Ezekiel 21

Kirundi (Bibliya Yera 1951, 1967 (Burundi))

← Chapter 20 Jump to: Chapter 22 →

1Ijambo ry’Uhoraho rinzako,

2riti Mwana w’umuntu, tungīra ijisho ryawe i Yerusalemu, utume ijambo ryawe ahēra h’ urusengero, ubūrire igihugu c’i Bgisirayeli;

3ico gihugu ukibarire, ut’ Uku ni k’Uhoraho agize: ngw Ehe nzohigūra namwe, kandi ngira nsokōre inkota yanje mu rwubati rwayo, ndirike abagororotsi n’abanyakibi muri wewe.

4Nuko rero, kuko ngira ndirike abagororotsi n’abanyakibi muri wewe, ni co gituma inkota yanje igira ive mu rwubati rwayo itere abafise umubiri bose, uhereye i bumanuko ugashitsa i burārūko:

5maz’ abafise umubiri bose bazomenya yuko jewe, Uhoraho, nasokoye inkota yanje mu rwubati rwayo; ntizosubira muri rwo ukundi.

6Nukw enda niha, ewe mwana w’umuntu, unihire imbere yabo kubg’ umutima usāvye no kubg’ intuntu nyinshi.

7Maze ni bakubaza, ngw Igituma uniha n’ iki? uz’ ubabgire, uti Mbitewe n’ inkuru mbi y’ibigira bize; umutima wose uzohababuka, amaboko yose adendebuke; umushaha wose uzocika ivutu, n’amavi yose aregarege acike nk’amazi: ehe biraje, bigira bishireko, ni k’ Umwami Uhoraho agize.

8Maz’ ijambo ry’Uhoraho rinzako,

9riti Mwana w’umuntu, vuga ubūre, ut’ Uku ni k’Uhoraho agize, ngo ni mvuge, nt’ Inkota, inkota, irakarihijwe kand’ irartyorowe;

10yakarihijwe kugira ngw iririke; yartyorowe kugira ngw ibe nk’umuravyo: none twoja aho, tukitwengera? Inkoni y’umwana wanje igaya izindi zakūwe mu giti cose.

11Iyo nkota yatanzwe ngw irtyororwe ngw ibone gukoreshwa: iyo nkota yakarihijwe, mbere yartyorowe, kugira ngw ishirwe mu kuboko kw’ūririka.

12Turikisha uboroge, mwana w’umuntu, kukw ibanguriwe abantu banje, ibanguriwe abaganwa bose b’Abisirayeli: bagerewe inkota hamwe n’abantu banje: shirako wishishitire.

13Kukw amateka aciwe: kandi namb’ iyo nkoni yagayana itakiriho, vyomera bite? ni k’Umwami Uhoraho abaza.

14Nuko rero weho, mwana w’umuntu, ubūre, ukubite amashi ku yandi: inkota n’ikubite kabiri, mbere n’ubugira gatatu, ni yo nkota ikomeretsa akagīrīre: inkota yakomerekeje ūhambaye akagīrīre, ni yo yinjiye no mu mazu yabo.

15Kand’ iyo nkota iteye ubgoba nayibanguye ku marembo yabo yose, kugira ngw imitima yabo iyagire mu nda, n’ ugutsitara kwabo kwongerekane. Yō! Imeze nk’umuravyo, yasongorewe kuririka.

16Wa nkota we, ikazanure, utere i buryo; itegure, utere i bubamfu, aho werekeye hose!

17Nanje n’uko nzokubita amashi ku yandi, kandi nzokwimara ishavu: ni jewe Uhoraho mbivuze.

18Ijambo ry’Uhoraho ryongera kunzako,

19rit’ Ikindi kandi, mwana w’umuntu, toborera inzira zibiri inkota y’umwami w’i Babuloni ngw ibone kuza; zompi zizova mu gihugu kimwe: uheze ushireh’ icapa, ugishire ah’ inzira ija ku murwa ishamikiye.

20Utoborere inzira iyo nkota ngw ije ahitwa i Raba h’ubgoko bg’Abamoni, n’iyindi ngw ije i Buyuda i Yerusalemu hazitijwe inzitiro z’ amabuye.

21Kuk’ umwami w’i Babuloni ahagaze mu mayirabiri, ah’ izo nzira zompi zishamikiye, kugira ngw araguze: azungagiza imyampi, akaraguza ibigirwamana vyitwa terafimu, agasuzuma igitigu.

22Mu kuboko kwiwe kw’i buryo ni ho haranze i Yerusalemu, ngw ahomvoze inzitiro zaho ibiti vy’imigogo, yasamire abazoharirikirwa, ashire hejuru avuze akarūru, ahomvoze amarembo ibiti vy’ imigogo, akirundire ibigunguzi vyo kwūririrako, yubake n’ibihome vyo kuhatera.

23Arikw ab’i Yerusalemu bo bazovyita nk’indagu z’ ibinyoma, kubg’ indahiro bābarahiye: arikw azokwibuka ibigabitanyo vyabo, kandi ni vyo bizotuma bafatwa.

24Nuko rer’ uku ni k’Umwami Uhoraho agize, ati Ko mwatumye ibigabitanyo vyanyu vyibukwa, ibicumuro vyanyu bigatwikururwa, bigatuma ivyaha vyanyu biserukira mu bikorwa vyanyu vyose, kandi ko mwibutswe, muzofatwa ukuboko.

25Nawe, wa munyakibi wakomerekejwe akagīrīre, wa mwami w’Abisirayeli, washitsweko n’umusi wawe, igihe giherahereza ibigabitanyo vyawe;

26uku ni k’Umwami Uhoraho agize, ati Kūra umugāra, wiyambure igitsibo; ntibizosubira kumera nk’ uko vyari bisanzwe. Icāri hasi kizoshirwa hejuru, kand’ icāri hejuru kizosubizwa hasi.

27Amatongo, amatongo, nzobigira amatongo masa: kandi ni ko bizokwama, gushitsa igihe nyenevyo azozira; nanje nzobimuha.

28Nawe, mwana w’umuntu, vuga ubūre, ut’ Uku ni k’Umwami Uhoraho agize ku vy’ubgoko bg’ Abamoni, no ku vy’igitutsi cabgo; maz’ uvuge, ut’ Inkota, inkota irasokowe, yartyororewe kuririka, kugira ngw imaririkanye, ibe nk’ umuravyo:

29bākuroteye inzozi z’ubusa, n’indagu z’ibinyoma, ngo ni wewe uzoyibangurira ku mazosi y’abanyakibi bākomerekejwe akagīrīre, abo umusi wabo washitseko, mu gihe giherahereza ibigabitanyo vyabo.

30Yisubize mu rwubati rwayo. Ahantu waremewe, mu gihugu wavukiyemwo, aho ni ho nzogucirira urubanza.

31Kandi nzokurekurirak’ ubushangashirwe bganje, nkwakirizek’ umuriro w’ uburake bganje, nkugabure mu maboko y’abantu bameze nk’ibikōko, bazi guhonnya.

32Uzoba inkwi z’umuriro; n’amaraso yawe azodēngēra hagati mu gihugu; kandi ntuzosubira kwibukwa ukundi: kuko jewe Uhoraho mbivuze.

← Chapter 20 Jump to: Chapter 22 →