2 Chronicles 3

Ilonggo (Maayong Balita nga Biblia (2012))

← Chapter 2 Jump to: Chapter 4 →

1Dayon si Haring Solomon nagsugod sa pagpatindog sang Templo sang Ginoo sa Jerusalem sa Bukid sang Moria, sa diin ang Ginoo nagpakita kay Haring David, amay ni Solomon. Gin-aman na nga daan ni David ini nga lugar, nga gingamit ni Arauna nga Jebusnon subong isa ka linasan.

2Ang pagpatindog nagsugod sa ikaduha nga bulan sa ikap-at nga tuig sang paghari ni Solomon.

3Ang Templo nga iya ginpatindog nobenta ka tapak ang kalabaon, kag traynta ka tapak ang kasangkaron.

4Ang salamputan nga kwarto amo ang bug-os nga kasangkaron sang Templo nga traynta ka tapak, kag 180 ka tapak ang kataason. Ang nasulod nga bahin sang kwarto nahaklapan sang puraw nga bulawan.

5Ang mayor nga kwarto nakisamihan sang kahoy nga sedro kag nahaklapan sang puraw nga bulawan, kag ginbutangan sang mga dibuho nga palma kag mga kadena.

6Gin-adornohan sang hari ang Templo sang matahom kag malahalon nga mga bato, kag sang bulawan nga ginbakal halin sa duta sang Parvaim.

7Ginhaklapan niya sang bulawan ang mga dingding sang Templo, mga balayan, mga bakalan, kag ang mga pwertahan. Ang mga dingding ginsinsilan sang mga panday sang mga dibuho sang mga kerubin.

8Ang nasulod nga kwarto, nga ginatawag ang Labing Balaan nga Duog, traynta ka tapak ang kalabaon kag traynta ka tapak ang kasangkaron, nga amo ang bug-os nga kasangkaron sang Templo. Ang gingamit nga bulawan sa paghaklap sang mga dingding sang Labing Balaan nga Duog baynte singko ka tonelada;

9ang gingamit nga bulawan sa paghimo sang mga lansang baynte ka onsas, kag ang mga dingding sang mga kwarto sa ibabaw nahaklapan man sang bulawan.

10Ang hari nagpahimo man sa mga panday sing duha ka mga kerubin nga gikan sa metal, ginhaklapan ini sang bulawan, kag ginbutang ini sa Labing Balaan nga Duog,

11sa diin nagatindog sila nga nagatupad nga nagaatubang sa pwertahan. Ang kada-isa sa ila may duha ka mga pakpak nga ang kada pakpak pito kag tunga ka tapak ang kalabaon. Ini nagahumlad sa bagay nga nagaduotay sila sa tunga sang kwarto kag nagalambot ini sa mga kilid sang kwarto nga nagaabot sa traynta ka tapak ang bug-os nga kasangkaron.

14Ang kurtina para sa Labing Balaan nga Duog ginhimo sa lino kag panapton nga nalugom sa asol, granate, kag pula nga may dibuho nga mga kerubin.

15Ang hari nagpahimo sing duha ka mga haligi nga may kataason nga singkwentay dos ka tapak ang kada-isa kag ginpatindog ini sa atubangan sang Templo. Ang kada-isa may uloulo nga pito kag tunga ka tapak ang kataason.

16Ang mga uloulo sang mga haligi napunihan sang pinuna nga mga kadena kag sang 100 ka granada nga bronsi.

17Ang mga haligi ginpatindog sa mga kilid sang alagyan sang Templo: ang isa nga yara sa bagatnan nga kilid ginhingalanan Jaquin, kag ang isa nga yara sa aminhan nga kilid ginhingalanan Boaz.

← Chapter 2 Jump to: Chapter 4 →