Ezekiel 32

Kirundi (Bibliya Yera 1951, 1967 (Burundi))

← Chapter 31 Jump to: Chapter 33 →

1Maze mu mwaka w’icumi na kabiri, mu kwezi kw’ icumi na kabiri, ku musi wa mbere w’ukwo kwezi, ijambo ry’Uhoraho ryanjeko,

2riti Mwana w’umuntu, cura intimba uririre Farawo umwami wa Egiputa, umubgire, uti War’ ūhwanye n’umugunza w’ intambge yo mu mahanga; yamar’ umeze nk’ingona iri mu kiyaga; widimbagura mu nzūzi zawe, amazi uyatobesha ibirenge, uca iyondoyondo inzūzi zabo.

3Uku ni k’Umwami Uhoraho agize, ati Nzoguhwikiza urusenga rwanje, ndi kumwe n’igitero c’abanyamahanga benshi; kandi bazogukwegesha urusenga rwanje.

4Kandi nzogusiga ngaho i musozi, ngushiburire mu gahinga ka sabaderi, kandi nzotuma ibiguruka vyose vyo mu kirēre biguhundarako, n’ ibikōko vyo kw isi yose nzobihāza inyama zawe.

5Mbere nzokwiragiza inyama zawe ku misozi, n’ imyonga ndayuzuze ubutumbazi bgawe.

6Kand’ igihugu ugenda wogamwo nzogitotesha amaraso yawe gushitsa no ku misozi miremire; n’ibihoro vy’imigezi bizokwuzura wewe.

7Igihe nzokudorongeza, nzotwikira ijuru, n’ inyenyeri ntume zicura umwiza; izuba nzoritwikiriza igicu, kand’ ukwezi ntikuzoba kucaka umuco wakwo.

8Imuri zose zaka kw ijuru nzotuma zicura umwiza hejuru yawe, igihugu cawe ncubikizek’ umwiza, ni k’Umwami Uhoraho agize.

9Nzotuma imitima y’amahanga menshi ihagarara igihe nzokwiza ivy’ ukugesera kwawe mu mahanga, gushitsa no mu bihugu utigeze kumenya.

10Mbere nzotuma amoko menshi agutangarira, kand’ abami babo bazofatwa n’ubgoba bginshi kubgawe, igihe nzorabagiriza inkota yanje imbere yabo; bazohinda agashitsi urudaca, umuntu wese aririre amagara yiwe, ku musi wo kugesezwa kwawe.

11Kuk’ ukw ari k’Umwami Uhoraho agize, at’ Inkota y’umwami w’i Babuloni izogushikako.

12Nzotuma ishengero ryawe riririkwa n’inkota z’ abahizi; abo bose ni bo b’agaterabgoba bo mu mahanga. Ubgibone bga Egiputa bazobuhindura ubusa, n’ishengero ryaho ryose rizohona.

13Kandi nzohonnya ibitungwa vyaho vyose bir’ i ruhande y’amazi menshi; kandi nta kirenge c’umuntu kizokwongera kuyatoba, n’inzāra z’ibitungwa ntizizoba zikiyatoba.

14Ni ho nzotuma amazi yaho atonganuka, ntume n’inzūzi zaho zitemba nk’ amavuta ya elayo, ni k’Umwami Uhoraho agize.

15Igihe nzohindura igihugu ca Egiputa amatongo n’imisaka, igihugu kitakirimw’ ivyahora bicuzuye, nishe abākibamwo bose, ni ho bazomenya yuko nd’ Uhoraho.

16Ako ni ko gacurantimba bazocura; abakobga b’amahanga bazocura intimba bartyo: ni ko bazocurira intimba Egiputa n’ishengero ryaho ryose, ni k’Umwami Uhoraho agize.

17Maze mur’ uwo mwaka w’ icumi na kabiri nyene, ku musi ugira icumi na gatanu w’ukwezi, ijambo ry’Uhoraho rinzako,

18riti Mwana w’umuntu, borogera ishengero ryo muri Egiputa, urikororane n’abakobga b’amahanga ya rurangiranwa, gushitsa i bgina i kuzimu, hamwe n’abamanuka baja muri rwa rwobo.

