Ezekiel 33

Kirundi (Bibliya Yera 1951, 1967 (Burundi))

← Chapter 32 Jump to: Chapter 34 →

1Ijambo ry’Uhoraho ryanjeko,

2riti Mwana w’umuntu, uvugane n’ab’ ubgoko bganyu, ubabgire, uti Ni yatērēra igihugu inkota, abantu bo mu gihugu bakīrobanurira umuntu muri bo, bakamushiraho kubabera inderetsi:

3uyo yobona inkota ije iteye igihugu, akavuza inzamba ngw abūrire abantu;

4nuk’ uwokwumva ijwi ry’inzamba wese, agakina ku mbūri, inkota ikaza, ikamugahura, amaraso yiwe azoba ku mutwe wiwe ubgiwe.

5Yumvise ijwi ry’inzamba, ariko yakinnye ku mbūri; amaraso yiwe azoba kuri we; arikw iyaba yarumviye imbūri yokijije amagara yiwe.

6Arikw iyo nderetsi ni yabona inkota ije, ntivuze inzamba, abantu ngo babūrirwe, inkota ikaza ikagira uwo igahura muri bo; uwo azoba agahuriwe mu bigabitanyo vyiwe, arikw amaraso yiwe nzoyarondera kur’ iyo nderetsi.

7Ni ko nawe, mwana w’umuntu, nagushizeho kubera ab’ inzu ya Isirayeli inderetsi; nuko wumve ijambo riva mu kanwa kanje, ubanshikiririze imbūri.

8Ni nabarira umunyavyaha, nt’ Ewe wa munyavyaha, ntuzobura gupfa; nawe ntugire ico uvuga co kubūrira umunyavyaha ngw ave mu ngeso ziwe: uwo munyavyaha azopfira mu bigabitanyo vyiwe, arikw amaraso yiwe ni wewe nzoyaronderako.

9Yamara ni wabūrira umunyavyaha ivy’ ingeso ziwe, ngw ahindukire azivemwo, na we ntāhindukire ngw azivemwo; azopfira mu bigabitanyo vyiwe, ariko weho uzoba ukijije ubugingo bgawe.

10Nuko rero, mwana w’umuntu, ubarire ab’ inzu ya Isirayeli, uti Musigaye muvuga, mut’ Ibicumuro vyacu n’ivyaha vyacu biri ku mitwe yacu, kandi duhondobereye muri vyo: none twoshobora dute kubaho?

11Ubabgire, uti Ndahiye ukubaho kwanje, ni k’Umwami Uhoraho agize, simpimbarwa n’uk’ umunyavyaha apfa, atar’ uko yohindukira, akava mu ngeso ziwe, akabaho: enda ni muhindukire, mugaruke muve mu ngeso zanyu mbi; n’iki gituma mugomba gupfa, yemwe ab’ inzu ya Isirayeli?

12Nuko rero, mwana w’umuntu, barira ab’ ubgoko bganyu, ut’ Ubugororotsi bg’umugororotsi ntibuzomukiza ku musi w’ibicumuro vyiwe, n’ivyaha vy’umunyavyaha ntibizomwicisha ku musi azohindukira akava mu vyaha vyiwe; yamar’ umugororotsi ntazoshobora kubeshwaho na bgo ku musi azocumurako.

13Ni nabgira umugororotsi kw azobaho, akishimira ubugororotsi bgiwe, maz’ agakora ivy’ ukugabitanya; mu bikorwa vy’ubugororotsi bgiwe nta na kimwe kizokwibukwa, arikw ibigabitanyo vyiwe yakoze ni vyo azopfa azize.

14Ikindi kandi, ni nabgira umunyavyaha, nti Ntuzobura gupfa, arikw agahindukira akava mu vyaha vyiwe, agakora ibitunganye n’ibikwiye,

15uwo munyavyaha agasubiza ingwati nyeneyo, akagarukana ivyo yambuye, akagendera mu vyagezwe bihesha ubugingo, ntagire ivy’ ukugabitanya akora, n’ukuri azobaho, ntazopfa.

16Mu vyaha vyiwe vyose yakoze, nta na kimwe kizokwibukwa kuri we: kukw asigaye akora ibitunganye n’ibikwiye; ntazobura kubaho.

