Ezekiel 34

Kirundi (Bibliya Yera 1951, 1967 (Burundi))

← Chapter 33 Jump to: Chapter 35 →

1Ijambo ry’Uhoraho ryanjeko,

2riti Mwana w’umuntu, būrira abungere baragira Abisirayeli, ubabūrire, ubgire abo bungere, ut’ Uku ni k’Umwami Uhoraho agize, ati Bazobona ibara, abungere b’Abisirayeli bīragira ubgabo! Mbeg’ abungere ntibāri bakwiye kuragira intama?

3Ut’ Ariko mweho muzirya ibinure, mukambara ubgoya bgazo, mukabāga izinuze; ariko ntimuragira intama.

4Īdakomeye ntimwayisindagije, n’īrwaye ntimwayivūye, n’īvunitse ntimwayunze, n’iyirukanywe ntimwayigarukanye, canke ngo murondere iyazimiye; ariko mwazitwaje igitugu n’amanyama.

5Nuko zirasābagira kukw ata mwungere; zihinduka ivyo kurya vy’ibikōko vyose vyo mw ishamba, zirasābagira.

6Intama zanje zayerereye ku misozi yose, no ku gasozi kose karekare; mber’ intama zanje zāsābagiriye mw isi yose; kandi nta warushe azirondera canke ngw azibariritse.

7Nuko rero, ni mwumve ijambo ry’Uhoraho, yemwe mwa bungere:

8ngo Ndahiye ukubaho kwanje, ni k’Umwami Uhoraho agize, n’ ukuri intama zanje ko zahindutse inyagano, zikaba ivyo kurya vy’ ibikōko vyose vyo mw ishamba, kubgo kutagira umwungere, kand’ abungere banje ntibarondere intama zanje, ariko bakīragira ubgabo, ntibaragire intama zanje;

9nuko rero, ni mwumve ijambo ry’ Uhoraho, yemwe mwa bungere:

10Uku ni k’Umwami Uhoraho agize, ati Rāba abo bungere tuzohigūra twe na bo; kand’ intama zanje nzozibaronderako, ndababuze gusubira kuziragira; kand’ abo bungere ntibazoba baciragira ukundi; nzokiza intama zanje amenyo yabo, zoye kuba inyama zabo.

11Kuk’ ukw ari k’Umwami Uhoraho agize, ati Rāba jewe, jewe ubganje, ndīgīriye kurondera intama zanje, ndazibariritse.

12Nk’ uk’ umwungere abariritsa umukuku wiwe mu gihe ari mu ntama ziwe zāsābagiriye kure, ni ko nanje nzobariritsa intama zanje; nzozikiza ndazikūre ahantu hose zāsābagiriye ku musi wo gufurangana w’ubgirakabiri.

13Kandi nzozizana ndazikūye mu mahanga, ndazikoranirize hamwe ndazikūye mu bihugu, nzozizana ndazishikane mu gihugu cazo bgite; nzoziragira ku misozi y’i Bgisirayeli, i ruhande y’imigende y’amazi, n’ ahantu hose har’ abantu mu gihugu.

14Nzoziragira mu canya ciza, kandi mu mpinga z’imisozi miremire y’i Bgisirayeli ni ho zizogira umugutu; aho ni ho zizovyagira, ziri mu mugutu mwiza, zirishe mu canya c’ubgatsi buremvye ku misozi y’i Bgisirayeli.

15Ni jewe ubganje nzokwiragirira intama zanje, ndazivyagize, ni k’ Umwami Uhoraho agize.

16Nzorondera iyazimiye, ngarukane iyahuvye, nunge īvunitse, nsindagize īrwaye, izivyibushe n’izikomeye ndazibogeke; zose nzoziragira mu buryo buroranye.

17Kandi nawe, mukuku wanje, uku ni k’Umwami Uhoraho agize, ati Rāba, ngira nce urubanza hagati y’ibitungwa n’ibindi, hagati y’impfizi z’intama n’iz’ impene.

18Mbega muvyita icoroshe, iyo murishije umugutu mwiza, uwo mwāri mushigaje mukawutakangisha inzāra? Cank’ iyo mushōtse amazi y’umusarara, ayo mwāri mushigaje mukayaca iyondoyondo?

19Maz’ intama zanje zo, zisigaye zirya ivy’ inzāra zanyu zātakanze, zigashōka ay’ inzāra zanyu zāciye iyondoyondo.

20Nuko rero, uku ni k’Umwami Uhoraho azibariye, at’ Ehe jewe, jewe nyene, ngira nce urubanza hagati y’ibitungwa bivyibushe n’ ibindi binanutse.

21Ko muzisitisha imbavu n’ibitugu, izirwaye zose mukazisunikisha amahembe yanyu, gushitsa muzisanzarije kure;

22ni co gituma ngira nkize umukuku wanje ngo ntube ukiba inyagano ukundi; kandi nce urubanza hagati y’ibitungwa n’ibindi.

23Nzoziha umwungere umwe, na we azoziragira, ni we musavyi wanje Dawidi; azoziragira, abe umwungere wazo.

24Nanje Uhoraho, nzoba Imana yazo, n’ umusavyi wanje Dawidi azoba segaba muri zo; ni jewe Uhoraho mbivuze.

25Kandi nzosezerana na zo isezerano ry’amahoro, kandi nzoherengeteza ibikōko vy’inkazi mu gihugu: maze zizokwibera amahoro mu gahinga, zīryamire mu mashamba.

26Nzoziha umugisha hamwe n’uturambi duherereye ku musozi wanje; kandi nzorekura imvura mu gihe cayo; hazogwa imvura ihesha umugisha.

27Maz’ igiti co mw ishamba kizokwama, isi yimbuke ivyimburo vyayo; na zo zizokwibera amahoro mu gihugu cazo; kandi zizomenya yuko jewe nd’Uhoraho, igihe nzoba mmaze kuvuna ibiti vy’ingōgo zambitswe, no kuzirokora mu maboko y’abāzihinduye abaja.

28Ntizizokwongera kuba inyagano z’abanyamahanga ukundi, cank’ ibikōko vyo kw isi ngo bizirotse; ariko zizokwibera amahoro, ata kiziteye ubgoba.

29Nzozimereza umuyigwe w’agahagarika, kandi ntizizosubira kumarwa n’inzara mu gihugu, canke gutēterezwa n’abanyamahanga ukundi.

30Maze zizomenya yuko jewe Uhoraho Imana yazo ndi kumwe na zo, kandi yukw ar’ abantu banje, ari bo ab’ inzu ya Isirayeli, ni k’Umwami Uhoraho agize.

31Kandi namwe ntama zanje, mwa ntama z’icibare canje, mur’ abantu, nanje nd’ Imana yanyu, ni k’ Umwami Uhoraho agize.

← Chapter 33 Jump to: Chapter 35 →