Ezekiel 20 — Kirundi (Bibliya Yera 1951, 1967 (Burundi))

1Nuko mu mwaka w’indwi, mu kwezi kwa gatanu, ku musi ugira icumi w’ukwo kwezi, haza bamwe bo mu bakuru b’ Abisirayeli gusiguza Uhoraho, bicara imbere yanje.

2Maz’ ijambo ry’Uhoraho rinzako,

3riti Mwana w’umuntu, vuga, ubarire abakuru b’Abisirayeli, ut’ Uku ni k’Umwami Uhoraho agize, ngo Mbega mwazanywe no kugira ico munsiguza? Ndahiye ukubaho kwanje, ni jewe Umwami Uhoraho mbivuze, nta co nzosiguzwa namwe.

4Mbega ntiwobacira urubanza, ga mwana w’umuntu, ntiwobacira urubanza? Bamenyeshe ibizira vya ba sekuruza.

5Ubabgire, ut’ Uku ni k’Umwami Uhoraho agize, ngo Ku musi natoranijeko Isirayeli, nkamanika ukuboko ndahiye uruvyaro rw’inzu ya Yakobo, nkabiyerekera mu gihugu ca Egiputa, igihe namanika ukuboko mbarahira, nti Nd’Uhoraho Imana yanyu;

6ni kur’ uwo musi nyene namanitse ukuboko mbarahira ko nzobakūra mu gihugu ca Egiputa nkabajana mu gihugu nabatoreye, igihugu gitemba amata n’ubūki, igihugu c’agaheta mu bihugu vyose.

7Ndaheza ndababgira, nt’ Umuntu wese n’ate kure ibizira yamizakw ijisho, mwoye kwihumanisha ibigirwamana vyo muri Egiputa; ni jewe Uhoraho Imana yanyu.

8Ariko barangararije, banka kunyumvira; nta n’umwe yataye ibizira yamizakw ijisho, kandi ntibāhevye ibigirwamana vyo muri Egiputa. Maze nca mvuga ko nzobasukak’ uburake bganje, nkabīmarirakw ishavu mu gihugu ca Egiputa.

9Ariko narwaniye izina ryanje, ngo ntirikēngēreke mu maso y’amahanga barimwo, ari yo nyene ubgayo nabiyerekeye imbere, igihe nabakūra mu gihugu ca Egiputa.

10Nuko mbakūra mu gihugu ca Egiputa mbajana mu bugaragwa.

11Maze mbaha amabgirizwa yanje, mbamenyesha n’ ivyagezwe vyanje, ari vyo bibeshah’ ūvyitondeye.

12Ikigeretseko, mbaha n’amasabato yanje, ngw abe ikimenyetso hagati yanje na bo, kugira ngo bamenye yukw ari jewe Uhoraho mbeza.

13Arikw ab’ inzu ya Isirayeli bārangararije bari mu bugaragwa: ntibāgendera mu mabgirizwa yanje, ariko bāgaye ivyagezwe vyanje, kand’ ari vyo bibeshah’ ūvyitondeye; kandi n’amasabato yanje bārayaziruye rwose. Nuko rero nca mmaramaza ko ngiye kubasukak’ uburake bganje bari mu bugaragwa, mbaherengeteze.

14Ariko narwaniye izina ryanje, ngo ntirikēngēreke mu maso y’ amahanga, ari yo nyene yar’ abahanze amaso igihe nabakūrayo.

15Yamara kandi namanitse ukuboko, ndabarahirira mu bugaragwa yuko ntazobashitsa mu gihugu nabahaye, kimwe gitemba amata n’ ubūki, igihugu c’agaheta mu bihugu vyose,

16mbitewe n’uko bāgaye ivyagezwe vyanje, ntibagendere mu mabgirizwa yanje, bagakēngēra n’amasabato yanje, kukw imitima yabo yakurikira ibigirwamana vyabo.

17Yamar’ ijisho ryanje rirabaziguriza sinabahonnya, sinabaherengetereza rwose mu bugaragwa.

