Ezekiel 36

Kirundi (Bibliya Yera 1951, 1967 (Burundi))

← Chapter 35 Jump to: Chapter 37 →

1Nuko mwana w’umuntu, menyesha imisozi y’i Bgisirayeli ibizoba, uti Yemwe mwa misozi y’i Bgisirayeli, ni mwumve ijambo ry’Uhoraho.

2Uku ni k’Umwami Uhoraho agize, at’ Umwansi ko yabashinyaguriye, ngw Awa! ngo Ya misozi miremire yamyeho kera izoba iyacu twiganziye:

3nuko rero, shirak’ ubivuge, ut’ Uku ni k’Umwami Uhoraho agize, ati N’ukuri ko babagize amatongo, bakabayongobeza babaturutse impande zose, mukaba inyegu ayandi mahanga yegukiye, mugatorwakw ikineguro n’akanwa k’imvuzi, mugahinduka agatwengo ku bantu;

4nuko rero, yemwe misozi y’i Bgisirayeli, ni mwumve ijambo ry’Umwami Uhoraho: Uku ni k’Umwami Uhoraho abarira imisozi n’uturambi, n’imigende y’amazi n’imyonga, n’ahasigaye ar’ amatongo n’ibisagara vyacitse imisaka, bigahinduka inyagano n’ agatwengo ku masigarira y’amahanga abikikije;

5mbere, uku ni k’Umwami Uhoraho agize, ati N’ukuri mvuganye ifuhe rimeze nk’umuriro ku vy’ayandi mahanga no ku vy’Abanyedomu bose bīhaye igihugu canje kw inyegu, bari n’ umunezero wuzuye imitima, n’ akagaye kose ko mu mushaha, ngo bagitange gisahurwe.

6Kubg’ ivyo, vuga ibizoba ku gihugu c’i Bgisirayeli, ubgire imisozi n’uturambi, n’imigende y’amazi n’ imyonga, ut’ Uku ni k’Umwami Uhoraho agize, ati Rāba, mvuganye ifuhe n’uburake, kuko mwamāramājwe n’amahanga:

7ni co gitumye mbimanikiye ukuboko nkarahira, ni jewe Umwami Uhoraho mbivuze, nti N’ukuri, ayo mahanga nyene abakikije, na yo azomāramāzwa.

8Ariko mweho, yemwe misozi y’i Bgisirayeli, muzohūrika amashami yanyu, mutengengere ivyo gutunga abantu banje b’Abisirayeli; kuko bagira baze.

9Ehe mpagaze mu ruhande rwanyu, ngira mbahindukirire, kandi muzorimwa mubibgeko.

10Kandi nzobagwizakw abantu, ni bo nzu ya Isirayeli yose iyo bava bakagera; kand’ ibisagara bizogerērwamwo, n’amatongo azokwubakwa.

11Nzobagwizakw abantu n’amatungo, bigwire birondoke: nzotuma musagazwako, mumere nk’ uko mwari mumeze ubga mbere; kandi nzobagirira neza kuruta uko nabagirira ubga mbere: maze muzomenya yuko jewe nd’ Uhoraho.

12Mbere nzotuma abantu bagendagenda kuri mwebge, ni bo bantu banje b’Abisirayeli; namwe muzoba ishamvu yabo, mubabere umwandu, kandi nta ho muzosubira kubīcira abana ukundi.

13Uku ni k’Umwami Uhoraho agize, ati Ko bababarira, bat’ Ur’ igihugu kimiragura abantu, kigatuma ihanga rikibamwo riba imbura;

14ni co gituma utazokwongera kumiragura abantu ukundi, canke gutuma ihanga rikubamwo ryongera kuba imbura, ni k’Umwami Uhoraho agize.

15Kandi sinzokundira agashinyaguro k’abanyamahanga ko wongera kwumva kakugarutseko, cank’ ibitutsi vy’amoko ko bisubira kukuzako, kand’ ihanga rikubamwo ntuzosubira kuritsitaza ukundi, ni k’Umwami Uhoraho agize.

16Kand’ ijambo ry’Uhoraho ryongera kunzako,

17riti Mwana w’umuntu, ab’ inzu ya Isirayeli igihe bāba mu gihugu cabo, bācononesha ingeso zabo n’ibikorwa vyabo: ingeso zabo imbere yanje zambereye nk’umugore ari mu miziro.

