Ezekiel 25

Kirundi (Bibliya Yera 1951, 1967 (Burundi))

← Chapter 24 Jump to: Chapter 26 →

1Ijambo ry’Uhoraho rinzako,

2riti Mwana w’umuntu, tungīra ijisho ryawe ubgoko bg’ Abamoni, ubabūrire;

3ubarire ubgo bgoko bg’Abamoni, uti Ni mwumve ijambo ry’Umwami Uhoraho, ng’ Uku ni k’Umwami Uhoraho agize, ati Ko wagize ngw Awa! ukītamba hejuru y’ahēra hanje igihe hāhumanywa, ukītamba no ku gihugu c’i Bgisirayeli mu gihe cāba amatongo, no ku b’inzu ya Yuda igihe bambukanwa ar’ inyagano;

4nuko rero ngira nkugabure mu baba i burasirazuba, bakwegukire; bazogusagazamwo, bīshikire buzu; bazokurīra imirima, bakunywere n’ amata.

5Kand’ ahitwa i Raba nzohahindura ibirāro vy’ingamiya, n’igihugu c’Abamoni kibe ubugaramango bg’imikuku: nuko muzomenya yuko jewe nd’Uhoraho.

6Kuk’ ukw ari k’Umwami Uhoraho agize, ati Ko wakomye amashi, ukavuza imihamirizo, ukītamba hejuru y’igihugu c’i Bgisirayeli n’ akagaye kose ko mu mutima wawe;

7nuko rero, nkubānguriyek’ ukuboko kwanje, ngira nkugabure ng’ ube inyagano y’abanyamahanga; nzokurandura ngukūre mu mahanga, nguherengeteze mu bihugu, nkugeseze; maz’ uzomenya yuko jewe nd’ Uhoraho.

8Uku ni k’Umwami Uhoraho agize, at’ Abanyamowabu n’ab’i Seyiri ko bavuga, bat’ Ereg’ inzu ya Yuda ihwanye n’iz’ ayandi mahanga yose;

9nuko rero, mu gihugu c’i Mowabu, aharābana n’ibisagara vyaho, uhereye ku bisagara biri ku mbibe zaho, ari vyo biteye igihugu icubahiro, ni vyo Beti‐Yeshimoti n’i Bayali‐Meyoni n’i Kiriyatayimu, ngira mpace ikirengero,

10ngicire ab’i burasirazuba, ngo babone ingene batera Abamoni, kandi nzobatanga ngo babegukire, kugira ng’ ubgoko bg’ Abamoni bgoye kwongera kwibukwa mu mahanga.

11Kandi nzoshitsa iteka nciriye kuri Mowabu, maze bazomenya yuko jewe nd’ Uhoraho.

12Uku ni k’Umwami Uhoraho agize, at’ Abanyedomu ko bagiriye inzu ya Yuda nabi babīhōra, bagacumura cane, mbere bakabīhōra;

13nuko rero, uku ni k’ Umwami Uhoraho agize, ati Nzobangurira ukuboko kwanje ku Banyedomu, mbaranduremw’ abantu n’ibitungano; kandi nzohahindura amatongo uhereye i Temani, baririkwe n’inkota gushitsa n’i Dedani.

14Abanyedomu nzobīhōra ntumye abantu banje b’ Abisirayeli; bazogirira Abanyedomu nk’uk’ uburake n’inzigo mbafitiye biri: maze bazomenya ukwīhōra kwanje ic’ ari co, ni k’Umwami Uhoraho agize.

15Uku ni k’Umwami Uhoraho agize, at’ Abafilisitiya ko bakoze ivy’ ukwīhōra, bakīhōrana akagaye kavuye mu mutima, ngo bageseze bari n’akazika kadashira;

16nuko rero, uku ni k’Umwami Uhoraho agize, ati Nzobangurira ukuboko kwanje ku Bafilisitiya, ndandure n’Abakereti, ngeseze n’amasigarira yo mu kiyaya c’ikiyaga.

17Nzobīhōra bihambaye, mbahanane ubushangashirwe; maze bazomenya yuko jewe nd’Uhoraho, igihe nzoba mbīhōye.

← Chapter 24 Jump to: Chapter 26 →