Ezekiel 44

Kirundi (Bibliya Yera 1951, 1967 (Burundi))

← Chapter 43 Jump to: Chapter 45 →

1Maz’ arangarukana anshikana ku kirimba c’ahēra, kir’ inyuma kirābana n’i burasirazuba, ariko cari kijishe.

2Maz’ Uhoraho arambarira, at’ Iki kirimba kize came kijishe, ntikize kijishurwe, canke ngo hagire umuntu n’ umwe agicamwo, kuko jewe Uhoraho Imana y’Abisirayeli ari jewe nagiciyemwo; ni co gituma kizohora kijishe.

3Ariko segaba we, ni we azohavyagira ngw ahafungurire ivy’ ibimazi imbere yanje, jewe Uhoraho, kukw ari we segaba; az’ ashikeyo aciye mu rubaraza rw’ikirimba, kandi ni yavayo az’ ajane iyo nzira nyene.

4Maz’ anshikana imbere y’ingoro ancishije mu kirimba kirābana n’i burārūko; maze ngize ntya mbona ubgiza bg’Uhoraho bguzuye ingoro y’Uhoraho: nca nikubita hasi nubamye.

5Maz’ Uhoraho arambarira, ati Mwana w’umuntu, shirak’ umutima, ukanure manini, utege amatwi, ivyo ngira nkubarire vyose vy’amabgirizwa yose y’ingoro y’Uhoraho, n’ivyagezwe vyayo vyose; ushire umutima ku rwinjiriro rw’iyo ngoro, no kw isohokero ryose ry’ ahēra.

6Uz’ ubgire ba bagarariji, ari bo nzu ya Isirayeli, ut’ Uku ni k’Umwami Uhoraho agize, ati Yemwe ab’ inzu ya Isirayeli, ibizira vyanyu vyose mwakoze birahāgije,

7ko mwinjije abanyamahanga batākebge mu mitima no ku mibiri ngo babe ahēra hanje, ngo bahumanye ingoro yanje, igihe mutanga ivyo kurya vyanje vy’ ibinure n’amaraso, maze bakica isezerano ryanje, bakongereza ku bizira vyanyu vyose.

8Kandi ntimwarinze ivyera vyanje mwajejwe, arikw ahēra hanje mwahajeje abandi mu gishingo canyu.

9Uku ni k’Umwami Uhoraho agize, ati Nta munyamahanga atakebge mu mutima no ku mubiri, azokwinjira ahēra hanje, w’umunyamahanga wese ari mu Bisirayeli.

10Mbere n’Abalewi bāngiye kure, igihe Abisirayeli bāzimira, bakanta bagakurikira ibigirwamana vyabo, na bo bazogibgako n’ibigabitanyo vyabo.

11Bazosigara ar’ ibikomaguzi ahēra hanje, bashibama ku birimba biherereye ku ngoro, bakore n’ibikorwa vyo mu ngoro: bazobāgira abantu buntu ibimazi vyo kwoswa n’ibindi bimazi, bahagarare imbere yabo babakorera.

12Ko bābakoreye bar’ imbere y’ibigirwamana vyabo, bakabera ab’ inzu ya Isirayeli igitsitaza co kubacumuza, ni co catumye mmanika ukuboko mbarahira yuko bazogibgako n’ibigabitanyo vyabo, ni k’Umwami Uhoraho agize.

13Ntibazonyegēra ngo bankorere igikorwa c’ubuherezi, canke ngo bagire ico bēgēra mu bintu vyanje vyera, mu bintu vyanje vyera cane; ariko bazofatwa n’ibitētērwa vy’ibizira bakoze.

14Nzobahindura abo kuzezwa ingoro, mbahe gukora ibikorwa vyaho vyose, bakore n’ikintu cose kihakorwa.

15Arikw abaherezi b’Abalewi, bene Sadoki, bāsigaye bitondera ivyo bājejwe vy’ahēra hanje igihe Abisirayeli bāzimira bakanta, abo bo bazonyegēra kugira ngo bankorere; bazohagarara imbere yanje bampēreza ibinure n’amaraso, ni k’Umwami Uhoraho agize:

16bazokwinjira ahēra hanje, bēgēre ameza yanje, kugira ngo bankorere, bazigame ivyo nabajeje.

17Kandi ni baza baciye mu birimba vy’ inyubakwa, baze bāze bambaye imyambaro yera; ntibaze bagire ico bambara c’ubgoya igihe bakorera ku birimba vy’inyubakwa no mu ngoro.

18Baze bambare ibitambara vyera mu mitwe, bakenyere amabutura yera; ntihakagire ico bazokenyera cobatera kubira ivyuya.

19Kandi ni basohoka bagashika mu ntangaro, ngo bēgēre abantu bariyo, baze babanze biyambure imyambaro iyo bambara bahereza, bayibīke mu vyumba vyera; maze bambare iyindi myambaro kugira ngo boye kwezesha abantu imyambaro yabo.

20Kandi ntibakimoshe inkomvorera, canke ngo batereke umushatsi muremure, baze bīkatishe gusa.

21Ntihakagire uwo mu baherezi anywa vino igihe bagira baje mu nyubakwa.

22Kandi ntibaze bacūre abapfakazi, canke ngo bābīre uwirukanywe: ariko baze basabe inkumi zo mu ruvyaro rw’inzu ya Isirayeli, canke se baze bacūre umupfakazi yapfakaye mu baherezi.

23Baze bigishe abantu banje gutandukanya ivyera n’ibitar’ ivyera, babamenyeshe itandukaniro ry’ibihumanye n’ibidahumanye.

24Mu mibūrano baze babe ari bo baca imanza; nk’ukw ivyagezwe vyanje bibgiriza, abe ari ko bazica; kandi baze bitondere ivyagezwe vyanje n’amabgirizwa yanje mu misi mikuru yanje yose yashinzwe; kandi baziririze n’amasabato yanje.

25Ntibakēgēre umuvyimba w’umuntu n’umwe kugira ngo ntibīhumanye; nta bandi bokwihumanisha shit’ abaye se canke nyina, cank’ umuhungu wiwe cank’ umukobga wiwe, canke mukuru we canke murumuna we, canke mushiki we atarābīrwa.

26Maze ni yamara guhumanurwa bamuharūrire imisi ndwi.

27Umusi azosubira gushika ahēra, agashika mu nyubakwa, akaja ahēra ngw ahereze, az’ atange ikimazi co kubgiwe gitangirwa ivyaha, ni k’Umwami Uhoraho agize.

28Kandi ntihaze hagire uwundi mugabane bagira: umugabane wabo ni jewe; ntimuze mubahe ishamvu mu Bisirayeli: ishamvu yabo ni jewe.

29Baze barye kw ishikanwa ry’amafu, no ku kimazi gitangirwa ivyaha, no ku kimazi c’impongano; kand’ ikintu cose kirobanurirwa Imana mu Bisirayeli kize kibe icabo.

30Indobanurwa z’imishuzo yose y’ivyimburwa vyose, bo n’ishikanwa mushikana ry’ikintu cose, bize bibe ivy’ abaherezi: kandi muze mucire umuherezi kw ifu yanyu y’umushuzo isewe iheretuwe, kugira ngw amazu yanyu ahoremw’ umugisha.

31Abaherezi ntibakagire icipfiriye na kimwe bazorya, cank’ ikirangara, ar’ ico mu biguruka canke mu bitungwa.

← Chapter 43 Jump to: Chapter 45 →