Ezekiel 40 — Kirundi (Bibliya Yera 1951, 1967 (Burundi))

1Mu mwaka ugira mirongwibiri na gatanu uhereye aho twambukaniwe tur’ inyagano, kw itanguriro ry’umwaka, ku musi w’ icumi w’ukwezi, hashize imyaka cumi n’ine igisagara gitsinzwe, kur’ uwo musi nyene, ukuboko kw’Uhoraho kwanjeko, maz’ anjanayo.

2Mur’ ukwo kwerekwa n’Imana, mbona anjanye mu gihugu c’i Bgisirayeli, antereka ku musozi muremure cane, urikw icubatswe nk’igisagara aherekeye i bumanuko.

3Nukw anshikanaho, ngize ntya mbona umuntu ahagaze ku kirimba, afise umugozi w’ubugwegwe mu ntoke, n’irenga ry’ikigeresho.

4Maz’ uwo muntu arambarira, ati Mwana w’umuntu, urakanura manini, wumvishe amatwi yawe, ushire umutima ku vyo ngira nkwereke vyose; kukw icatumye uzanwa hano kwar’ ukugira ngo mbikwereke: ivyo ubona vyose ubimenyeshe ab’ inzu ya Isirayeli.

5Mbona urugo rw’amabuye rukikije ingoro impande zose; kandi wa muntu yari n’irenga ry’ ikigeresho mu ntoke; uburebure bgaryo bgār’ amatambge atandatu y’ukuboko uciriye mu nkokora, itambge ryose rirenzekw itambge ry’intoke; nukw agera intimba y’urwo rugo, iba irenga rimwe, n’uburebure bg’igihagararo buba irenga rimwe nyene.

6Nukw aza ku kirimba cerekeye i burasirazuba, adondagira ku ngazi y’amabuye yaho; agera ishikiro ry’ikirimba, ubgaguke bgaho buba irenga rimwe.

7Icumba cose c’abashibamyi, uburebure bgaco buba irenga rimwe, n’ubgaguke bgaco buba irenga rimwe nyene; hagati y’ ivyo vyumba hāri haciye amatambge atanu y’ukuboko uciriye mu nkokora; no mw ishikiro ry’ikirimba ryo ku rubaraza rwaco, aherekeye ku ngoro, haba irenga rimwe.

8Agera n’urubaraza rw’ikirimba rurābana n’ingoro, ruba irenga rimwe.

9Maz’ agera amakika y’urwo rubaraza rw’ikirimba, ruba amatambge munani y’ukuboko uciriye mu nkokora; agera n’ibishimaryango vyaho, biba amatambge abiri; kand’ urwo rubaraza rw’ ikirimba rwar’ aherekeye ku ngoro.

10Ivyumba bigendanye ico kirirīsi c’ikirimba cerekeye i burasirazuba vyāri bitatu ku ruhande rumwe, n’ibindi bitatu ku rundi; vyose ukw ari bitatu‐bitatu vyāri cabugerwe; n’ibishimaryango impande zompi vyāri cabugerwe.

11Agera ubgaguke bgo hagati y’ibirimba, buba amatambge cumi; kand’ uburebure bg’ikirimba buba amatambge cumi n’atatu;

12imirēre yaca imbere y’ivyo vyumba yar’ iy’ itambge rimwe ku ruhande rumwe, n’iyindi mirēre yar’ iy’ itambge rimwe ku rundi; n’ivyo vyumba nyene vyār’ amatambge atandatu y’amakika n’ayandi atandatu y’amadūga.

13Maz’ agera ico kirimba, ahereye hejuru ku cumba kimwe agashitsa ku kindi: ubgaguke buba amatambge mirongwibiri n’atanu, uk’ umuryango urābana n’uwundi.

14Aharūra amatambge mirongwitandatu y’ ibishimaryango; kand’ urugo rwagarukira kur’ ivyo bishimaryango, imbere y’ikirimba.

15Uhereye inyuma mw ishikiro ry’ikirimba ugashitsa ku rubaraza rw’ikirimba rw’imbere yar’ amatambge mirongwitanu.

16Kandi hār’ amadirisha atugururwa kur’ ivyo vyumba, no ku bishimaryango n’uko, aharābana n’imbere mu kirimba impande zose, n’urubaraza nyene; amadirisha yar’ impande zose z’ imbere; kandi ku gishimaryango cose hāri hashushanijwekw ibigazi.

