Ezekiel 17

Kirundi (Bibliya Yera 1951, 1967 (Burundi))

← Chapter 16 Jump to: Chapter 18 →

1Maz’ ijambo ry’Uhoraho rinzako,

2riti Mwana w’ umuntu, sōkōranya, ucire inzu ya Isirayeli umugani,

3ut’ Uku ni k’Umwami Uhoraho agize, at’ Inkukuma niniya, y’amababa manini n’amoya maremare, ifise ivyoya vyinshi vy’amabara atar’ amwe, yaje i Lebanoni, ica agatwetwe k’igiti citwa isederi,

4mber’ ikinusakw agatwetwe ko mu bushorishori, ikajana mu gihugu c’ ubudandaza, ikarambika mu gisagara c’abahanjuzi.

5Yābīra kamwe mu mbuto zo mu gihugu, igatera ahantu hamera cane; ikabadika i ruhande y’amazi menshi, igashinga nk’igiti c’umusafusafu.

6Karakura, kaba umuzabibu urandagira uciye hasi, amashami yawo yerekera kuri ya nkukuma, imizi na yo ishōra musi yayo: nuko kaba umuzabibu, ushamika amashami, uzakw imisagaba.

7Hāri n’iyindi nkukuma niniya, ifise amababa manini n’ivyoya vyinshi: maz’ uwo muzabibu werekeza imizi kuri yo, uyitumberezako n’amashami, uri mu ntabire aho watewe, kugira ngw iwuvomere.

8Watewe heza hafi y’ amazi menshi, kugira ng’ ushamike amashami, wame, ube umuzabibu mwiza.

9Enda vuga, ut’ Uku ni k’Umwami Uhoraho abaza, ngo Mbeg’ uzototahara? Ya nkukuma ya mbere mbega ntizowurandura imizi, ikawuhanyagurakw inzabibu, kugira ngo wume, n’ibibabi biremvye ngo bikabirane? Mbere kuwusiturana n’ imizi yawo ntivyonanirana, canke ngo birinde gukoranya ingabo.

10Waratewe koko, ariko mbeg’ uzototahara? Umuyaga w’i burasirazuba ni wawushikako ntuzoca wuma mbega? Uzokwumira mu ntabire aho wakuriye.

11Ijambo ry’Uhoraho ryongera kunzako,

12rit’ Enda barira iyo nzu y’abagarariji, uti Mbega ntimuzi ingen’ ivyo bisobanurwa? Ubabgire, uti Rāba, umwami w’i Babuloni yaje i Yerusalemu, ata mu maboko umwami waho n’abaganwa biwe, abajana i we i Babuloni;

13atoranya uwo mu nda y’ ingoma, ashirah’ isezerano na we, amwaka indahiro; kand’ ajana n’ abahambaye bo mu gihugu,

14kugira ng’ubgami bucishwe bugufi, bgoye kuja hejuru, ariko buhagarikwe no kuguma mw isezerano ryiwe.

15Yamar’ aramugarariza, atuma intumwa ziwe muri Egiputa, gusaba ngo bamuhe amafarasi n’ingabo nyinshi. Mbeg’ ūkora ibisa birtyo azororanirwa, canke se arokoke? Yokwica isezerano kand’ akarokoka?

16Ndahiye ukubaho kwanje, ni k’Umwami Uhoraho agize: ku murwa nyene w’umwami yamwimitse, uwo yarahiye indahiro, akayihindura ubusa, akica n’isezerano ryiwe, aho ni ho nyene azogwa, ari hafi yiwe i Babuloni.

17Kandi Farawo, n’ingabo ziwe zihambaye n’ibitero vyinshi, nta co azomumarira mur’ iyo ntambara, igihe bazorunda ibigunguzi vyo kwūririrako, bakubaka ibihome, kugira ngo bageseze abantu benshi.

18Kukw iyo ndahiro yarahiye yayihinduje ubusa kwica isezerano; mbere yari yaramanitse ukuboko arahira, kandi none yakoze ivyo vyose: eka ntazorokoka.

19Nuko rero, uku ni k’Umwami Uhoraho agize, ati Ndahiye ukubaho kwanje: indahiro yanje yahinduye ubusa, n’isezerano ryanje yishe, nzobimusubiza ku mutwe.

20Kandi nzomutega ururiba rwanje, afatwe n’umutego wanje, ndamujane i Babuloni, abe ari ho ndamushirira mu rukinja kubg’ ibicumuro yancumuyeko.

21Kand’ impunzi zo mu ngabo ziwe zose zizohindikiranywa n’inkota, na bo abasigaye bazoshwiragirizwa mu birēre vyose: kandi muzomenya yuko jewe Uhoraho nabivuze.

22Uku ni k’Umwami Uhoraho agize, ati Nanje nzoca agatwetwe ko hejuru ku giti c’isederi, ndagatere; mbere nkinusekw agatwetwe koroshe ko mu bushorishori, ngatere ku mpinga y’umusozi muremure ahibonekeza:

23ku musozi muremure w’i Bgisirayeli ni ho nzogatera; na ko kazoshamika amashami, kame imbuto, kabe igiti c’isederi ciza; kand’ inyoni n’ ibisīga vyose vy’amoko yose bizokwibera musi yaco; mu gitūtu c’amashami yaco ni ho bizoba.

24Maz’ ibiti vyose vyo mw ishamba bizomenya yuko jewe Uhoraho nacishije bugufi igiti kirekire, nshira hejuru igiti kigufi, numishije igiti gitotahaye, ntotahaza igiti cumye: jewe Uhoraho narabivuze, ndabishitsa.

← Chapter 16 Jump to: Chapter 18 →