2 Chronicles 5

Ilonggo (Maayong Balita nga Biblia (2012))

← Chapter 4 Jump to: Chapter 6 →

1Sang matapos ni Haring Solomon ang tanan nga mga obra sa Templo, ginbutang niya sa mga kwarto nga talaguan sa Templo ang tanan nga mga butang nga ginhalad sa Ginoo sang iya amay nga si David—ang pilak, bulawan, kag iban pa nga mga butang.

2Dayon ginpatawag ni Haring Solomon ang tanan nga mga pangulo sang mga tribo kag mga kabarangayan sang Israel sa pagtipon sa Jerusalem agod sa pagkuha sang Kaban sang Kasugtanan sang Ginoo gikan sa Sion nga Siudad ni David, pakadto sa Templo.

3Nagtipon sila tanan sa tion sang Piesta sang mga Palasilungan.

4Sang magtipon ang tanan nga mga pangulo, ang mga Levita naghakwat sang Kaban sang Kasugtanan

5kag gindala ini sa Templo. Ang mga pari kag ang mga Levita nagdala man sang Tolda sang presensya sang Ginoo kag sang tanan sini nga mga gamit pakadto sa Templo.

6Si Haring Solomon kag ang tanan nga mga tawo sang Israel nagtipon sa atubangan sang Kaban sang Kasugtanan kag naghalad sang madamo nga mga karnero kag mga baka—nga indi maisip.

7Dayon ang mga pari nagdala sang Kaban sang Kasugtanan sang Ginoo sa sulod sang Labing Balaan nga Duog sa Templo, sa idalom sang mga kerubin.

8Ang ila nahumlad nga mga pakpak nagtabon sang Kaban kag sang mga yayungan nga gingamit sa pagdala sini.

9Ang mga punta sang mga yayungan makita kon yara ikaw nagatindog sa atubangan sang Labing Balaan nga Duog, pero indi ini makita kon yara ikaw sa gwa. Ang mga yayungan yadto pa didto tubtob karon.

10Wala sing unod ang Kaban sang Kasugtanan luas sa duha ka mga lapida nga bato nga ginbutang ni Moises sang didto pa sila sa Bukid sang Sinai, sang ang Ginoo naghimo sing kasugtanan sa mga tawo sang Israel samtang nagalakat sila halin sa Ehipto.

11Ang tanan nga mga pari nga yadto didto, bisan sa ano nga grupo sila nasakop, nagpakabalaan sang ila kaugalingon. Kag ang tanan nga mga musikero nga Levita nga amo sanday Asaf, Heman, Jeduton, kag ang mga katapo sang ila mga kabarangayan nagbayo sang lino nga malahalon. Nagtindog sila malapit sa sidlangan nga kilid sang altar nga may mga platilyos kag mga arpa, kag upod sa ila ang 120 ka mga pari nga nagtukar sang mga trumpeta. Ang mga manug-amba nagdayaw sa Ginoo, nga ginaupdan sang mga trumpeta, mga platilyos, kag sang iban nga mga instrumento. Nagkanta sila: “Dayawon ang Ginoo, tungod kay sia maayo, kag ang iya paghigugma wala sing katapusan.” Samtang ang mga pari nagagwa sa Templo, sa hinali napun-an ini sang panganod nga nagasilak sang masilaw nga kapawa sang presensya sang Ginoo, kag indi sila makapadayon sa paghimo sang ila mga katungdanan.

← Chapter 4 Jump to: Chapter 6 →