Ezekiel 39

Kirundi (Bibliya Yera 1951, 1967 (Burundi))

← Chapter 38 Jump to: Chapter 40 →

1Nuko rero, mwana w’umuntu, ubūrire Gogi, ut’ Uku ni k’Umwami Uhoraho agize, at’ Ehe nzohigūra nawe, ewe Gogi, wa mwami w’i Roshi n’i Mesheki n’i Tubali:

2nzoguhindukiza ngushorere, nkudūgane uvuye ahahera i burārūko, ngushikane ku misozi y’i Bgisirayeli;

3kand’ umuheto wawe ufashe mu kubamfu nzowukubita ukoroke, n’ imyampi yawe ufashe mu kuryo ndayikororere hasi.

4Muzogwa ku misozi y’i Bgisirayeli, mwe n’ ingabo zawe zose, n’amahanga ari kumwe nawe: nzokugaburira ibisīga vy’amero vy’amoko yose, n’ ibikōko vyo mw ishamba ngo bikugabure.

5Uzogwa mu gahinga ka sabaderi, kukw ari jewe mbivuze, ni k’Umwami Uhoraho agize.

6Kandi nzokwanda umuriro Magogi, n’abibera ku kiyaga ata co binona; maze bazomenya yuko jewe nd’ Uhoraho.

7Izina ryanje ryera nzorimenyekanisha hagati mu bantu banje b’Abisirayeli; kandi sinzokunda kw izina ryanje ryongera guhumanywa ukundi: maz’ amahanga azomenya yuko jewe nd’ Uhoraho, Uwera wo mu Bisirayeli.

8Ehe biraje, kandi bigiye gushika: uwo ni wo wa musi navuze, ni k’Umwami Uhoraho agize.

9Ni ho ababa mu bisagara vy’i Bgisirayeli bazosokoroka, ivyo birwanishwa babigire inkwi z’umuriro, bacane inkinzo nto‐nto na nini‐nini, n’imiheto n’imyampi, n’amacumu y’inzunga n’amatabura, babigire inkwi z’ umuriro kumara imyaka ndwi:

10bitume batakirinda kuja gusenya ku misozi, canke kugira izo basatura mu kibira; kukw ivyo birwanishwa ari vyo bazogira inkwi z’umuriro: kandi bazosahura abābasahuye, banyage abābanyaze, ni k’Umwami Uhoraho agize.

11Kur’ uwo musi nzoha Gogi aho guhambga mu Bgisirayeli, mu kiyaya co ku nzira y’abahita, ku ruhande rw’ikiyaga rw’i burasirazuba, bitume abahita babura aho baca; aho ni ho bazohamba Gogi n’isinzi ryiwe ryose: maze bazocita Ikiyaya c’isinzi rya Gogi.

12Ab’ inzu ya Isirayeli bazomara amezi ndwi babahamba, kugira ngo bahumanure igihugu.

13Mber’ abantu bose bo mu gihugu bazobahamba; bizobaha kuvugangwa ku musi nzoba nshizwe hejuru, ni k’Umwami Uhoraho agize.

14Kandi bazotora abantu bo kwama bakora ico gikorwa; bazogendagenda mu gihugu bahamba imivyimba yasigaye ku gasozi, bafashwa n’abahita, kugira ngo bagihumanure. Ayo mezi ndwi ni yashira, bazotangura gukubāza, barondera uwoba yar’ asigaye;

15kand’ abahita mu gihugu ni bahaca, hakagira ūbona igufa ry’ umuntu, az’ arishingekw ikimenyetso, gushitsa ah’abahamvyi bazorihamba mur’ ico kiyaya c’isinzi rya Gogi.

16Kandi hazobah’ igisagara kizokwitwa Hamona. Uko ni ko bazohumanura igihugu.

17Nuko rero, mwana w’umuntu, uku ni k’Umwami Uhoraho agize, ati Barira ibisīga vy’amoko yose, n’ibikōko vyose vyo mw ishamba, uti Ni mukoranire hamwe, muze; mwikoranirize hamwe muvuye impande zose, muze ku kimazi canje mbacumitiye, ikimazi gihambaye ku misozi y’i Bgisirayeli, kugira ngo murye inyama, munywe amaraso.

18Muzorya inyama z’abahambaye, munywe amaraso y’abaganwa bo mw isi, n’ay’ impfizi z’intama, n’ay’ imyagazi, n’ay’ impene, n’ay’ ibimasa, vyose ar’ ibivyibushe vy’i Bashani.

19Kandi muzorya ibinure muhāge, munywe amaraso muborerwe, vy’ibimazi mbacumitiye.

20Muzohāgira ku meza yanje, muhāgijwe n’amafarasi aheka abantu n’ayakwega imikogote, n’abahizi, n’ingabo zose z’intambara, ni k’Umwami Uhoraho agize.

21Ubgiza bganje nzobushira hagati mu mahanga; kand’ amahanga yose azobona iteka nashikije, n’ukuboko kwanje nabashōreyeko.

22Uko ni kw ab’ inzu ya Isirayeli bazomenya yuko nd’ Uhoraho Imana yabo, uhereye uwo musi no mu bihe bizokurikiraho.

23Kand’ amahanga azomenya yukw ab’ inzu ya Isirayeli bājanywekw inyagano bahōwe ibigabitanyo vyabo; kuko bāncumuyeko, bigatuma mbahisha mu nyonga hanje; nuko rero nabagabuye mu maboko y’ abarwanizi babo, bose baririkwa n’inkota.

24Nabashubirije mu nkōko ibihwanye n’ukwandura kwabo n’ibihwanye n’ibigabitanyo vyabo; mbahisha mu nyonga hanje.

25Nuko rero, uku ni k’Umwami Uhoraho agize, ati Noneho, ngira ngarukane aba Yakobo, mbakūre mu ngoyi zabo, ngirire imbabazi ab’ inzu ya Isirayeli bose, kandi mfuhire izina ryanje ryera.

26Bazokwibagira ibitētērwa vyabo, n’ ubuhemu bgabo bgose bāmpemukiye, ni bamara kwibera mu gihugu cabo, ata co binona, ata kibateye ubgoba,

27mmaze kubagarukana mbakūye mu mahanga, mbakoranirije hamwe mbakūye mu bihugu vy’abansi babo, niyerekaniye kuri bo imbere y’amahanga menshi ko nd’ Uwera.

28Maze bazomenyeshwa yuko nd’ Uhoraho Imana yabo, n’uko natumye bajanwa mu mahanga ar’ inyagano, ngatako nkabakoraniriza hamwe mu gihugu cabo bgite; kandi sinzosubira kugira n’umwe muri bo nsigayo,

29canke ngo nongere kubahisha mu nyonga hanje; kuko nzoba nasutse Mpwemu wanje ku nzu ya Isirayeli, ni k’Umwami Uhoraho agize.

← Chapter 38 Jump to: Chapter 40 →