Ezekiel 41

Kirundi (Bibliya Yera 1951, 1967 (Burundi))

← Chapter 40 Jump to: Chapter 42 →

1Maz’ anjana ku rusengero, agera ibisapfu vyarwo, ubgaguke bgavyo buba amatambge atandatu ku ruhande rumwe, ayandi atandatu ku rundi, y’ukuboko uciriye mu nkokora, nk’uk’ ubgaguke bg’ihema bgāri buri.

2Ubgaguke bgo mw irebe buba amatambge cumi; kand’ impande z’irebe, rumwe ruba amatambge atanu, urundi ruba atanu nyene; maz’ agera uburebure bgarwo bg’ umurambararo, buba amatambge mirongwine, n’ubgaguke buba mirongwibiri.

3Maz’ adwēbēra imbere, agera ibisapfu vyaho vyompi, biba amatambge abiri, no mw irebe haba amatambge atandatu, n’ubgaguke bgo ku mpande z’irebe, buba amatambge ndwi‐ndwi.

4Agera n’uburebure bgaho bg’ umurambararo, buba amatambge mirongwibiri, n’ubgaguke buba mirongwibiri nyene, aharābana n’ahēra h’urusengero: maz’ arambarira, at’ Aha n’Ahēra Cane.

5Maz’ agera intimba y’inzu, iba amatambge atandatu; n’ubgaguke bg’akumba kose kometseko mu mbavu buba amatambge ane, twāri dukikije ku nzu impande zose.

6Kand’ utwo twumba two mu mbavu twāri mu mirongo itatu, umwe ugeretse ku wundi; mu murongo mu murongo hār’ utwumba mirongwitatu; imbaho zatwo zari zinjiye mu gisika, uko twubatswe inyuma ku ngoro impande zose; zari zifashe ahaniguye ku gisika c’ingoro ubgayo, ariko zitinjiyemwo.

7Utwo twumba two mu mbavu twagenda turutana uko tudūze dukikije ingoro, kukw aho haniguye hakikije ingoro, na ho hāgenda harutana uko hadūze, bigatuma igisika c’ingoro ubgayo kigenda gikeha uko kidūze; kand’ uwūrira mu kumba ko hejuru avuye mu ko hasi yaca mu ko hagati.

8Mbona yukw iyo ngoro yari n’ itanguriro rirerire impande zose; amatanguriro y’utwumba two mu mbavu yar’ irenga rimwe ry’ amatambge atandatu y’ukuboko uciriye mu nkokora n’ayandi atandatu y’intoke.

9Intimba y’ igisika cubakiwe utwo twumba two mu mbavu, ahahera hanze, yar’ amatambge atanu y’ukuboko uciriye mu nkokora; maz’ ahasigaye hār’ ahākebewe utwo twumba two mu mbavu two ku ngoro.

10Kandi guhera kur’ utwo twumba hār’ umwanya w’amatambge mirongwibiri ukikuje ingoro impande zose.

11Imiryango y’utwo twumba two mu mbavu yari yerekeye ha handi hāsigaye; umuryango umwe wari werekeye i burārūko, uwundi i bumanuko: kand’ aho hāsigaye, ubgaguke bgaho bgār’ amatambge atanu impande zose.

12Kandi hār’ inzu yar’ imbere y’ uwo mwanya uciye hagati, ku ruhande rw’i burengerazuba, ubgaguke bgayo bgar’ amatambge mirongwirindwi y’ukuboko uciriye mu nkokora, intimba y’iyo nzu yar’ amatambge atanu‐atanu impande zose, n’uburebure bgayo bgar’ amatambge mirongwicenda.

13Nukw agera uburebure bg’ umurambararo bg’ingoro buba amatambge ijana; agera n’uwo mwanya uciye hagati bo na ya nzu n’intimba yayo, uburebure bgavyo buba amatambge ijana nyene;

14agera n’ubgaguke bg’imbere y’ urusengero bo na wa mwanya uciye hagati aharābana n’i burasirazuba, na vyo biba amatambge ijana.

15Agera n’uburebure bg’ umurambararo bga ya nzu irābana na wa mwanya uciye hagati inyuma y’ingoro, bo n’amabaraza yo ku mpande zompi, biba amatambge ijana nyene. Imbere mu rusengero, n’amabaraza y’inyubakwa,

16no mw irebe, n’amadirisha atugururwa, n’amabaraza aciye impande zose za twa twumba turi mu mirongo itatu igerekeranye, aharābana n’irebe, hāri haranze imbaho impande zose, uhereye hasi ugashika ku madirisha, kand’ ayo madirisha nyene yarimw’ inshingo;

17no gushitsa hejuru y’irebe, n’ahitereye imbere mu ngoro, bo n’inyuma, bo n’inzu impande zose imbere n’ inyuma, vyose vyāri ku rugero.

18Kandi vyāri bisharijwekw ibishushanyo vy’abakerubi n’ibigazi; hagati y’umukerubi n’uwundi hāri harobetse ikigazi; kand’ umukerubi wese yar’ afise mu maso habiri,

19ahasa n’ah’ umuntu harābana n’ikigazi ku ruhande rumwe, n’ahasa n’ah’ umugunza w’intambge harābana n’ikindi kigazi ku rundi ruhande. Uko ni ko vyashushanijwe guheza inzu yose impande zose.

20Uhereye hasi ugashitsa hejuru y’irebe hari hashushanijwekw abakerubi n’ibigazi; uko ni ko vyashushanijwe guheza urusengero rwose.

21Ibisapfu vy’urusengero vyangana impande zose; kand’ uruhande rw’imbere rw’Ahēra Cane rwāsa kumwe n’urusengero.

22Igicaniro car’ ikibazano; uburebure bg’igihagararo bgaco bgar’ amatambge atatu y’ukuboko uciriye mu nkokora, n’uburebure bg’ amakika bgar’ amatambge abiri; inkokora zaco no mu ntebe haco n’imbavu zaco, hose car’ ikibazano: maz’ arambarira, at’ Aya ni yo meza ar’ imbere y’Uhoraho.

23Kand’ urusengero n’Ahēra Cane vyari bifise amarebe abiri;

24amarebe yompi yar’ afise inzugi zibiri zisomana; irebe rimwe ryagira inzugi zibiri, irindi zindi zibiri.

25Kand’ izo nzugi z’urusengero zāri zishushanijwekw abakerubi n’ibigazi, nk’uko vyari bishushanijwe ku nzu; kandi ku rubaraza ahahera inyuma hāri haranze imbaho z’intimba nini.

26Kandi hār’ amadirisha atugururwa n’ibigazi bishushanijwe ku rubaraza hirya no hino mu mpande zarwo; utwumba two mu mbavu z’ingoro, bo n’imbaho, uko ni ko vyari bimeze.

← Chapter 40 Jump to: Chapter 42 →