17Maz’ anshikana mu rugo rwo mu ntangaro; mbona ivyumba n’ umusezero w’amabuye ujanye urugo impande zose: hār’ ivyumba mirongwitatu kur’ uwo musezero.

18Mu mpande z’ibirimba ni ho uwo musezero wagendera, uringaniye n’ikirirīsi c’ikirimba cose, ni wo musezero wo mu ntangaro.

19Maz’ agera uburebure ahereye imbere y’ikirimba c’intangaro, ashitsa mw ishikiro ry’ikirimba c’ inyubakwa, haba amatambge hamwe ijana ahandi ijana y’ukuboko uciriye mu nkokora, i burasirazuba n’i burārūko.

20Agera uburebure bg’ikirirīsi c’ikirimba c’intangaro kirābana n’i burārūko, agera n’ ubgaguke bgaco.

21Ivyumba bigendanye ikirirīsi caco vyāri bitatu ku ruhande rumwe n’ibindi bitatu ku rundi; n’ibishimaryango vyaco n’urubaraza rwaco vyāri cabugerwe n’ivy’ ikirimba ca mbere: ikirirīsi caco kiba amatambge mirongwitanu y’ukuboko uciriye mu nkokora, n’ubgaguke buba mirongwibiri n’atanu.

22Amadirisha yo kuri co n’amabaraza yaco, n’ ibigazi bishushanijwe kuri co, vyāri cabugerwe n’ivy’ ikirimba kirābana n’i burasirazuba; abāhashika bādondagira ku ngazi y’ amabuye y’intambuko ndwi; kand’ amabaraza yaco yar’ ahahera imbere.

23Inyubakwa yar’ ifise ikirimba kirābana n’ico kirimba c’intangaro aherekeye i burārūko, kandi n’ibirimba vyerekeye i burasirazuba ni ko vyari bimeze; maz’ agera ahereye ku kirimba kimwe agashika ku kindi, biba amatambge ijana y’ukuboko uciriye mu nkokora.

24Maz’ anjana aherekeye i bumanuko; ngize ntya mbona har’ ikirimba kirābana n’i bumanuko; agera ibishimaryango vyaco n’ amabaraza yaco, nk’ukw amatambge ya mbere yangana.

25Kandi kuri co hārikw amadirisha bo no ku mabaraza yaco impande zose, nka ya madirisha ya mbere: uburebure bg’ikirirīsi caco buba amatambge mirongwitanu, n’ubgaguke bgaco buba mirongwibiri n’ atanu.

26Kuhashika kwār’ ukudondagira ku ngazi y’amabuye y’intambuko ndwi; kand’ amabaraza yaco yar’ ahahera imbere: kandi cāri gishushanijwekw ibigazi, kimwe ku ruhande rumwe ikindi ku rundi, ku bishimaryango vyaco.

27Kandi hāri n’ikirimba kija mu nyubakwa ku ruhande rw’i bumanuko: maz’ agera ahereye kur’ ico kirimba agashika ku kindi, biba amatambge ijana y’ukuboko uciriye mu nkokora.

28Maz’ anshikana mu nyubakwa ancishije mur’ ico kirimba c’ ahahera i bumanuko: arakigera, gihwana n’ukw amatambge ya mbere angana;

29agera n’ivyumba bigendanye ikirirīsi caco, n’ ibishimaryango vyaco, n’amabaraza yaco, bihwana n’ukw amatambge ya mbere angana: kandi kuri co hārikw amadirisha bo no ku mabaraza yaco impande zose: uburebure bg’ikirirīsi caco buba amatambge mirongwitanu, n’ubgaguke bgaco buba mirongwibiri n’ atanu.

30Kandi hār’ amabaraza ahakikije, uburebure bgayo bgār’ amatambge mirongwibiri n’atanu, ubgaguke bgayo bgār’ atanu.

31Ayo mabaraza yaco yar’ ahahera mu ntangaro; ku bishimaryango vyaco hari hashushanijwekw ibigazi: kuhashika kwār’ ukudondagira ku ngazi y’amabuye y’intambuko munani.

32Maz’ anshikana mu nyubakwa ahahera i burasirazuba: agera ikirimba caho, gihwana n’ukw amatambge ya mbere angana;

33agera n’ivyumba bigendanye ikirirīsi caco, n’ibishimaryango vyaco, n’amabaraza yaco, bihwana n’ukw amatambge ya mbere angana: kandi kuri co hārikw amadirisha bo no ku mabaraza yaco impande zose: uburebure bg’ ikirirīsi caco buba amatambge mirongwitanu, n’ubgaguke bgaco buba mirongwibiri n’atanu.