18Ni co catumye mbasendanishak’ uburake bganje mbahōye amaraso bāsendanishije mu gihugu, n’uko bācononesheje ibigirwamana vyabo;

19maze mbasābagiriza mu mahanga, bashwiragirira mu bihugu: nabaciriye urubanza ruhwanye n’ingeso zabo n’ibikorwa vyabo.

20Kandi bamaze gushika mu mahanga bāgiyemwo, bātukishije izina ryanje ryera; kukw abantu bābavuga, ngw Aba n’abantu b’Uhoraho, kandi ngo Bavuye mu gihugu ciwe.

21Ariko natinyiriye izina ryanje ryera, iryo ab’ inzu ya Isirayeli batukishije mu mahanga bagiyemwo.

22Nuko rero, barira ab’ inzu ya Isirayeli, ut’ Uku ni k’ Umwami Uhoraho agize, at’ Ibi simbikora kubganyu, yemwe ab’ inzu ya Isirayeli, ariko ni kubg’ izina ryanje ryera, iryo mwatukishije mu mahanga mwagiyemwo.

23Kandi nzokwubahiriza izina ryanje rikuru ryatukishijwe mu mahanga, iryo mwatukishije hagati muri yo; nukw amahanga azomenya yuko jewe nd’ Uhoraho, igihe nzokwiyerekanira muri mwebge imbere yayo ko nd’ Uwera, ni k’ Umwami Uhoraho agize.

24Kuko nzobakūra mu mahanga, mbakoranirize hamwe mbakūye mu bihugu vyose, mbajane mu gihugu canyu bgite.

25Kandi nzobamijakw amazi meza, mushire imvyiro: nzoboza imyanda yanyu yose, n’ibigirwamana vyanyu vyose.

26Kandi nzobaha umutima musha, mbashiremw’ impwemu nsha; nzokūra umutima ukomeye nk’ibuye mu mibiri yanyu, mbahe umutima woroshe nk’ inyama.

27Kandi nzobashiramwo Mpwemu wanje, ndabagendeshereze mu vyagezwe vyanje, namwe muzokwitondera amabgirizwa yanje, muyashitse.

28Kandi muzokwibera mu gihugu nahaye ba sogokuruza, mube abantu banje, nanje mbe Imana yanyu.

29Kandi nzobakiza ibibanduza vyose, mbahurumbirize ingano ndazikikimvye, kandi sinzobatēza inzara.

30Nzokikimvya ivyama ku biti biribga, n’uburumbuke mu mirima, kugira ngo mwoye gusubira kuba igitutsi mu mahanga c’uko muhoramw’ inzara.

31Ni ho muzokwibukira ingeso zanyu mbi, n’ibikorwa vyanyu bitari vyiza; kandi muzokwiyanka urunuka, kubg’ ibigabitanyo vyanyu n’ibizira mwakoze.

32Ivyo simbikora kubganyu, mubimenye, ni k’Umwami Uhoraho agize; mutēterezwe, mumāramāzwe n’ ingeso zanyu, yemwe ab’ inzu ya Isirayeli.

33Uku ni k’Umwami Uhoraho agize, at’ Umusi nzoboza ibigabitanyo vyanyu vyose nzotuma ibisagara bigerērwamwo, n’ amatongo yubakwe.

34Kand’ igihugu cār’ imisaka kizorimwa, naho cābonekera abāhaca bose ar’ imisaka.

35Bazovuga, bat’ Iki gihugu cahoze ar’ imisaka gihindutse nka rya tongo ryari muri Edeni; kand’ ibisagara vyari bicitse amatongo n’imisaka bigasanganguka, none bikikijwe inzitiro, bibamw’ abantu.

36Maz’ amahanga azoba akibakikije azomenya yukw ari jewe Uhoraho nubatse ahāri hārasenyutse, ngateragira imbuto ahāri hārasivye: ni jewe Uhoraho mbivuze, kandi nzobishitsa.

37Uku ni k’Umwami Uhoraho agize, at’ Ab’ inzu ya Isirayeli bazosubira kunsigūza ivyo, kugira ngo mbibakorere: nzobagwiriza abantu nk’umukuku.

38Ibisagara vyari vyarahomvotse bizokwuzuramw’ abantu nk’imikuku, bameze nk’imikuku y’ibimazi vyo gutangirwa i Yerusalemu mu misi mikuru yashinzwe: maze bazomenya yuko jewe nd’ Uhoraho.

← Chapter 35 Jump to: Chapter 37 →