18Maze nabaririye abana babo mu bugaragwa, nti Ntimukagendere mu mabgirizwa ya ba so, kandi ntimukitondere ivyagezwe vyabo, canke ngo mwihumanishe ibigirwamana vyabo.

19Ni jewe Uhoraho Imana yanyu: ni mugendere mu mabgirizwa yanje, mukomeze ivyagezwe vyanje muvyitondere,

20mweze amasabato yanje, abe ikimenyetso hagati yanje namwe, kugira ngo mumenye yuko jewe nd’Uhoraho Imana yanyu.

21Arikw abana babo na bo bārangararije; ntibāgendera mu mabgirizwa yanje, ntibakomeza ivyagezwe vyanje ngo bavyitondere, kand’ ari vyo bibeshah’ ūvyitondeye; bāzirūye amasabato yanje; nuko rero nca mvuga ko ngiye kubasukak’ uburake bganje, nkabīmarirakw ishavu mu bugaragwa.

22Yamara nagaruye ukuboko kwanje, ndwanira izina ryanje ngo ntirikēngēreke mu maso y’amahanga, ari yo nyene yabahanze amaso igihe nabakūrayo.

23Nongeye kumanika ukuboko, ndabarahirira mu bugaragwa yuko nzobasanzaza mu mahanga, nkabashwiragiriza mu bihugu,

24kuko batāshikije ivyagezwe vyanje, ariko bakagaya n’amabgirizwa yanje, bakazirūra amasabato yanje, amaso yabo bakayahanga ibigirwamana vya ba sekuruza.

25Nuko mbaha amabgirizwa ataroranye, n’ivyagezwe bitababeshaho;

26kandi mbahumanisha amashikanwa yabo ubgabo, kuko bātanze imfura zabo zose kw ibimazi ngo zoswe mu muriro, kugira ngo ndabajonjogoze, baruhe bamenye yuko jewe nd’ Uhoraho.

27Nuko rero, mwana w’umuntu, vuga ubgire ab’ inzu ya Isirayeli, ut’ Uku ni k’Umwami Uhoraho agize, at’ Ikindi, ba sogokuruza bandogoseko mu buhemu bgabo;

28kuko, mmaze kubashitsa mu gihugu, ico narahiye mmanitse ukuboko ko nzobaha, uko babonye umusozi wose muremure n’igiti cose gitotahaye, baciye bahatangira ibimazi vyabo, baba ari ho bashikanira ishikanwa ryabo ryo kundatsa; ni ho batangiye ibizana imibabge imota neza, bakahasukira amashikanwa yabo y’ibiturire.

29Maze ndababaza, nt’ Inyanduruko y’ivyo bitabo mujamwo n’ inki? Ni co catumye izina ryavyo ryitwa Ibitabo vyo ku mpinga z’imisozi gushitsa na bugingo n’ ubu.

30Nuko rero bgira ab’ inzu ya Isirayeli, ut’ Uku ni k’Umwami Uhoraho abaza, ngo Mbega ntimwihumanya nk’uko ba sogokuruza bāgize, mukagenda muhurumbira ibizira vyabo nk’ibimaka?

31Kand’ iyo mushikana amashikanwa, mugatanga abana banyu kw ibimazi ngo boswe mu muriro, ntimuba mwihumanishije ivyo bigirwamana vyanyu vyose, gushitsa na bugingo n’ubu? None noshobora nte ko mwogira ico munsiguza, ga mwebge ab’ inzu ya Isirayeli? Ndahiye ukubaho kwanje, ni k’Umwami Uhoraho agize, nkazogira ico nsiguzwa namwe.

32Kandi ko muvuga ngo Muzomera nk’ayandi mahanga, mube nk’imiryango yo mu bindi bihugu, mukorere ibigirwamana vy’ibiti n’ amabuye: mu vyo mwibgira mu mitima nta na kimwe kizoshika.

