Ezekiel 47

Kirundi (Bibliya Yera 1951, 1967 (Burundi))

← Chapter 46 Jump to: Chapter 48 →

1Nukw angarukana ku muryango w’ingoro; ngize ntya, mbona har’ amazi yiburuka ava musi y’urwinjiriro rw’irebe ry’ingoro, atembera i burasirazuba, kukw ingoro yari yerekeye i burasirazuba nyene; nukw ayo mazi yatemba, ava i buryo bg’ ingoro, aca i ruhande y’igicaniro, ahahera i bumanuko.

2Maz’ andengana ikirimba cerekeye i burārūko, ancisha mu nzira igendanye urugo inyuma, anshikana ku kirimba c’inyuma kirābana n’i burasirazuba. Ngize ntya, mbona amazi asokoroka ku ruhande rwaco rw’i buryo.

3Maz’ uwo muntu avuye aho arikw aragenda yerekeye i burasirazuba, yar’ afise umugozi mu ntoke; awugeresha amatambge igihumbi ahwanye n’ay’ ukuboko uciriye mu nkokora; maz’ anjabutsa ayo mazi, amazi andenga ibirenge.

4Arongera agera amatambge igihumbi, anjabutsa ayo mazi, amazi angera mu mavi. Arongera agera igihumbi, arayanjabutsa, amazi angera mu rukenyerero.

5Hanyuma agera ikindi gihumbi, aba uruzi ntashobora kujabuka: kukw amazi yari yuzuye, yar’ asigaye ar’ ayo kujabukwa n’uwoga, uruzi ntirwari rukijabukwa igihagararo.

6Maz’ arambaza, ati Mwana w’umuntu, mbeg’ ivyo urabibonye? Maz’ arangarukana, tujana inkombe y’uruzi.

7Nkiriko ndagenda, ngize ntya mbona ku nkombe y’uruzi har’ ibiti vyinshi cane hakurya no hakuno.

8Maz’ arambarira, at’ Aya mazi atembera i burasirazuba, azomanuka mu kiyaya Araba, arinde ashika mu kiyaga c’umunyu; ni yashika mur’ ico kiyaga, azokiza amazi yo muri co.

9Kand’ ah’ urwo ruzi ruzoshika hose ikintu cose kizima gikunda kunyogomba mu mazi kizobona uko kibaho; kandi hazobamwo n’isinzi ry’amafi ryinshi kukw ayo mazi ashitseyo, kand’ amazi yo mu kiyaga azokira, ikintu cose kizima kibone uko kibaho ah’ urwo ruzi ruzoshika hose.

10Kand’ abarovyi bazohagarara ku nkombe zaco; uhereye kuri Eni‐gedi ugashitsa kuri Enegulayimu hazoba aho gutera insenga; hazobamw’ amafi y’uburyo bginshi, nk’amafi yo mu kiyaga kinini, kand’ azoba ari menshi cane.

11Arikw ivyondo n’ibishanga vyo ku nkengēra yaco ntibizokira, bizoheberwa umunyu.

12Kandi ku nkombe z’urwo ruzi, hakurya no hakuno, hazomera igiti cose cama ibiribga; ibibabi vyavyo nta ho bizokabirana, kandi n’ivyo vyama nta ho bizobura: bizohora vyera bijana n’ukwezi uko gutashe, kukw amazi abitunga ava ahēra h’urusengero: ivyo vyama bizoba ivyo kurya, n’ibibabi vyavyo bizoba umuti wo kuvūra.

13Uku ni k’Umwami Uhoraho agize, at’ Uru ni rwo rugabano muzogabanirakw igihugu, ngo kibere ishamvu imiryango y’Abisirayeli ukw ar’ icumi n’ibiri: Yosefu azotwara imigabane ibiri.

14Kandi namwe muzocegukira, umuntu wese aringanire n’uwundi; ari co gihugu namanitse ukuboko ndahira ba sogokuruza ko nzokibaha; ico gihugu nyene muzocegukira kibabere ishamvu.

15Nuk’ uru ni rwo ruzoba urugabano rw’igihugu: urubibe rw’i burārūko n’uguhēra ku kiyaga kinini, ugaca i Hetiloni, ugashitsa ahafata i Zedadi,

16n’i Hamati, n’i Berota, n’i Siburayimu ho hagati y’urugabano rw’i Damasiko n’urugabano rw’i Hamati, n’i Hazeri‐hatikoni hahera ku rugabano rw’i Hawurani.

17Nuko rer’ urugabano ruzovuduka ku kiyaga ruce i Hazari‐Enoni ho ku rugabano rw’i Damasiko, ruce ahahera i burārūko h’urugabano rw’ i Hamati. Urwo ni rwo rubibe rw’i burārūko.

18Urubibe rw’i burasirazuba ruzoba Yorodani, hagati y’i Hawurani n’i Damasiko n’i Gileyadi n’igihugu c’i Bgisirayeli; muze mugere muhereye ku rugabano rw’i burārūko mushitse ku kiyaga c’i burasirazuba. Urwo ni rwo rubibe rw’i burasirazuba.

19Urubibe rw’i bumanuko ruzojana i bumanuko nyene, ruvudutse i Tamari ugashitsa ku mazi y’i Meribati‐kadeshi, ugashitsa no ku ruzi rwa Egiputa, ugashitsa no ku kiyaga kinini. Urwo ni rwo rubibe rw’i bumanuko rujana i bumanuko.

20Urubibe rw’i burengerazuba ruzoba ikiyaga kinini, ruvudutse mu rugabano rw’i bumanuko rugashika ahafata i Hamati. Urwo ni rwo rubibe rw’i burengerazuba.

21Uko ni ko muzogabura iki gihugu, ukw imiryango y’Abisirayeli ingana.

22Kandi muze mukigaburishe ubupfindo ngo kibabere ishamvu, mwebge n’abanyamahanga baba muri mwebge, bakavyarira abana muri mwebge; muze mubaharūre nk’aho bavyawe n’Abisirayeli; bazotwara ishamvu hamwe namwe mu miryango y’Abisirayeli.

23Kand’ umuryango umunyamahanga azoba arimwo, az’ abe ari ho ahabga ishamvu yiwe, ni k’Umwami Uhoraho agize.

← Chapter 46 Jump to: Chapter 48 →