Ezekiel 43

Kirundi (Bibliya Yera 1951, 1967 (Burundi))

← Chapter 42 Jump to: Chapter 44 →

1Maze hanyuma anjana ku kirimba, ni co kirimba c’ ahahera i burasirazuba:

2ngize ntya mbona ubgiza bg’Imana y’ Abisirayeli buje buturutse mu nzira y’i burasirazuba. Ijwi ryayo ryari rimeze nk’ugusūma kw’ amazi menshi; isi ikayanganishwa n’ubgiza bgayo.

3Ivyo neretswe vyari bimeze nk’ivyo neretswe igihe nazanwa no guhonnya igisagara; ivyo neretswe vyari bimeze nk’ivyo nerekewe ku ruzi Kebari; maze nikubita hasi nubamye.

4Maz’ ubgiza bg’Uhoraho bginjira mu ngoro buciye mu kirimba gihera i burasirazuba.

5Mpwemu aranterura, anshikana mu nyubakwa; ngize ntya, mbona ubgiza bg’Uhoraho bguzuye ingoro.

6Maze numva ūmbarira ari mu ngoro; nuk’ umuntu aca ampagarara i ruhande.

7Arambgira, ati Mwana w’umuntu, aha hantu n’ah’ intebe yanje y’ubgami, n’ ahantu ibirenge vyanje bizohora bishinze, ni ho nzobana n’Abisirayeli ndi hagati muri bo gushitsa ibihe bidashira: kand’ ab’ inzu ya Isirayeli ntibazokwongera kwanduza izina ryanje ryera ukundi, bo ubgabo, cank’ abami babo, ngo baryandurishe ubumaka bgabo, cank’ imivyimba y’abami babo iri mu ntatemwa zabo,

8kuko begereje irebe ryabo hambavu y’irebe ryanje, n’igisapfu cabo hambavu y’igisapfu canje, hagati yanje na bo hagaca urugo gusa; bakandurisha izina ryanje ryera ibizira vyabo bākora: ni co catumye mbayogeza mfise uburake.

9Noneho ni bankūre imbere ubgo bumaka bgabo, n’imivyimba y’abami babo, babinshire kure, mbone kuba hagati muri bo gushitsa ibihe bidashira.

10Nuko rero, mwana w’umuntu, uze wereke ab’ inzu ya Isirayeli iyi ngoro, kugira ngo bamāramāzwe n’ibigabitanyo vyabo; bayigere nk’ukw ikigereranyo cayo kimeze.

11Maze ni bamāramāzwa n’ivyo bākoze vyose, ubamenyeshe iyo ngoro ukw isa, n’ imyubakire yayo ukw imeze, no mw isohokero ry’irebe ryayo no mu rwinjiriro rwayo, n’ukw imeze hose, n’amabgirizwa yayo yose, n’ukw isa hose, n’ivyagezwe vyayo vyose; uvyandikire imbere yabo, kugira ngo bame bibuka ukw isa yose, n’amabgirizwa yayo yose, kugira ngo bayitondere.

12Iki ni co cagezwe c’iyo ngoro: mw itāba ry’uwo murwa, ah’ urugabano rwayo ruyikīkūje hose rugarukira, hazoba hēra cane. Eh’ ico ni co cagezwe c’ingoro.

13Kand’ aya az’ abe ari yo matambge y’igicaniro, y’ukuboko uciriye mu nkokora (itambge ryose rize rirenzekw itambge ry’intoke): intebe yaco, uburebure bg’igihagararo bube itambge rimwe, no mw iniguriro ryayo aho rigera, bube itambge rimwe nyene; n’ umubuga wayo uyikikuje ube uw’ itambge rimwe ry’intoke; uko ni kw intebe y’igicaniro ikwiye kumera.

14Guhera ku ntebe hasi gushitsa ku ntera y’ahahera hepfo, habe amatambge abiri y’ukuboko uciriye mu nkokora, no mw iniguriro ry’iyo ntera aho rigera, habe itambge rimwe; kandi guhera kur’ iyo ntera ngufi ugashitsa ku ntera ndende habe amatambge ane, no mw iniguriro ry’iyo ntera aho rigera, habe itambge rimwe.

15N’ ahahera hejuru ku gicaniro habe amatambge ane; kandi hejuru ku gicaniro ahacanwa nyene haze hashingwe amahembe ane.

16Aho gucanwa, uburebure bg’amakika bgaho bube amatambge cumi n’ abiri, n’ubgaguke bube icumi n’ abiri nyene, impande zose ukw ari zine zingane.

17Kand’ intera gihagazeko, uburebure bgayo bg’ amakika bube amatambge cumi n’ane, n’ubgaguke bube icumi n’ane nyene, impande zose ukw ari zine zingane; umubuga wayo uyikikuje ugende ar’ igihimba c’itambge ry’ukuboko uciriye mu nkokora, no mw iniguriro aho rigera rigende ar’ itambge rimwe impande zose. Ingazi yaco iherēre i burasirazuba.

18Maz’ arambarira, ati Mwana w’umuntu, uku ni k’Umwami Uhoraho agize, at’ Aya ni yo mabgirizwa y’igicaniro bazoshitsa umusi bazocubaka, kugira ngo bacoserezekw ibimazi, bakimijekw amaraso.

19Abaherezi b’ Abalewi, bo mu ruvyaro rwa Sadoki, ari bo bampora hafi ngo bankorere, uz’ ubahe imasa y’umukangara, ibe ikimazi gitangirwa ivyaha, ni k’Umwami Uhoraho agize.

20Uze wābīre ku maraso yaco, uyashire ku mahembe ukw ar’ ane y’igicaniro, no ku nkokora z’intera yaco ukw ari zine, no ku mubuga uyikikuje impande zose: uko ni k’uzogihumanura, ukagitangira impongano.

21Kand’ uze wābīre iyo masa y’ikimazi gitangirwa ivyaha, bagituririre ahāshinzwe mu gikebere c’iyo ngoro, inyuma y’ahēra.

22Maze ku musi ugira kabiri uz’ utange isuguru y’impene itagira agasembga kw ikimazi gitangirwa ivyaha; bayihumanuze igicaniro nk’uko bāgihumanurishije ya masa.

23Ni waheza kugihumanura, uz’ utange imasa y’umukangara itagira agasembga, n’isuguru y’intama itagira agasembga ikūwe mu mukuku.

24Uheze uvyigize hafi imbere y’Uhoraho, abaherezi babimemerek’ umunyu, babitangekw ibimazi vyoserezwa Uhoraho.

25Uko bukeye kumara imisi ndwi, uze wame ugera isuguru y’impene yo kuba ikimazi gitangirwa ivyaha; kandi baze bame bagera imasa y’ umukangara n’isuguru y’intama ikūwe mu mukuku, bitagira agasembga.

26Baze bamare imisi ndwi batangira igicaniro impongano, bagihumanure; uko ni ko bazokirobanura.

27Maze ni barangiza iyo misi, uhereye umusi ugira umunani, abaherezi baze bahereko babatangire ibimazi vyanyu ku gicaniro, ari vyo bimazi vyo kwoswa n’ibimazi vy’ishimwe; nanje nzobākīrira, ni k’Umwami Uhoraho agize.

← Chapter 42 Jump to: Chapter 44 →