2 Chronicles 24

Ilonggo (Maayong Balita nga Biblia (2012))

← Chapter 23 Jump to: Chapter 25 →

1Si Joas nagaedad sang pito ka tuig sang maghari sia sa Juda, kag naggahom sia sa Jerusalem sing kwarenta ka tuig. Ang iya iloy amo si Sibia nga taga-siudad sang Beerseba.

2Si Joas naghimo sing matarong sa panulok sang Ginoo samtang si Joiada nga pari buhi pa.

3Si Joiada nagpili sing duha ka mga asawa para kay Haring Joas, kag nag-anak sila sa iya sing mga anak nga lalaki kag mga babayi.

4Sang maghari si Joas sang pila ka tuig, nagpamat-od sia sa pagpakaayo sang Templo sang Ginoo.

5Ginsugo niya ang mga pari kag mga Levita sa pagkadto sa mga siudad sang Juda kag magtipon gikan sa mga tawo sing nagakaigo nga kwarta para sa tuigan nga pagpakaayo sang Templo. Ginsingganan niya sila nga dalion nila ini, pero ang mga Levita nagpabuyanbuyan,

6gani ginpatawag niya si Joiada, ang ila pangulo, kag nagsiling, “Ngaa bala nga wala mo ginapahimo sa mga Levita ang pagtipon gikan sa Juda kag Jerusalem sang buhis nga ginsiling ni Moises, ang alagad sang Ginoo? Ginakinahanglan sa mga tawo ang pagbayad sang buhis para sa pagsakdag sang Tolda sang presensya sang Ginoo.”

7Ang mga sumolunod ni Atalia, ang malaut nga babayi, nagguba sang Templo kag naggamit sang madamo nga balaan nga mga pagkabutang sa pagsimba kay Baal.

8Nagsugo ang hari sa mga Levita sa paghimo sing kahon para sa amot kag ibutang ini sa pwerta sang Templo.

9Nagpahibalo sila sa bug-os nga Jerusalem kag Juda, sa tanan nga mga tawo sa pagdala sa Ginoo sang buhis nga ginsiling ni Moises, ang alagad sang Dios sang gintipon ini didto sa nahauna nga tion sa desierto.

10Ini naghatag kalipay sa mga tawo kag sa ila mga pangulo, kag gindala nila ang ila buhis kag ginpuno nila ang kahon.

11Kada adlaw ang mga Levita nagadala sang kahon sa opisyal sang hari nga amo ang ginatugyanan sini. Kon mapuno na gani ini, ang sekretaryo sa palasyo kag ang ginatugyanan sang Pinakamataas nga Pari nagkadto, kag magkuha sang kwarta, kag dayon ibalik ang kahon sa iya nga lugar. Sa sini nga paagi, nakatipon sila sang madamo nga kwarta.

12Ang hari kag si Joiada nagahatag sini nga kwarta sa ila nga ginatugyanan sa pagpakaayo sang Templo, kag nagsuhol sila sang mga kantero, mga panday, kag sang mga manugsalsal sang salsalon kag bronsi sa pagpakaayo sang Templo.

13Ang tanan nga mga manug-obra nag-obra gid sing tudotudo, kag gin-uli nila ang Templo sa iya nahauna nga kahimtangan kag mapag-on ini sa gihapon.

14Sang matapos ang pagpakaayo sang Templo, ang sobra sang bulawan kag sang pilak ginhatag sa hari kag sa kay Joiada kag gingamit nila ini sa paghimo sing mga yahong kag sang iban nga mga galamiton para sa Templo. Samtang nagakabuhi pa si Joiada, ang mga halad ginadulot sa Templo pirme.

15Sang makalambot si Joiada sa edad nga 130 ka tuig napatay sia.

16Ginlubong nila sia sa lulobngan sang mga hari sa Siudad ni David, sa pagkilala sang iya pag-alagad para sa mga tawo sang Israel, para sa Dios, kag para sa Templo.

17Pero sang napatay si Joiada, ang mga pangulo sang Juda naghaylo kay Haring Joas sa pagpamati sa ila.

18Ang mga tawo nag-untat sa pagsimba sa Templo sang Ginoo, ang Dios sang ila mga katigulangan, kag nagsimba sa mga diosdios kag sa mga imahen sang diosa nga si Asera. Ang ila mga sala nagpaakig sa Ginoo sa Juda kag sa Jerusalem.

19Ang Ginoo nagpadala sang mga propeta sa pagpaandam sa ila sa pagpabalik sa iya, pero ang mga tawo wala magsapak sa ila.

20Dayon ang Espiritu sang Ginoo naggahom kay Zacarias, anak ni Joiada nga pari. Nagtindog sia sa lugar nga makita sia sang mga tawo kag nagsinggit, “Ang Ginoo nga Dios nagapamangkot sa inyo ngaa wala ninyo gintuman ang iya mga sugo kag nagadala kamo sang kalalat-an sa inyo kaugalingon! Ginbayaan ninyo sia, gani ginbayaan man niya kamo!”

21Si Haring Joas nagbuylog sa pagpatay kay Zacarias kag sa pagmando sang hari, ang mga tawo nagbato kay Zacarias sa pasiyuhan sang Templo.

22Ang hari wala makadumdom sang mainunongon nga pag-alagad sa iya ni Joiada nga amay ni Zacarias, kag ginpapatay niya si Zacarias. Sang tagumatayon si Zacarias, nagsinggit sia, “Kabay ang Ginoo makakita sang imo ginahimo kag magasilot sa imo!”

23Sa katapusan nga bahin sang tuig, ang mga hangaway sang Siria nagsalakay sang Juda kag Jerusalem, ila ginpamatay ang tanan nga mga pangulo, kag nagdala sing madamo nga mga pagkabutang pabalik sa Damasco.

24Ang mga hangaway sang Siria diutay lang, pero ginpalutos sang Ginoo sa ila ang madamo nga mga hangaway sang Juda, tungod kay ang mga tawo nagbiya sa iya, ang Ginoo, ang Dios sang ila mga katigulangan. Sa sini nga paagi, si Haring Joas ginsilutan.

25Napilasan sia sing malubha, kag sang maghalin ang mga kaaway, ang duha sang iya mga opisyales nagplano sa pagpatay sa iya sa iya higdaan sa pagtimalos sang pagpatay sang anak nga lalaki ni Joiada nga pari. Ginlubong sia sa Siudad ni David, pero indi sa lulobngan sang mga hari.

26Ang mga nagplano batok sa iya amo sanday Zabad, anak sang isa ka Amonhon nga babayi nga ginahingalanan kay Simeat, kag Jozabad, anak sang isa ka Moabnon nga babayi nga ginahingalanan kay Simrit.

27Ang Kasaysayan sang Libro sang mga Hari nagalakip sang mga sugilanon sang mga anak ni Joas, ang mga tagna nga ginhambal batok sa iya, kag ang nasulat nahanungod sang iya pagpakaayo sang Templo. Ang iya anak nga si Amasias amo ang nagbulos sa iya subong hari.

← Chapter 23 Jump to: Chapter 25 →

Recommended Reading

Commentary 2 Chronicles Commentaries → Devotional 2 Chronicles Devotional Guide → Get This Bible 2012 Study Bible →