34Amabaraza yaco yar’ ahahera mu ntangaro; ku bishimaryango vyaco hāri hashushanijwekw ibigazi ku ruhande rumwe no ku rundi; kuhashika kwār’ ukudondagira ku ngazi y’amabuye y’intambuko munani.

35Maz’ anshikana ku kirimba c’ahahera i burārūko; arakigera, gihwana n’ukw amatambge ya mbere angana;

36agera n’ivyumba bigendanye ikirirīsi caco, n’ ibishimaryango vyaco, n’amabaraza yaco, kandi kuri co hārikw amadirisha impande zose: uburebure bg’ikirirīsi caco buba amatambge mirongwitanu, n’ubgaguke bgaco buba mirongwibiri n’atanu.

37Ibishimaryango vyaco vyār’ ahahera mu ntangaro; kur’ ivyo bishimaryango hāri hashushanijwekw ibigazi ku ruhande rumwe no ku rundi; kuhashika kwār’ ukudondagira ku ngazi y’amabuye y’intambuko munani.

38Kandi hār’ akumba gafise umuryango urābana n’ibishimaryango vy’ico kirimba; aho ni ho bāronga ibimazi vyo kwoswa.

39No ku rubaraza rw’ikirimba hār’ ameza abiri ku ruhande rumwe, n’ ayandi abiri ku rundi, yo kubāgirakw ibimazi vyo kwoswa n’ibimazi bitangirwa ivyaha n’ibimazi bitangirwa ibicumuro.

40Ku ruhande rw’inyuma, mw ishikiro aho badūgira mu kirimba kirābana n’i burārūko, hār’ ameza abiri, no ku rundi ruhande aharābana n’urubaraza rwo ku kirimba, hār’ ayandi abiri.

41Ku ruhande rumwe hār’ ameza ane, no ku rundi yandi ane, aho nyene ku kirimba; ayo meza ukw ar’ umunani bāyabāgirakw ibimazi.

42Kandi hāri n’ameza ane y’ibimazi vyo kwoswa, yubakishijwe amabuye abājwe; uburebure bgayo bgār’ itambge rimwe n’igihimba ry’ukuboko uciriye mu nkokora, n’ubgaguke bgayo rimwe n’igihimba nyene, n’igihagararo cayo cār’ itambge rimwe: aho ni ho bāfasha ibikoreshwa vyo kubāgisha ibimazi vyo kwoswa n’ ibindi bimazi.

43Hāri n’imambo zinegagiye ku nzu imbere impande zose; uburebure bgazo bgar’ itambge rimwe ry’intoke; kandi ku meza hār’ inyama zo guhēreza.

44Hepfo y’ikirimba c’inyubakwa hār’ ivyumba vy’abaririmvyi imbere mu nyubakwa, i ruhande y’ ikirimba c’ahahera i burārūko, birābana n’i bumanuko; kimwe cār’ i ruhande y’ikirimba c’ahahera i burasirazuba, kirābana n’i burārūko.

45Maz’ arambarira, at’ Iki cumba kirābana n’i bumanuko n’ic’ abaherezi bājejwe ingoro.

46Kand’ icumba kirābana n’i burārūko n’ic’ abaherezi bājejwe igicaniro: ari bo bene Sadoki, ni bo bo mu ruvyaro rwa Lewi bēgēra Uhoraho ngo bamukorere.

47Nukw agera inyubakwa, uburebure buba amatambge ijana y’ ukuboko uciriye mu nkokora, n’ ubgaguke buba amatambge ijana nyene, ingana impande zose ukw ari zine; kand’ igicaniro cār’ imbere y’ingoro.

48Maz’ anshikana ku rubaraza rw’ingoro, agera ibisapfu vyompi vyo ku rubaraza, biba amatambge atanu ku ruhande rumwe n’ayandi atanu ku rundi: n’amakika y’ivyo bisapfu aba atatu ku ruhande rumwe n’ayandi atatu ku rundi.

49Uburebure bg’urubaraza bgār’ amatambge mirongwibiri, n’ubgaguke bgar’ icumi na rimwe; kuhashika kwar’ ukudondagira ku ngazi y’amabuye; kandi hār’ inkingi imbere y’ivyo bisapfu, imwe ku ruhande rumwe, iyindi ku rundi.