Ezekiel 29

Kirundi (Bibliya Yera 1951, 1967 (Burundi))

← Chapter 28 Jump to: Chapter 30 →

1Mu mwaka w’icumi, mu kwezi kw’icumi, ku musi ugira icumi na kabiri w’ukwo kwezi, ijambo ry’Uhoraho ryanjeko,

2riti Mwana w’umuntu, tungīra ijisho ryawe Farawo umwami wa Egiputa, umubūrire, ubūrire na Egiputa hose:

3uvuge, ut’ Uku ni k’Umwami Uhoraho agize, at’ Ehe nzohigūra nawe, ewe Farawo mwami wa Egiputa, wa ngona ihambaye, yigaramangira hagati y’inzūzi zayo, wagize ng’ Uruzi rwawe n’urwawe bgite, kandi ngo Ni wewe warwiremeye ubgawe.

4Ehe ngira nshire igera mu mibangabanga yawe, ntume amafi yo mu nzūzi zawe amatana n’ibigaragamba vyawe; kandi nzokuroba ngukūre mu nzūzi zawe, n’amafi yose yo mu nzūzi zawe amatanye n’ibigaragamba vyawe.

5Kandi nzogushiburira mu bugaragwa, mwe n’amafi yose yo mu nzūzi zawe: uzogwa mu gahinga ka sabaderi; ntuzoruha unobga canke ngo wēgeranywe; naragutanze ng’ ube ivyo kurya vy’ibikōko vyo kw isi n’ibisīga vyo mu kirēre.

6Maz’ ababa muri Egiputa bose bazomenya yuko nd’Uhoraho; kuko wabereye inzu ya Isirayeli inkoni y’ irenga.

7Igihe bakwifadikiza mu kuboko waravunitse, utobekeranya ibitugu vyabo vyose: ngo bakwishimikize urakenyuka, utuma imikinya yabo yose itetera.

8Nuko rero, uku ni k’Umwami Uhoraho agize, at’ Ehe ngira ngutērēre inkota, nkuranduremw’ abantu n’ ibitungano.

9Kand’ igihugu ca Egiputa kizohinduka amatongo n’ imisaka: maze bazomenya yuko nd’ Uhoraho. Ko wavuze ng’ Uruzi n’urwawe, ngo Ni wewe waruremye;

10nuko rero, rāba, tuzohigūra, mwe n’inzūzi zawe, kand’ igihugu ca Egiputa nzogihindura imisaka vyeruye n’ amatongo, uhereye ku munara w’i Sevene ugashitsa ku rubibe rwo muri Etiyopiya.

11Nta kirenge c’umuntu kizoba kikihahita, cank’ urwara rw’igitungwa, kandi hazomara imyaka mirongwine ata kikihaba.

12Kandi nzohindura igihugu ca Egiputa amatongo hagati y’ibindi bihugu vyacitse amatongo, n’ibisagara vyaho biharūwe mu bindi bisagara vyacitse imisaka, bizoba amatongo kumara imyaka mirongwine: kand’ Abanyegiputa nzobasābagiriza mu yandi mahanga, mbashwiragirize mu bindi bihugu.

13Kuk’ ukw ari k’Umwami Uhoraho agize, at’ Imyaka mirongwine ni yashira, nzokoranya Abanyegiputa mbakūre mu mahanga iyo bāsābagirijwe;

14kandi nzotuma Abanyegiputa bahindukira, bave mu ngoyi zabo, mbasubize mu gihugu c’i Patirosi, ari co c’amāmo yabo; maze bazohagirira ubgami bg’inkēngērwa.

15Buzoba ubgami bukēngēretse hanyuma y’ubundi bgose, kandi nta ho bazokwongera kwishira hejuru ku yandi mahanga: nzobahindura inkehwa, kugira ngo ntibaze basubire kuganza ayandi mahanga ukundi.

16Kandi ntibazokwongera kubera ab’ inzu ya Isirayeli ivyizigiro, ngo batume ibigabitanyo vyibukwa vy’igihe bābīsunga: maze bazomenya yuko nd’ Umwami Uhoraho.

17Maze mu mwaka wa mirongwibiri n’indwi mu kwezi kwa mbere, ku musi wa mbere w’ukwo kwezi, ijambo ry’Uhoraho ryanjeko,

18riti Mwana w’umuntu, Nebukadineza, umwami w’i Babuloni, yakoresheje ingabo ziwe igikorwa gikomeye aho yatera i Tiro: imitwe yazo yose yatobotse ubuhanza, no ku rutugu hose haramyoka: yamara nta ngororano yabonye, cank’ ingabo ziwe, mu vy’i Tiro, kubg’ igikorwa gikomeye yakoze, aho yahatera.

19Nuko rero, uku ni k’Umwami Uhoraho agize, at’ Eh’ igihugu ca Egiputa ngira nkigomorere Nebukadineza umwami w’i Babuloni; azojana abantu baho b’isinzi ar’ inyagano, ajane n’iminyago yaho n’ isahu yaho; ivyo bizoba ingororano z’ingabo ziwe.

20Ndamuhaye igihugu ca Egiputa kw ingororano c’ivyo yankoreye, kukw ari jewe bākoreye, ni k’Umwami Uhoraho agize.

21Kur’ uwo musi nzomereza ab’ inzu ya Isirayeli ihembe; nawe nzoguha guteranurira akanwa hagati muri bo; maze bazomenya yuko nd’ Uhoraho.

← Chapter 28 Jump to: Chapter 30 →