Ezekiel 42

Kirundi (Bibliya Yera 1951, 1967 (Burundi))

← Chapter 41 Jump to: Chapter 43 →

1Maz’ ankūrayo, anshikana mu ntangaro, aherekeye i burārūko; anyinjiza mu nzu irimw’ ivyumba irābana na wa mwanya uciye hagati, irābana n’ingoro, ahahera i burārūko.

2Uruhande rwarimw’ urugi rw’aharābana n’i burārūko, uburebure bgaho bg’ amakika bgar’ amatambge ijana y’ukuboko uciriye mu nkokora, ubgaguke na bgo bgar’ amatambge mirongwitanu.

3Iyo nzu yari n’ amabaraza agerekeranye mu mirongo itatu, arābana n’ah’ amatambge mirongwibiri ho mu nyubakwa, kand’ arābana na wa musezero w’amabuye wo mu ntangaro.

4Imbere y’iyo nzu irimw’ ivyumba hār’ inzira, ubgaguke bgayo bgar’ amatambge cumi, hāri n’akayira k’itambge rimwe; kand’ imiryango y’ivyo vyumba yarāba i burārūko.

5Ivyumba vyo hejuru vyarutwa n’ivyo hasi bo n’ivyo hagati mur’ iyo nzu, kuko vyakehejwe n’amabaraza yavyo.

6Kuko vyubatswe mu mirongo itatu igerekeranye, ariko bidafise inkingi nk’izo mu rugo: bituma ivyumba vyo hejuru biba impfunda kurenza ivyo hasi n’ivyo hagati.

7Igisika c’ahahera inyuma y’inzu irimw’ ivyumba kirābana no mu ntangaro imbere y’ibindi vyumba, uburebure bgaco bgar’ amatambge mirongwitanu y’ukuboko uciriye mu nkokora.

8Kuko vya vyumba birāba mu ntangaro, uburebure bgavyo bgār’ amatambge mirongwitanu; arik’ ubg’ ibir’ imbere y’urusengero vyo bgar’ amatambge ijana.

9Musi y’ivyo vyumba hār’ icanzo, ahahera i burasirazuba, cācibgamwo n’abajayo bava mu ntangaro.

10Mu ntimba y’urugo rw’amabuye rw’inyubakwa ahahera i burasirazuba, na ho hār’ ivyumba, vyar’ imbere y’umwanya uciye hagati, imbere y’ingoro.

11Inzira yaca imbere yavyo yasa n’iyaca imbere y’ivyumba vy’ aherekeye i burārūko; ivyo hino n’ ivyo hirya vyose vyari cabugerwe mu burebure no mu bgaguke, n’ imiryango yavyo yose na yo yar’ uburyo bumwe, n’inzugi zavyo ni nk’uko.

12Inzugi z’ivyumba vy’aherekeye i bumanuko na zo ni ko zari zimeze. Ku mutwe w’ inzira, ari yo nzira yo mu nyubakwa irābana n’i burasirazuba, hār’ icanzo, cācibgamwo n’abajayo.

13Maz’ arambarira, at’ Ivyumba vy’ahahera i burārūko n’ivy’ ahahera i bumanuko bihereranye na wa mwanya uciye hagati, ivyo n’ ivyumba vyera, ah’ ibintu vyera cane bizorīrwa n’abaherezi bahora bēgēra Uhoraho; aho ni ho bazotereka ivyera cane, n’ishikanwa ry’ifu, n’ikimazi gitangirwa ivyaha, n’ikimazi gitangirwa ibicumuro; kukw ar’ ahantu hēra.

14Abaherezi iyo binjiye ahēra, ntibaze baveyo ngo baje mu ntangaro, badasizey’ imyambaro yabo y’ubuherezi, kukw ar’ iyera; ariko bambare iyindi myambaro, babone kwegerana n’abantu.

15Nukw arangije kugera imbere mu ngoro, ancisha mu kirimba kirāba i burasirazuba, agera urugo impande zose.

16Agera ku ruhande rw’i burasirazuba, ageresheje irenga ry’ikigeresho, ruba amatambge amajana atanu y’irenga kur’ urwo ruhande rwose.

17Maz’ agera ku ruhande rw’i burārūko, ruba amatambge amajana atanu y’iryo renga ry’ikigeresho kur’ urwo ruhande rwose.

18Agera uruhande rw’i bumanuko, ruba amatambge amajana atanu y’iryo renga ry’ikigeresho.

19Maz’ ahindukirira mu ruhande rw’i burengerazuba, ahageresha iryo renga ry’ikigeresho, ruba amatambge amajana atanu nyene.

20Uko ni ko yageze izo mpande ukw ari zine: urugo rwari ruhakikuje impande zose, uburebure bgarwo bgar’ amatambge amajana atanu, n’ubgaguke bgarwo yandi majana atanu nyene; urwo rugo rwar’ urwo gutandukanya ahēra n’ahatar’ ahēra.

← Chapter 41 Jump to: Chapter 43 →