita kag ang mga pari nagwisik sang dugo sa altar.

12Dayon ginbahinbahin nila sa mga tawo, suno sa mga grupo sang panimalay, ang mga sapat para sa mga halad nga sinunog, agod nga mahalad nila ini suno sa mga pagsulondan sa Kasugoan ni Moises.

13Ang mga Levita nag-asal sang mga halad sa Pascua sa ibabaw sang kalayo, suno sa mga pagsulondan, kag ginlaga ang balaan nga mga dulot sa mga kolon, mga kaldero, kag sa mga kalaha, kag gilayon ginpanagtag ang karne sa mga tawo.

14Sa tapos mahimo ini, ang mga Levita nag-aman sang karne para sa ila kaugalingon kag sa mga pari nga kaliwat ni Aaron, kay ang mga pari masako tubtob sa gab-i, nga nagadulot sang mga sapat nga ginsunog sang bug-os kag sang mga sapay sang mga halad.

15Ang mga musikero sa kabarangayan ni Asaf yara sa mga lugar suno sa pagmando nga ginhatag sa ila ni Haring David. Sila amo sanday Asaf, Heman, kag Jeduton, ang propeta sang hari. Ang mga gwardya sa pwerta sang Templo, wala na kinahanglan maghalin sa ila mga lugar nga ginaalagaran tungod kay ang mga Levita nag-aman sang Pascua para sa ila.

16Gani suno sa sugo ni Haring Josias, ang tanan nga mga butang ginhimo sina nga adlaw sa pagsimba sa Ginoo, ang pagsaulog sang Piesta sa Pascua, kag ang pagdulot sang mga halad nga sinunog sa altar.

17Ang tanan nga mga tawo sang Israel nga yadto didto nagsaulog sang Pascua kag sang Piesta sang Tinapay nga Wala sing Lebadora sa sulod sang pito ka adlaw.

18Halin sa mga inadlaw ni Samuel nga propeta, ang Pascua wala gid masaulog kaangay sini. Wala gid sing iban nga mga hari nga nakasaulog sang Pascua kaangay sining pagsaulog ni Haring Josias, sang mga pari, sang mga Levita kag sang mga tawo sang Juda, Israel, kag Jerusalem,

19sa ika-18 nga tuig sang paggahom ni Josias.

20Sa tapos mahimo ni Haring Josias ini tanan para sa Templo, si Haring Neco sang Ehipto nagpangulo sang hangaway sa pagpakig-away sa Carquemis sa Suba sang Eufrates. Si Josias nagtinguha sa pagpugong sa iya,

21pero si Neco nagpadala kay Josias sini nga mensahe: “Wala ka labot sa sini nga inaway, Hari sang Juda. Wala ako magkari sa pagpakig-away sa imo, kundi sa pagpakig-away sa akon mga kaaway, kag ang Dios nagsugo sa akon sa pagdalidali. Ang Dios nagaupod sa akon, gani indi ka magpamatok sa akon, basi kon sia maglaglag sa imo.”

22Pero si Josias nagpamat-od gid sa pagpakig-away, gani nagpakunokuno sia sang iya kaugalingon kag nagkadto sa inaway. Wala sia magpamati sa ginsiling sang Dios paagi kay Haring Neco, kundi nagkadto sia sa inaway sa patag sang Megido.

23Sa tion sang inaway, si Haring Josias naigo sang mga baslay sang Ehiptohanon, kag nagsugo sia sa iya mga alagad, “Dalha ako palayo diri. Napilasan ako sing malubha!”

24Ginkuha nila sia sa iya karwahi, ginsaylo sa ikaduha nga karwahi nga yadto didto, kag gindala sia sa Jerusalem. Didto napatay sia kag ginlubong sa mga lulobngan sang mga hari. Ang tanan nga mga tawo sang Juda kag Jerusalem naglalaw sa iya kamatayon.

25Si Jeremias nga propeta naghimo sang isa ka komposo sang panalambiton para kay Haring Josias. Nanginkinabatasan sa Israel nga ang mga manug-amba, mga lalaki kag mga babayi, nagagamit sini nga kanta kon maglalaw sila sa iya. Ini nga ambahanon makita sa mga nasulat nga mga palanambiton.

26Ang tanan nga ginhimo ni Josias—ang iya pagsimba sa Ginoo, ang iya pagtuman sang Kasugoan,

27ang iya maragtas halin sa ginsugoran kag sa katapusan—nasulat tanan sa Maragtas sang mga Hari sang Israel kag Juda.

← Chapter 34 Jump to: Chapter 36 →