19Uti Ni nde urusha ubgiza? Manuka uryamikwe mu batākebge.

20Bazohindikirana hagati y’abicishijwe inkota: Egiputa hāgaburiwe inkota: ni muhakwegane n’ishengero ryaho ryose.

21Abanyenkomezi bo mu bahizi bazovugana na bo bar’ epfo iyo i kuzimu, hamwe n’ abāhatabara; bat’ Abatākebge bāramanutse, barambaraye badakoma, bicishijwe inkota.

22Uwa Ashuri ni yo ari, bo n’ ingabo ziwe zose; imva z’abiwe ziramukikije; bose n’abishwe, bahindikiranijwe n’inkota.

23Imva zabo ziri mu bgigobeko bga rwa rwobo, kand’ ingabo ziwe zikikije imva yiwe: bose n’abishwe, bahindikiranijwe n’inkota, kand’ ari bo bār’ agaterabgoba mw isi y’ abariho.

24Uwa Elamu ni yo ari, bo n’ ishengero ryiwe ryose rikikije imva yiwe: bose n’abishwe, bahindikiranijwe n’inkota, bamanutse batākebge baja i bgina i kuzimu, kand’ ari bo bār’ agaterabgoba mw isi y’abariho, bajanye ibitētērwa vyabo hamwe n’abamanuka baja muri rwa rwobo.

25Bāmwubakiye uburiri hagati y’abishwe ari kumwe n’ishengero ryiwe ryose; imva z’abiwe ziramukikije; abo bose n’abatākebge, bahindikiranijwe n’inkota; kuko bār’ agaterabgoba mw isi y’abariho, kandi bājanye ibitētērwa vyabo hamwe n’abamanuka baja muri rwa rwobo: yashizwe hagati y’abishwe.

26Uw’ i Mesheki n’uw’ i Tubali ni yo bari, bo n’ishengero ryabo ryose; imva z’ababo zirabakikije; bose n’abatākebge, bahindikiranijwe n’inkota, kuko bār’ agaterabgoba mw isi y’abariho.

27Kandi ntibaryamye hamwe n’abahizi bāhindikiranye bo mu batākebge, bāmanukanye i kuzimu n’ibirwanishwa vyabo vy’intambara, bīseguye inkota zabo, ibigabitanyo vyabo biri ku magufa yabo; kuko bār’ agaterabgoba ku bahizi mw isi y’abariho.

28Nawe nyene uzovunagurirwa hagati y’abatākebge, uryame hamwe n’abahindikiranijwe n’inkota.

29Uwa Edomu ni yo ari, n’abami baho n’abaganwa baho bose, bārambitswe hamwe n’abahindikiranijwe n’inkota naho bār’ abahizi; bāryamye hamwe n’abatākebge, bo n’abamanuka baja muri rwa rwobo.

30Abaganwa b’i burārūko ni yo bari bose, n’ab’i Sidoni bose, bāmanukanye n’abishwe; bāratēterewe, naho bār’ agaterabgoba kubg’ ubuhizi bgabo; barambaraye batākebge hamwe n’ abahindikiranijwe n’inkota, bajanye ibitētērwa vyabo hamwe n’ abamanuka baja muri rwa rwobo.

31Farawo azobibona, ashire umubabaro w’ishengero ryiwe ryose: Farawo ubgiwe nyene n’ ingabo ziwe zose, bāhindikiranijwe n’inkota, ni k’Umwami Uhoraho agize.

32Kuko nashize ivy’ agaterabgoba kiwe mw isi y’abariho; na we azorambikwa hagati y’abatākebge, hamwe n’abahindikiranijwe n’inkota, Farawo ubgiwe n’ ishengero ryiwe ryose, ni k’Umwami Uhoraho agize.

← Chapter 31 Jump to: Chapter 33 →