33Ndahiye ukubaho kwanje, ni k’Umwami Uhoraho agize, n’ ukuri ngira mbe Umwami wanyu, mbaganzishe ukuboko gukomeye kandi kubanguye, n’uburake busukumbuka.

34Kandi nzobakūra mu mahanga, mbakoranirize hamwe mbakūje mu bihugu mwasanzariyemwo ukuboko gukomeye kandi kubanguye, n’uburake busukumbuka;

35maze mbajane mu bugaragwa bg’abanyamahanga, ni ho nzobabūraniriza duhanganye amaso.

36Nk’uko nabūranije ba sogokuruza banyu mu bugaragwa bgo mu gihugu ca Egiputa, ni ko nzobabūranya namwe, ni k’Umwami Uhoraho agize.

37Kandi nzobaharūza inkoni mugenda mutonze umurongo, mbashire mu mugozi ni ryo sezerano;

38kandi nzokūra muri mwebge abagarariji n’abancumuyeko, mbakūre mu gihugu barimwo, ariko ntibazoshika mu gihugu c’i Bgisirayeli: nuko muzomenya yuko jewe nd’ Uhoraho.

39Namwe, mwebge ab’ inzu ya Isirayeli, uku ni k’Umwami Uhoraho agize, ati Hogi ni mugende, umuntu wese n’asabe ibigirwamana vyiwe! Ariko hanyuma muzonyumvira, kand’ izina ryanje ryera ntimuzoba mukirihumanisha amashikanwa yanyu n’ibigirwamana vyanyu.

40Kuko ku musozi wanje wera, ari wo musozi muremure w’i Bgisirayeli, ni k’ Umwami Uhoraho agize, ari ho ab’ inzu ya Isirayeli bose, n’abari mu gihugu bose bazoza kunsaba: aho ni ho nzobākīrira neza, ni ho nzobatumira amashikanwa, n’umushuzo w’imperezwa zanyu, n’ ibintu vyanyu vyose vyejejwe.

41Nzobākīra nk’imibabge imota neza, aho nzobakūrira mu banyamahanga, nkabakoraniriza hamwe mbakūye mu bihugu mwasanzariyemwo; kandi nzokwiyerekanira muri mwebge imbere y’abanyamahanga ko nd’ Uwera.

42Namwe muzomenya yuko jewe nd’ Uhoraho, igihe nzobashitsa mu gihugu c’i Bgisirayeli, ico narahiye ba sogokuruza mmanitse ukuboko ko nzobaha.

43Aho ni ho muzokwibukira ingeso zanyu n’ibikorwa vyanyu vyose, ivyo mwihumanishije; nuko muzokwiyanka kubg’ ivyaha vyanyu vyose mwakoze.

44Kandi muzomenya yuko jewe nd’ Uhoraho, ni namara kugira ico mbakorera kubg’ izina ryanje, kidahwanye n’ingeso zanyu mbi, cank’ ibikorwa vyanyu bihumanye, mwebge ab’ inzu ya Isirayeli, ni k’Umwami Uhoraho agize.

45Maz’ ijambo ry’Uhoraho rinzako,

46riti Mwana w’umuntu, tungīra ijisho ryawe i bumanuko, utumey’ ijambo ryawe, ubūrire ikibira co mu kiyaya c’i bumanuko,

47ubgire ico kibira caho, uti Ni wumve ijambo ry’Uhoraho: uku ni k’Umwami Uhoraho agize, ngw Ehe ngira nkudomekek’ umuriro kand’ uzotongora igiti kibisi cose co muri wewe, n’igiti cumye cose: ibirimi vy’ibibengebenge vyawo ntibizohwamikwa, mu maso h’abantu bose hazobabuka uhereye i bumanuko ukageza i burārūko.

48Maz’ abafise umubiri bose bazobona kw ari jewe Uhoraho nawudometse: kandi ntuzohwamikwa.

49Maze ndavuga, nti Yō! Ewe Mwami Uhoraho! Erega baramvuga, ngo Mbeg’ uyo si gacamigani?