2 Chronicles 28

Ilonggo (Maayong Balita nga Biblia (2012))

← Chapter 27 Jump to: Chapter 29 →

1Si Acaz nanginhari sang nagaedad sia sang baynte ka tuig, kag naggahom sia sa Jerusalem sa sulod sing desi-sais ka tuig. Wala sia magsunod sang maayo nga ginhimo sang isa sang iya mga katigulangan nga si Haring David; sa baylo, naghimo sia sang wala nahamut-an sang Ginoo,

2kag ginsunod niya ang ginhimo sang mga hari sang Israel. Nagpahimo sia sing metal nga mga imahen ni Baal,

3nagsunog sang insyenso sa Kapatagan sang Hinom, kag gindulot niya bisan pa ang iya mga anak nga lalaki subong halad nga sinunog sa mga diosdios, sa pagsunod sang makahuloya nga ginahimo sang mga tawo nga gintabog sang Ginoo paggwa sa duta samtang nagapasulod ang mga Israelinhon.

4Sa mga lugar sa diin ginsimba ang mga diosdios, sa mga kabakuloran, kag sa idalom sang magapa nga mga kahoy, si Acaz nagdulot sing mga halad kag nagsunog sang insyenso.

5Tungod sang pagpakasala ni Haring Acaz, gintugot sang Ginoo nga iya Dios nga malutos sia sa hari sang Siria kag madamo nga mga taga-Juda ang gindala pabalik sa Damasco subong mga bihag. Gintugot man sang Ginoo nga malutos sia sa hari sang Israel nga si Peca, anak ni Remalias kag ginpamatay ang 120,000 ka labing maisog nga mga hangaway sang Juda sa isa lang ka adlaw. Ang Ginoo, ang Dios sang ila mga katigulangan, nagtugot sini nga matabo, tungod kay ginbayaan sia sang mga tawo sang Juda.

7Ang isa ka soldado nga si Zicri nga taga-Israel nagpatay sang anak ni Haring Acaz nga si Maasias, si Azrikam nga manugtatap sang palasyo, kag si Elkana nga ikaduha sa hari sa gahom.

8Bisan nga ang mga taga-Juda ila kaparientehan, ang mga Israelinhon nga mga hangaway nagdakop sang 200,000 ka mga babayi kag mga kabataan subong mga bihag kag gindala sila balik sa Samaria, lakip ang madamo nga mga pagkabutang nga naagaw.

9May isa ka propeta sang Ginoo nga ginahingalanan kay Oded nga nagaestar sa siudad sang Samaria. Nasugata niya ang mga hangaway nga Israelinhon nga nagapauli kag nagapasulod sa siudad upod sa mga taga-Juda nga mga bihag kag ginsingganan sila, “Ang Ginoo nga Dios sang inyo mga katigulangan naakig sa Juda kag ginpalutos sila sa inyo, pero ginpamatay ninyo sila sa inyo nagabalingaso nga kaakig.

10Kag karon may tuyo kamo nga uliponon ang mga lalaki kag mga babayi sang Jerusalem kag Juda. Wala bala kamo kahibalo nga nakahimo man kamo sing mga sala batok sa Ginoo nga inyo Dios?

11Pamati kamo sa akon! Ini nga mga bihag inyo mga pariente. Buy-i ninyo sila, kay kon indi ang Dios magasilot sa inyo sa iya kaakig.”

12Ang apat ka mga pangulo sang Naaminhan nga Ginharian, nga amo sanday Azarias nga anak ni Johanan, Berequias nga anak ni Mesillemot, Ezequias nga anak ni Salum, kag Amasa nga anak ni Hadlai nagpamatok man sa mga ginhimo sang mga hangaway.

13Nagsiling sila, “Indi ninyo pagdalha ang mga bihag diri! Nagpakasala na kita batok sa Ginoo, naakig na sia kag sia magasilot sa aton. Karon luyag kamo maghimo sang butang nga magadugang sang aton pagpakasala.”

14Gani ang mga hangaway naghatag sang mga bihag kag mga inagaw sa mga tawo kag sa ila mga pangulo,

15kag ang apat ka mga lalaki ginpili sa paghatag sang panapton sa mga bihag gikan sa inagaw nga mga pagkabutang. Ginhatagan nila sila sang mga panapton kag mga sandalyas nga gamiton, ginhatagan sila sing kalan-on kag ilimnon, kag ginbutangan sang lana sang olivo ang ila mga pilas. Ang mga maluya sa paglakat ginpasakay sa mga asno, kag ang tanan nga mga bihag ginpabalik sa kadutaan sang Juda sa Jerico, ang siudad sang mga palma. Dayon ang mga Israelinhon nagbalik pauli sa Samaria.

16Ang mga Edomnon nagsalakay liwat sang Juda kag nagdakop sang madamo nga mga bihag, gani si Haring Acaz nagdangop kay Tiglat-piliser nga hari sang Asiria sa pagpangayo sing bulig.

18Sa amo man nga tion, ang mga Filistinhon nagsalakay sa mga banwa sa nakatundan sang mga kabakuloran kag sa nabagatnan sang Juda. Gin-agaw nila ang mga siudad sang Bet-semes, Ayalon, kag Gederot, kag ang mga siudad sang Soco, Timna, kag Gimzo lakip ang ila mga barangay, kag nag-estar didto.

19Tungod kay si Haring Acaz sang Juda nagsupak sang mga kinamatarong sang iya mga tawo kag nagbato sa Ginoo, ang Ginoo nagpadala sang mga kagamo sa Juda.

20Ang hari sang Asiria nga si Tiglat-piliser, sa baylo nga magbulig kay Acaz, nagsupak kag naghatag sing gamo sa iya.

21Gani si Acaz nagkuha sang tanan nga manggad sang Templo, sang palasyo, kag sang tanan nga manggad sang panimalay sang mga pangulo sang mga tawo, kag ginhatag ini sa hari sang Asiria, pero ini wala gid makabulig.

22Sang nagadugang ang iya kagamo, si Acaz nagpakasala pa gid sa Ginoo.

23Nagdulot sia sing mga halad sa mga dios sang mga taga-Siria, nga naglutos sa iya. Nagsiling sia, “Ang mga dios sang Siria nagtabang sa mga hari sang Siria, gani kon maghalad ako sa ila, ayhan magabulig man sila sa akon.” Ini nagdala sing kalalat-an sa iya kag sa iya pungsod.

24Wala labot sini, ginkuha niya ang tanan nga mga gamit sang Templo kag gindugmok ini. Ginsirado niya ang Templo kag nagpatindog sang mga altar sa tanan nga lugar sang Jerusalem.

25Sa tagsa ka siudad kag banwa sang Juda nagpatindog sia sang mga lugar sa diin ginasimba ang mga diosdios, kag didto ginasunog ang insyenso para sa dumoluong nga mga dios. Sa sini nga paagi ginpaakig niya ang Ginoo, ang Dios sang iya mga katigulangan.

26Ang iban nga mga hitabo sang iya paggahom, halin sa ginsugoran tubtob sa katapusan, nasulat sa Maragtas sang mga Hari sang Juda kag Israel.

27Si Haring Acaz napatay kag ginlubong sa Jerusalem, pero indi sa lulobngan sang mga hari. Ang iya anak nga si Ezequias nagbulos sa iya subong hari.

← Chapter 27 Jump to: Chapter 29 →