2 Chronicles 15

Ilonggo (Maayong Balita nga Biblia (2012))

← Chapter 14 Jump to: Chapter 16 →

1Ang Espiritu sang Dios naggahom kay Azarias nga anak ni Oded,

2kag nagpakigkita sia kay Haring Asa. Nagsiling sia, “Haring Asa, pamati ka sa akon, kag tanan kamo nga mga pumoluyo sang Juda kag Benjamin! Ang Ginoo nagaupod sa inyo, samtang kamo nagapabilin sa iya. Kon pangitaon ninyo sia, makita ninyo sia, pero kon magtalikod kamo sa iya magasikway sia sa inyo.

3Sa malawig nga panahon ang Israel nagkabuhi nga wala sing matuod nga Dios, wala sing mga pari sa pagtudlo sa ila, kag wala sing kasugoan.

4Pero sang pag-abot sang kagamo, nagbalik sila sa Ginoo, ang Dios sang Israel. Ginpangita nila sia kag ila sia nakita.

5Sa sadto nga mga inadlaw wala sing isa nga nagapakadto-pakari nga hilway tungod kay may kagamo kag wala sing kalinong sa duta.

6Ang isa ka pungsod nagapigos sang isa ka pungsod, ang isa ka siudad nagapigos sang isa ka siudad, tungod kay ang Dios nagapadala sing kagamo kag kabudlayan sa ila.

7Pero magpakabakod ka kag indi magpakaluya. Ang imo pagpangabudlay pagabalusan.”

8Sang mabatian ni Asa ang panagna ni Azarias nga anak ni Oded, nagpakaisog sia. Ginkuha niya ang tanan nga mga diosdios sa duta sang Juda kag Benjamin kag ang tanan nga mga diosdios sa mga siudad nga iya gin-agaw sa kabakuloran sang Efraim. Ginpakaayo man niya ang altar sang Ginoo nga yadto didto sa pasiyuhan sang Templo.

9Si Asa nagmando sa tanan nga mga tawo sa pagtipon—ang mga tawo sang Juda kag Benjamin, kag ang madamo nga mga tawo nga nagdampig sa iya halin sa Efraim, Manases, kag Simeon nga nagaestar sa iya ginharian, tungod kay nakita nila nga ang Ginoo nagaupod sa iya.

10Nagtipon sila sa Jerusalem sa ikatlo nga bulan sang ika-15 nga tuig sang paghari ni Asa.

11Sa sadto nga adlaw nagdulot sila sang mga halad sa Ginoo gikan sa inagaw nga ila gindala pauli. Naghalad sila sing 700 ka mga baka kag 7,000 ka mga karnero.

12Naghimo sila sing kasugtanan kag naghilisugot sila sa pagsimba sa Ginoo, ang Dios sang ila mga katigulangan, sa bug-os nila nga tagipusoon kag kalag.

13Ang tagsatagsa, bata kag tigulang, lalaki ukon babayi, nga indi magsimba sa iya pagapatyon.

14Sa mabaskog nga tingog nagsumpa sila sa ngalan sang Ginoo nga sila magatuman sang kasugtanan, kag dayon nagsinggit sila kag nagpatunog sang mga trumpeta kag mga budyong.

15Ang tanan nga mga pumoluyo sang Juda nagkalipay, tungod kay naghimo sila sining kasugtanan sa ila bug-os nga tagipusoon. Nagkalipay sila sa pagsimba sa Ginoo, kag ang Ginoo nagbaton sa ila kag naghatag sa ila sing kalinong sa bug-os nga palibot.

16Ginkuha ni Haring Asa ang iya lola nga si Maaca sa iya palangakuan subong rayna nga iloy tungod kay naghimo sia sang makangilil-ad nga diosdios nga amo ang diosa nga si Asera. Ginpulod ni Asa ang diosdios, ginbis-ak kag gintutdan ini sa Kapatagan sang Kidron.

17Bisan nga wala ni Asa paglaglaga ang tanan nga mga lugar nga ginasimbahan sang mga pagano sa duta, nagpadayon sia nga matutom sa Ginoo sa bug-os niya nga kabuhi.

18Ginbutang niya sa Templo ang tanan nga mga pagkabutang nga ginhalad sa Dios sang iya amay nga si Abias, lakip ang mga butang nga bulawan kag pilak nga iya mismo ginhalad.

19Wala na sing inaway tubtob sa ika-35 nga tuig sang iya paggahom.

← Chapter 14 Jump to: Chapter 16 →