2 Chronicles 30

Ilonggo (Maayong Balita nga Biblia (2012))

← Chapter 29 Jump to: Chapter 31 →

1Ang mga tawo wala makasaulog sang Piesta sang Pascua sa nagakaigo nga tion sa nahauna nga bulan, tungod kay kulang ang mga pari nga matinlo kag diutay lang nga mga tawo ang nagtipon sa Jerusalem. Gani si Haring Ezequias, ang iya mga opisyales kag ang mga tawo sa Jerusalem naghisugot sa pagsaulog sini sa ikaduha nga bulan, kag ang hari nagpahibalo sa tanan nga tawo sang Israel kag Juda. Ginpadalhan gid niya sing mga sulat ang mga tribo ni Efraim kag ni Manases sa pag-agda sa ila sa pagkadto sa Templo sa Jerusalem kag sa pagsaulog sang Pascua sa kadungganan sang Ginoo, ang Dios sang Israel.

4Ang hari kag ang mga tawo nalipay sang ila plano

5gani gin-agda nila ang tanan nga Israelinhon, halin sa Dan sa naaminhan pakadto sa Beerseba sa nabagatnan, sa pagkadto sing tingob sa Jerusalem kag sa pagsaulog sang Pascua suno sa kasugoan, nga mas madamo nga mga tawo sang sa nahauna.

6Sa mando sang hari kag sang iya mga opisyales ang mga mensahero naglakat sa bug-os nga Juda kag Israel nga may masunod nga pangagda: “Mga tawo sang Israel! Naluwas kamo sa pagsalakay sang mga taga-Asiria. Karon balik kamo sa Ginoo, ang Dios ni Abraham, Isaac, kag ni Jacob kag sia magabalik sa inyo.

7Indi kamo magsunod sa inyo mga katigulangan kag sa inyo mga kaparientehan nga Israelinhon nga nagbiya sa Ginoo nga ila Dios. Subong sang inyo nakita, ginsilutan gid niya sila sing tama.

8Indi kamo magpakatig-a subong sa ila, kundi tumana ninyo ang Ginoo. Kadto kamo sa Templo sa Jerusalem, nga ginpakabalaan sa walay katapusan sang Ginoo nga inyo Dios, kag magsimba sa iya agod nga indi na sia magkaakig sa inyo.

9Kon magbalik kamo sa Ginoo, dayon yadtong mga nagdala sang inyo mga pariente subong mga bihag magakaluoy sa ila kag magapapauli sa ila. Ang Ginoo nga inyo Dios maayo kag maluloy-on, kag kon magbalik kamo sa iya, sia magabaton sa inyo.”

10Ang mga mensahero nagkadto sa tagsa ka siudad sa kadutaan sang mga tribo ni Efraim kag ni Manases, kag tubtob sa aminhan sa tribo ni Zabulon, pero ang mga tawo nagkadlaw kag nagyaguta sa ila.

11Wala sapayan sini, may yara gikan sa mga tribo ni Aser, Manases kag Zabulon nga handa sa pagkadto sa Jerusalem.

12Ang Dios nagpanghikot man sa Juda kag ginbuot nga mag-ugyon ang mga tawo sa ila pagpamat-od sa pagtuman sang iya kabubot-on paagi sa paghimo sang mga sugo nga ginhatag sang hari kag sang iya mga opisyales.

13Ang madamo nga mga tawo nagtipon sa Jerusalem sa ikaduha nga bulan sa pagsaulog sang Piesta sang Tinapay nga Wala sing Lebadora.

14Ginkuha nila ang tanan nga mga altar nga gingamit sa Jerusalem para sa pagdulot sang mga halad kag sa pagsunog sang insyenso para sa mga diosdios, kag ginhaboy ini sa Kapatagan sang Kidron.

15Kag sa ika-14 nga adlaw sang bulan nag-ihaw sila sang mga kordero para sa halad sa Pascua. Ang mga pari kag mga Levita nga indi matinlo nagkahuya gid gani nga ginpakabalaan nila ang ila kaugalingon sa Ginoo, kag karon sarang na sila makadulot sang mga halad nga sinunog sa Templo.

16Nag-alagad sila sa ila naiguan nga mga lugar sa Templo, suno sa mga pagsulondan sa Kasugoan ni Moises, ang tawo sang Dios. Ang mga Levita naghatag sing dugo sang mga halad sa mga pari, nga nagwisik sini sa altar.

17Tungod kay madamo nga mga tawo ang wala makapaninlo, indi sila makaihaw sang mga kordero para sa Pascua, gani ang mga Levita amo ang nag-ihaw sini para sa ila, kag naghalad sang mga kordero sa Ginoo.

18Wala labot sini, madamo sang mga nag-abot halin sa mga tribo nanday Efraim, Manases, Isacar, kag Zabulon nga wala makahimo sang mga tulomanon sa pagpaninlo, gani nagsaulog sila sang Pascua sa indi nagakaigo nga paagi. Si Haring Ezequias nagpangamuyo para sa ila:

19“O Ginoo, Dios sang amon mga katigulangan, sa imo kaayo patawara ang mga nagasimba sa imo sa bug-os nila nga tagipusoon, bisan pa nga indi sila matinlo.”

20Ang Ginoo nagsabat sang pangamuyo ni Ezequias, ginpatawad niya ang mga tawo kag wala niya sila pagsiluti.

21Sa sulod sang pito ka adlaw, ang mga tawo nga nagtipon sa Jerusalem nagsaulog sang Piesta sang Tinapay nga Wala sing Lebadora sa daku nga kalipay kag adlaw-adlaw ang mga Levita kag ang mga pari nagdayaw sa Ginoo sa bug-os nila nga kusog.

22Gindayaw ni Ezequias ang mga Levita sa ila pagkasampaton sa pagpangulo sa pagsimba sa Ginoo. Sang makatapos sila sang pito ka adlaw nga paghalad sang mga dulot sa pagdayaw sa Ginoo, ang Dios sang ila mga katigulangan,

23nagpamat-od sila tanan sa pagsaulog sang pito pa gid ka adlaw. Gani nagsaulog sila nga may daku nga kalipay.

24Si Haring Ezequias naghatag sing 1,000 ka toro nga mga baka, 7,000 ka mga karnero nga ihawon kag kaunon sang mga tawo, kag ang mga opisyales naghatag sa ila sang 1,000 pa gid ka toro nga mga baka kag 10,000 ka mga karnero. Madamo nga mga pari ang naghimo sang mga tulomanon sa pagpaninlo.

25Gani ang tagsatagsa nagkalipay—ang mga tawo sang Juda, ang mga pari, ang mga Levita, ang mga tawo nga nag-abot halin sa aminhan, kag ang mga dumoluong nga nag-estar sa Israel kag Juda.

26Ang siudad sang Jerusalem napun-an sang kalipay, tungod kay wala sing natabo kaangay sini halin sa mga adlaw ni Haring Solomon, ang anak ni David.

27Ang mga pari kag ang mga Levita nagpangayo nga ang Ginoo magbendisyon sa mga tawo. Sa iya balay sa langit, ginpamatian sang Dios ang ila mga pangamuyo kag ginbaton ini.

← Chapter 29 Jump to: Chapter 31 →

Recommended Reading

Commentary 2 Chronicles Commentaries → Devotional 2 Chronicles Devotional Guide → Get This Bible 2012 Study Bible →