2 Chronicles 23

Ilonggo (Maayong Balita nga Biblia (2012))

← Chapter 22 Jump to: Chapter 24 →

1Sa tapos sang paghulat sang pari nga si Joiada sing anom ka tuig, nagpamat-od sia nga amo na ang tion sa paghublag. Nagpakighisugot sia sa lima ka mga opisyales sang mga soldado nga amo sanday Azarias nga anak ni Jeroham, Ismael nga anak ni Johanan, Azarias nga anak ni Obed, Maasias nga anak ni Adaya, kag si Elisafat nga anak ni Zicri.

2Nagkadto sila sa tanan nga mga siudad sang Juda kag gindala nila pabalik sa Jerusalem ang mga Levita kag ang tanan nga mga pangulo sang mga kabarangayan.

3Nagtipon sila tanan sa Templo, kag didto naghimo sila sing kasugtanan kay Joas, ang anak sang hari. Si Joiada nagsiling sa ila, “Yari ang anak sang napatay nga hari. Sia karon amo ang manginhari, suno sa ginsaad sang Ginoo sa mga kaliwat ni Haring David.

4Amo ini ang aton pagahimuon. Kon ang mga pari kag ang mga Levita mag-abot sa pag-alagad sa Adlaw nga Inugpahuway, ang isa sang tatlo ka bahin sa ila magabantay sa mga pwerta sang Templo,

5ang isa sang tatlo ka bahin magabantay sa palasyo, kag ang nabilin ibutang sa Pwerta sang Sadsaran. Ang tanan nga mga tawo magatipon sa pasiyuhan sang Templo.

6Wala sing isa nga magsulod sa Templo luas sa mga pari kag mga Levita nga nagaalagad. Magasulod sila, tungod kay ginpakabalaan sila, pero ang nabilin nga mga tawo kinahanglan magtuman sang ginsiling sang Ginoo kag magpabilin sa gwa.

7Ang mga Levita magabantay sa palibot sang Hari bisan diin sia magakadto kag uyatan na nila ang ila mga espada. Ang bisan sin-o nga magtinguha sa pagsulod sa Templo pagapatyon.”

8Ang mga Levita kag ang mga tawo sang Juda nagtuman sa mga sugo ni Joiada. Ang mga tawo wala ginpapauli kon sila tapos na sa ila pag-alagad sa Adlaw nga Inugpahuway, gani ang nagasulod kag nagagwa sa pag-alagad mga tawo sa gihapon sang mga pangulo.

9Si Joiada naghatag sa mga opisyales sang mga bangkaw kag mga taming nga iya ni Haring David nga gintago sa Templo.

10Ginbutang niya ang mga tawo nga nagauyat na sang ila mga espada sa palibot sa atubangan sang Templo, sa pag-apin sa hari.

11Dayon gindala ni Joiada si Joas paggwa, ginkoronahan sia kag ginhatag sa iya ang mga kasugoan nahanungod sa paghari. Gani ginhimo sia nga hari. Si Joiada nga pari kag ang iya mga anak nga lalaki naghaplas kay Joas, kag ang tanan nagsinggit, “Mabuhay ang hari!”

12Nabatian ni Atalia ang mga tawo nga nagahinugyaw para sa hari, gani nagdalidali sia pakadto sa Templo sa diin nagatipon ang mga tawo.

13Didto nakita niya ang bag-o nga hari sa alagyan sang Templo nga nagatindog sa tupad sang haligi nga para sa mga hari, nga ginalibutan sang mga opisyales sang hangaway kag mga manugtrumpeta. Ang tanan nga mga tawo nagahinugyaw kag nagapatunog sang mga trumpeta, kag ang mga musikero sang Templo nagapangulo sa pagsaulog paagi sa pagtukar sang ila mga instrumento. Gingisi ni Atalia ang iya bayu sa kaakig kag nagsinggit, “Pagluib! Pagluib!”

14Indi luyag si Joiada nga patyon si Atalia sa sulod sang Templo, gani gintawag niya ang mga opisyales sang mga hangaway kag nagsiling, “Dalha sia paggwa sa tunga sang nagakubay nga mga gwardya, kag patya ang bisan sin-o nga magtinguha sa pagluwas sa iya.”

15Gindakop nila sia, gindala sa palasyo paagi sa Pwerta sang Kabayo, kag didto ginpatay nila sia.

16Si Joiada nga pari naghimo sing kasugtanan upod sa mga tawo kag kay Haring Joas, nga sila manginkatawhan sang Ginoo.

17Dayon nagkadto sila tanan sa templo ni Baal kag ginguba ini. Ginpangguba nila ang mga altar kag mga diosdios didto kag sa atubangan sang mga altar ginpatay nila si Matan, ang pari ni Baal.

18Ginbutang ni Joiada ang mga pari kag mga Levita sa pagpangulo sang obra sa Templo. Pagahimuon nila ang mga katungdanan nga ginhatag sa ila ni Haring David kag sa pagsunog sang mga halad nga ginadulot sa Ginoo, suno sa Kasugoan sang Ginoo paagi kay Moises. Sila man ang gintugyanan sang mga musika kag sang bisan ano nga mga pagsaulog.

19Ginbutangan man ni Joiada sing mga gwardya ang mga pwerta sang Templo agod indi makasulod ang bisan sin-o nga mahigko.

20Ang mga opisyales sang hangaway, ang mga kinilala nga mga pumoluyo, ang mga opisyales sang banwa, kag ang tanan nga mga tawo nag-upod kay Joiada sa isa ka parada nga nagdala sa hari halin sa Templo pakadto sa palasyo. Nagsulod sila sa mayor nga pwerta, kag ang hari nagpungko sa iya trono.

21Ang tanan nga mga tawo napun-an sing kalipay, kag ang siudad malinong, karon nga si Atalia napatay na.

← Chapter 22 Jump to: Chapter 24 →

Recommended Reading

Commentary 2 Chronicles Commentaries → Devotional 2 Chronicles Devotional Guide → Get This Bible 2012 Study Bible →