Ezekiel 46

Kirundi (Bibliya Yera 1951, 1967 (Burundi))

← Chapter 45 Jump to: Chapter 47 →

1Uku ni k’Umwami Uhoraho agize, at’ Ikirimba c’inyubakwa kirābana n’i burasirazuba kize came kijishwe mu misi y’ ibikorwa ukw ar’ itandatu; ariko ku musi w’isabato kijishurwe, bo no ku musi ukwezi kubonetseko.

2Segaba az’ ashikeyo aciye mu rubaraza rw’ikirimba ruhera inyuma, maz’ ahagarare i ruhande y’ igikingi c’ikirimba; abaherezi baze bamutangire ikimazi ciwe co kwoswa n’ibimazi vyiwe vy’ishimwe, maz’ asengere mw ishikiro ry’ico kirimba, aheze aveyo; arikw ico kirimba ntikize kijishwe gushitsa ku mugoroba.

3Kand’ abantu bo mu gihugu baze bahore basengera imbere y’Uhoraho bar’ inyuma y’ico kirimba ku masabato no mu mboneko z’ukwezi.

4Ibimazi vyo kwoswa segaba azohora atanga k’Uhoraho ku musi w’isabato bize bibe imyagazi y’intama itandatu itagira agasembga, n’ impfizi y’intama imwe itagira agasembga nyene;

5kand’ ishikanwa ry’ifu rigerekwa kur’ iyo mpfizi y’ intama rize ribe ingero yitwa efa, n’irigerekwa ku myagazi y’intama az’ atange ibimushobokeye, no kuri efa yose y’ifu hajekw amavuta, ingero yitwa hini.

6Kandi ku musi ukwezi kubonetseko, haze hatangwe imasa y’umukangara itagira agasembga, n’imyagazi y’ intama itandatu n’impfizi y’intama; bibe ibitagira agasembga.

7Kand’ az’ ashikane ishikanwa ry’ifu, ku masa hajekw ingero imwe yitwa efa, no ku mpfizi y’ intama hajeko efa imwe nyene, no ku myagazi y’intama hajekw ibimushobokeye, kandi kuri efa yose y’ifu hajekw amavuta, ingero yitwa hini.

8Kandi segaba iy’ ashikayo, ace mu rubaraza rw’ikirimba, maz’ ahindukiye ajane iyo nzira nyene.

9Arikw abantu iyo baje imbere y’ Uhoraho mu misi mikuru ishinzwe, ūzoza aciye mu kirimba giherereye i burārūko aje gusenga, ni yavayo az’ ace mu kirimba giherereye i bumanuko; kand’ ūzoza aciye mu kirimba giherereye i bumanuko, ni yavayo az’ ace mu kirimba giherereye i burārūko: ntaz’ ahindukire mu kirimba yazananye, ariko ni yavayo akomeze atumbere imbere yiwe.

10Kandi segaba iy’ ashikayo, agende hagati yabo, bavuyeyo bavireyo rimwe.

11Mu misi mikuru no mu yindi misi mikuru ishinzwe, ishikanwa ry’ifu rize ribe efa imwe igeretswe ku masa yose, na efa imwe nyene igeretswe ku mpfizi y’intama yose, n’irigerekwa ku myagazi y’intama az’ atange ibimushobokeye, no kuri efa yose y’ifu hajekw amavuta, ingero yitwa hini.

12Kandi segaba, igihe azotanga ikimazi avyigombeye, ar’ ikimazi co kwoswa cank’ ar’ ibimazi vy’ishimwe, abitanze k’Uhoraho avyigombeye, haze hagire ūmujishurira ikirimba kirābana n’i burasirazuba, atange ikimazi ciwe co kwoswa n’ibimazi vyiwe vy’ishimwe, nk’ukw asanzwe abikora ku musi w’isabato, aheze agende; amaze kugenda hagire ūjisha ico kirimba.

13Kandi nawe uz’ utange uko bukeye umwagazi w’intama umaze umwaka umwe, kand’ utagira agasembga, kuba ikimazi co kwosereza Uhoraho: uze wame uwutanga mu gatondo mu gatondo uko bukeye.

14Kand’ uze wame uwugerekakw ishikanwa ry’ifu mu gatondo uko bukeye nyene, ribe ikigira gatandatu ca efa y’ifu igogōretse, n’ikigira gatatu ca hini y’ amavuta, yo kuvanga n’iyo fu; ribe ishikanwa ry’ifu k’Uhoraho ry’intahava, icagezwe c’ibihe vyose.

15Ukw abe ari ko bazotanga umwagazi w’intama, bo n’ishikanwa ry’ifu n’amavuta, mu gatondo mu gatondo uko bukeye, kuba ikimazi co kwoswa c’intahava.

16Uku ni k’Umwami Uhoraho agize, ati Segaba ni yagira aho akebera umwe mu bana biwe, hazoba ishamvu yiwe, hazotoranwa n’abana biwe; hazoba inyegu yabo kukw ar’ ishamvu.

17Ariko ni yaramuka akebeye umwe mu basavyi biwe kw ishamvu yiwe, hazoba ahiwe gushitsa kuri wa mwaka w’umwidegemvyo; ico gihe haze hasubizwe segaba; arikw ishamvu azoba yahaye abana biwe izoba iyabo bgite.

18Yamara segaba ntakanyage amashamvu y’abantu, ngw abasohore mu mashamvu yabo; ariko ni yakebera abana biwe ishamvu, ayikūre ku ho yiganziye ubgiwe, ngw abantu banje boye kuzosābagizwa, ngo hagire umuntu akūrwa mw ishamvu yiwe.

19Maz’ ancisha mu canzo kibangikanye n’ikirimba, anshikana ku vyumba vyera vy’abaherezi, birābana n’i burārūko: kandi har’ ahantu ahahera inyuma yavyo herekeye i burengerazuba.

20Arambarira, at’ Aha ni ho abaherezi bazoteka ibimazi vy’impongano n’ibimazi bitangirwa ivyaha, kandi ni ho bazokaranga amashikanwa y’amafu; kugira ngo boye kubijana mu ntangaro, bakavyezesha abantu.

21Maz’ anjana mu ntangaro, angenduza imfuruka zine z’urugo; nsanga izo mfuruka zose z’urugo zubatswek’ utunyubakwa.

22Ukw imfuruka z’urugo ari zine, hāri harumitsekw akanyubakwa; uburebure bgatwo bgār’ amatambge mirongwine y’ukuboko uciriye mu nkokora, amakika yar’ amatambge mirongwitatu: utunyubakwa two mu mfuruka ukw ari tune twār’ urugero rumwe.

23Muri two ukw ari tune, hārimw’ imirongo y’amatafari itugendanye, yubatswemw’ amaziko impande zose.

24Maz’ arambarira, at’ Utu n’ utuzu two gutekamwo, ah’ abasuku bo mu ngoro bazoteka ibimazi abantu bazanye.

← Chapter 45 Jump to: Chapter 47 →