17Yamar’ ab’ ubgoko bganyu baravuga, ngw Inzira y’ Umwami Imana ntiroranye: erega bo ni bo inzira zabo zitaroranye.

18Umugororotsi ni yahindukira akava mu bugororotsi bgiwe, agakora ivy’ ukugabitanya, azopfa ari vyo azize.

19Kand’ umunyavyaha ni yahindukira akava mu vyaha vyiwe, agakora ibitunganye n’ ibikwiye, azobeshwaho na vyo.

20Yamara muravuga, mut’ Inzira y’Umwami Imana ntiroranye. Yemwe ab’ inzu ya Isirayeli, ngira mbacire urubanza, umuntu wese nk’ukw inzira ziwe zimeze.

21Maze mu mwaka ugira icumi na kabiri uhereye aho twambukaniwe tur’ inyagano, mu kwezi kw’ icumi, ku musi ugira gatanu w’ ukwo kwezi, haza umuntu acitse avuye i Yerusalemu, aranshikīra, at’ Igisagara caratsinzwe.

22Ukuboko kw’Uhoraho kwari kwarāye kunjeko ku mugoroba, iyo mpunzi itaraza; kandi yar’ agobotoye akanwa kanje uyo atarashika aho ndi bukeye mu gitondo; nukw akanwa kanje karagobodoka, ururimi ntirwari rukigobge.

23Maz’ ijambo ry’Uhoraho rinzako,

24riti Mwana w’umuntu, abasigaye baba mu matongo yo mu gihugu c’i Bgisirayeli baravuga, ngo Aburahamu yar’ umwe, ariko yahawe igihugu kw ishamvu; nkanswe tweho turi benshi, natwe turagihabga kuba ishamvu yacu.

25Nuko rero, ubabarire, ut’ Uku ni k’Umwami Uhoraho agize, ati Ko murya inyama zitavuyemw’ amaraso, mukunamurira amaso ibigirwamana vyanyu, mukavisha amaraso: none mugira ngo mwohabga igihugu kw ishamvu?

26Ko mwishimiye inkota zanyu, mugakora ibizira, umuntu wese akonona muka mugenzi we: none mugira ngo mwohabga igihugu kw ishamvu?

27Ukw abe ari k’ uzobabgira, ut’ Uku ni k’Umwami Uhoraho agize, ati Ndahiye ukubaho kwanje, abasigaye mur’ ayo matongo ntibazobura guhindikiranywa n’inkota, n’ūri ku misozi nzomugabura mu bikōko bimurotse, kand’ abari mu bihome no mu masenga bazokwicwa n’ikīza.

28Kand’ igihugu nzogihindura imisaka n’akajoreza, ubgibone buterwa n’ububasha bgaho buzoherengetera; kand’ imisozi y’i Bgisirayeli izosigara ar’ imisaka, bitume ata wuzoba akihaca.

29Maze bazomenya yuko jewe nd’Uhoraho, igihe nzoba mmaze guhindura igihugu imisaka n’akajoreza, mbahōye ibizira vyabo vyose bākoze.

30Kandi nawe, mwana w’umuntu, ab’ ubgoko bganyu bayāgira ivyawe ku nzitiro no mu miryango y’amazu, umwe avugana n’uwundi, umuntu wese na mugenzi we, bat’ Enda ni muze, tuje kwumva ijambo rivuye k’Uhoraho iry’ ari ryo.

31Maze baza kuri wewe nk’ ukw abantu basanzwe baza, bakicara imbere yawe nk’ah’ ar’ abantu banje, bakumviriza amajambo yawe, ariko ntibayakore: kuko berekanisha akanwa kabo urukundo rwinshi, yamar’ imitima yabo ikurikira ukwiyungukira kwabo.

32Kandi rāba, ubamerera nk’ indirimbo nziza cane y’ūfise ijwi ryiza, akaba ar’ umucuraranzi w’umuhinga: kuko bumviriza amajambo yawe, ariko ntibayakore.

33Arikw igihe vya bindi bizoshikira, (kand’ ehe biraje!) ni ho bazomenya yuk’ ūvugishwa n’ Imana yamye muri bo.

← Chapter 32 Jump to: Chapter 34 →