Ezekiel 38

Kirundi (Bibliya Yera 1951, 1967 (Burundi))

← Chapter 37 Jump to: Chapter 39 →

1Ijambo ry’Uhoraho ryanjeko,

2riti Mwana w’umuntu, tungīra ijisho ryawe Gogi wo mu gihugu c’i Magogi, umwami w’i Roshi n’i Mesheki n’i Tubali, umubūrire,

3ut’ Uku ni k’Umwami Uhoraho agize, at’ Ehe nzohigūra nawe, ewe Gogi, mwami w’i Roshi n’i Mesheki n’i Tubali:

4nzogukimiranya, nshire igera mu mibangabanga yawe, ngukwegane n’ingabo zawe zose, n’amafarasi n’abayagenderako, bose bambaye ivyuma vyo kwīkīngiriza, ar’ igitero kinini citwaje inkinzo nto‐nto na nini‐nini, bose bafashe inkota:

5ab’ i Buperesi n’abo muri Etiyopiya n’ab’ i Puti bazoba bari kumwe na bo, bose bari n’inkinzo n’inkofero z’ivyuma;

6na Gomeri n’ingabo ziwe zose, n’ab’ inzu ya Togaruma baba ahahera i burārūko, n’ingabo zabo zose: mbere bazoba ar’ amahanga menshi ari kumwe nawe.

7Kenyera witegure, mwe n’ibitero vyawe vyose bikoraniye ah’ uri, ubabere umugabisha.

8Hahise imisi myinshi uzovyutswa: mu myaka y’iherezo uzoza mu gihugu cābogowe gikūwekw inkota, kirimw’ ubgoko bgakoranirijwe hamwe bavuye mu mahanga menshi, bari ku misozi y’i Bgisirayeli yahoze ar’ amatongo; bākūwe mu mahanga, biberaho ata co binona, bose uko bangana.

9Nuk’ uzodūga, uje nk’ikirura, uzoba nk’igipfungu cubikije mu gihugu, mwe n’ingabo zawe zose, n’amahanga menshi muri kumwe.

10Uku ni k’Umwami Uhoraho agize, at’ Uwo musi ni washika, hazoza ivyiyumviro mu mutima wawe, wīgīre imigabo y’ibibi:

11maz’ uzovuga, uti Hinge ndūge ntere igihugu c’imihana itubakiwe inzitiro z’amabuye, ngīre abibereye impore ata co binona, bose uko bangana baba ahatubakiwe inzitiro, ata n’imyugariro cank’ amarembo bagira;

12kugira ng’ uhasahure, uhanyage iminyago, ubangurire ukuboko kwawe ahāhoze ar’ imisaka hagasubira kubamw’ abantu, no ku bgoko bgākoranirijwe hamwe buvuye mu mahanga, bāmaze kwironkera amatungo n’ibintu, bakibera hagati mw isi.

13Ab’i Sheba n’ab’i Dedani n’abadandaza b’i Tarushishi n’abahambaye nk’ imigunza y’intambge baho bose, bazokubaza, bati Mbeg’ uzanywe no gusahura? Wakoranije ico gitero cawe kunyaga iminyago, no gutwara ifeza n’izahabu, no kwishorerera amasho no gutwara ibintu, no kunyaga iminyago myinshi?

14Nuko rero, mwana w’umuntu, būrira Gogi, ut’ Uku ni k’Umwami Uhoraho agize, ati Kur’ uwo musi, igihe abantu banje b’Abisirayeli bazoba bibereye impore, mbega ntuzobimenya?

15Ico gihe uzoza uvuye i wawe ahahera i burārūko, mwe n’amahanga menshi muzananye, bose bagendera ku mafarasi, ar’ igitero kinini n’ingabo nyinshi;

16maz’ uzotera abantu banje b’Abisirayeli, umeze nk’ igipfungu cubikije mu gihugu: maze mu misi y’iherezo nzokugomora utere igihugu canje, kugira ngw amahanga az’ amenye ico ndi co, igihe nzokwiyerekanira kuri wewe imbere yabo ko nd’ Uwera, ewe Gogi!

17Uku ni k’Umwami Uhoraho agize, ati Mbega si wewe navuze mu bihe vya kera, mvugiye mu basavyi banje b’Abisirayeli navugisha, bābūye imyaka myinshi mur’ ico gihe, yukw ari wewe nzorungika kubatera?

18Kur’ uwo musi, igihe Gogi azotera igihugu c’i Bgisirayeli, uburake bganje buzompfunduka mu mazuru, ni k’Umwami Uhoraho agize.

19Kuko navuganye ifuhe n’ uburake bgaka umuriro, nti N’ ukuri, kur’ uwo musi hazoba ugutigita gukomeye mu gihugu c’i Bgisirayeli;

20bitume amafi yo mu kiyaga, n’ibisīga vyo mu kirēre, n’ibikōko vyo mw ishamba, n’ivyikwega vyose vyikwega hasi, n’abantu bose bari kw isi, bihindira agashitsi imbere yanje, n’imisozi yubikwe, n’ahantu h’agatembge hasiduke, n’inzitiro zose zisenyukire hasi.

21Nzohamagaza inkota yo kumurwaniriza ku misozi yanje yose, ni k’Umwami Uhoraho agize: inkota y’umuntu wese azoyirwanisha mugenzi we.

22Nzomushitsakw iteka namuciriyeko, ndamuhanishe ikīza no kuvishwa amaraso; kandi we n’ingabo ziwe n’ amahanga menshi ari kumwe na we, nzobarekurirakw imvura y’ isegenya, n’imināna y’urubura, n’ umuriro n’amazuku.

23Uko ni ko nzogaragaza icubahiro canje, niyerekane ko nd’ Uwera, kandi nzokwimenyekanisha mu maso y’ amahanga menshi; maze bazomenya yuko jewe nd’ Uhoraho.

← Chapter 37 Jump to: Chapter 39 →