2 Chronicles 4

Ilonggo (Maayong Balita nga Biblia (2012))

← Chapter 3 Jump to: Chapter 5 →

1Si Haring Solomon nagpahimo sang bronsi nga altar, nga traynta ka tapak nga kwadrado kag kinse ka tapak ang kataason.

2Nagpahimo man sia sing manipulon nga tangke nga bronsi nga daw kawa, pito kag tunga ka tapak ang kadalumon, kinse ka tapak ang kasangkaron kag kwarentay singko ka tapak ang palibot.

3Sa bug-os nga palibot sang nagwa nga bibig sang tangke may duha ka idas nga puni nga nagasampaw. Ang mga puni korte sang mga baka nga toro nga unay sa palibot sang tangke.

4Ang tangke nagatungtong sa mga likod sang dose ka toro nga mga baka nga bronsi, nga ang tatlo nagaatubang sa aminhan, ang tatlo nagaatubang sa bagatnan, ang tatlo nagaatubang sa sidlangan, kag ang tatlo nagaatubang sa katundan.

5Ang kadamulon sang tangke tatlo ka pulgada. Ang iya bibig kaangay sang bibig sang tasa nga nagakurba pa gwa kaangay sang mga bukad sang bulak. Ang tangke masudlan sang mga 15,000 ka galon nga tubig.

6Naghimo man sila sang napulo ka labador, ang lima ibutang sa nabagatnan nga kilid sang Templo kag ang lima sa naaminhan nga kilid. Ginagamit ini sa paghugas sang mga bahin sang mga sapat nga sunogon subong mga halad. Ang tubig nga yara sa daku nga tangke gamiton sang mga pari para nga hugasan.

7Naghimo sila sang napulo ka mga kandelirohan nga bulawan suno sa kinaandan nga sulondan nahanungod sini, kag napulo ka mga lamisa kag ginbutang ini sa mayor nga kwarto sang Templo, lima ka mga kandelirohan kag lima ka mga lamisa sa kada kilid. Naghimo man sila sang 100 ka mga yahong nga bulawan.

9Naghimo sila sing nasulod nga pasiyuhan para sa mga pari, kag sang naggwa man nga pasiyuhan. Ang mga sira sa mga pwertahan sa natung-an sang mga pasiyuhan nahaklapan sang bronsi.

10Ang tangke nabutang malapit sa nabagatnan-nasidlangan nga pamusod sang Templo.

11Naghimo man si Huram sang mga kolon, mga pala kag mga yahong. Ginhuman niya ang tanan nga gamit nga iya ginsaad kay Haring Solomon nga iya himuon para sa Templo: Ang duha ka haligi Ang duha ka uloulo sa ibabaw sang haligi nga daw mga yahong Ang desinyo sang pinuna nga mga kadena sa tagsa ka uloulo Ang 400 ka granada nga bronsi nga ginbutang sa duha ka idas palibot sa desinyo sang tagsa ka uloulo Ang napulo ka karo Ang napulo ka labador Ang tangke Ang dose ka mga baka nga toro nga ginatungtongan sang tangke Ang mga kolon, mga pala, kag mga tinidor Si Huram nga pangulo sang sampaton nga mga panday naghimo sini tanan nga mga gamit gikan sa napahining nga bronsi, suno sa ginsugo ni Haring Solomon, agod gamiton sa Templo sang Ginoo.

17Ginpahimo ini sang hari sa lunangon nga duta sa gintung-an sang Sucot kag Zereda sa Kapatagan sang Jordan.

18Tama kadamo sang mga butang nga ginhimo nga wala sing may makahibalo sang bug-os nga kabug-aton sang bronsi nga gingamit.

19Si Haring Solomon nagpahimo man gikan sa bulawan sang tanan nga mga galamiton nga yara sa Templo: ang altar kag ang mga lamisa para sa tinapay nga nahalad sa Dios;

20ang mga kandelirohan kag ang mga suga nga nahimo sa puraw nga bulawan nga pasigahon sa atubangan sang Labing Balaan nga Duog, suno sa plano;

21ang adorno nga mga bulak, ang mga suga, ang mga kimpit sa baga;

22ang mga inugpalong sa suga, ang mga yahong, ang mga pinggan para sa insyenso, kag ang mga balagahan. Ini tanan nga mga gamit nahimo sa puraw nga bulawan. Ang naggwa nga mga pwertahan sang Templo kag ang mga pwertahan pakadto sa Labing Balaan nga Duog nahaklapan sang bulawan.

← Chapter 3 Jump to: Chapter 5 →