Ezekiel 28

Kirundi (Bibliya Yera 1951, 1967 (Burundi))

← Chapter 27 Jump to: Chapter 29 →

1Ijambo ry’Uhoraho ryongera kunzako,

2riti Mwana w’umuntu, barira segaba w’i Tiro, ut’ Uku ni k’Umwami Uhoraho agize, at’ Umutima wawe ko wishize hejuru, kand’ ukavuga, ng’ ur’ Imana, ng’ uvyagiye ku ntebe y’Imana hagati mu kiyaga; yamar’ ur’ umuntu buntu, ntur’ Imana, naho mu mutima wawe wigereranya na yo;

3ni ko ga! Urusha Daniyeli ubgenge, nta gihishijwe uyoberwa!

4Ubgenge bgawe no kumenya kwawe vyaguhesheje ubutunzi, vyatumye urunda izahabu n’ifeza mu bubīko bgawe;

5ubgenge bgawe bginshi n’ubudandaza bgawe vyatumye ugwiza ubutunzi, maz’ ubgo butunzi bgawe bgateye umutima wawe kwishira hejuru.

6Nuko rero, uku ni k’Umwami Uhoraho agize, ati Ko wagereranije umutima wawe n’umutima w’Imana,

7nuko nanje ngira ngutēze abantu b’akavantara b’agaterabgoba bo mu mahanga, basokore inkota zabo ngo barwanye ubgiza bg’ubgenge bgawe, bafutanye igitinyiro cawe.

8Bazokumanura bakurokeze muri rwa rwobo; kand’ uzopfa urupfu rw’ abaguye mw idamba mu kiyaga.

9Mbeg’ uzosubira kuvugira imbere y’ūkwica ng’ ur’ Imana? Ushima uzoba ur’ umuntu buntu, ntuzoba ur’ Imana, ushitse mu maboko y’ ūgusogota!

10Uzopfa urupfu rw’abatākebge wishwe n’amaboko y’abanyamahanga; kukw ari jewe mbivuze, ni k’Umwami Uhoraho agize.

11Ijambo ry’Uhoraho ryongera kunzako,

12riti Mwana w’umuntu, cura intimba uririre umwami w’i Tiro, umubgire, ut’ Uku ni k’ Umwami Uhoraho agize, ati Ni wewe war’ akaminuza ka vyose, wuzuye ubgenge, ukaba mwiza vy’agahore.

13Wari muri Edeni, mw itongo ry’Imana; wisakayek’ utubuyenge twose tw’igiciro kinini, twitwa odemu na pitida na yahalomu na tarushishi na shohamu na yasipi na safiro na nofekina na bareketi, bo n’izahabu: ubuhanga bgo kubāza udushako tw’ingoma n’imyironge bgar’ i wawe; vyari vyarateguwe umusi waremwako.

14War’ umukerubi usīzwe amavuta, ushānje amababa: kandi nagushizeho, uba ku musozi wera w’Imana; wacuragiza hagati y’ amabuye yaka umuriro.

15War’ agahore mu ngeso zawe zose uhereye umusi waremeweko, gushitsa igihe ibigabitanyo vyakubonetseko.

16Ibitayega vy’ibidandazwa vyawe vyatumye wuzura umuryano, maz’ uracumura: ni co catumye nguhinda nk’igihumane, nkagukūra ku musozi w’Imana; narakugesheje, yewe mukerubi ushānje amababa, ngukūra hagati ya ya mabuye yaka umuriro.

17Ubgiza bgawe ni bgo bgateye umutima wawe kwishira hejuru, igitinyiro cawe ni co cononnye ubgenge bgawe; ngutsinze hasi, nkurambitse imbere y’abami ng’ubabere akabarore.

18Kubg’ isinzi ry’ ibicumuro vyawe n’ubugunge bg’ ukudandaza kwawe, wahumanije ahēra hawe; ni co catumye ntuma umuriro uvuye muri wewe ukuyigiza, nkakugira umunyota urunze hasi imbere y’abo wabereye akabarore.

19Abakuzi bose bo mu mahanga bazogutangarira: wahindutse agaterabgoba, kandi ntuzosubira kubah’ ukundi.

20Maz’ ijambo ry’Uhoraho rinzako,

21riti Mwana w’umuntu, tungīra ijisho ryawe i Sidoni, uhabūrire,

22ut’ Uku ni k’Umwami Uhoraho agize, ati Nzohigūra nawe, ewe Sidoni, nzoshirwa hejuru hagati muri wewe: maze bazomenya yuko nd’ Uhoraho, igihe nzoba nshikije iteka mpaciriyeko, nkiyerekana muri bo ko nd’ Uwera.

23Kuko nzoharekurira ikīza, nkuzuza ibitenga vy’amaraso mu nzira zaho; kand’ abakomeretse bazogwa hagati muri ho, bishwe n’inkota ihateye impande zose; maze bazomenya yuko jewe nd’ Uhoraho.

24Kand’ ab’ inzu ya Isirayeli ntibazokwongera kugira umukere ubahanda, cank’ umubambangwe ubasāsāta mu babakikije bose, bāhora babagirira nabi; maze bazomenya yuko jewe nd’ Umwami Uhoraho.

25Uku ni k’Umwami Uhoraho agize, at’ Igihe nzoba mpejeje gukoranya ab’ inzu ya Isirayeli, mbakūye mu mahanga aho bāri barasābagiriye, nkiyerekana muri bo ko nd’ Uwera imbere y’abanyamahanga, ni ho bazoshinga ibande mu gihugu cabo, ico nahaye umusavyi wanje Yakobo.

26Bazohashinga ibande ata nkomanzi; mbere bazokwubaka amazu, batere n’inzabibu, bibere ngaho ata nkomanzi, igihe nzoba nshikije iteka nciriye ku babagirira nabi babakikije bose; maze bazomenya yuko jewe nd’ Uhoraho Imana yabo.

← Chapter 27 Jump to: Chapter 29 →