Ezekiel 37

Kirundi (Bibliya Yera 1951, 1967 (Burundi))

← Chapter 36 Jump to: Chapter 38 →

1Ukuboko kw’Uhoraho kwanjeko, ansohokana ndi muri Mpwemu wiwe, anshira hagati mu kiyaya cuzuye amagufa,

2ancisha irya n’ino yayo: maze mbona ari menshi cane mur’ ico kiyaya; kandi yari yumye rwose.

3Maz’ arambaza, ati Mwana w’umuntu, mbeg’ aya magufa yoshobora kuba mazima? Ndishura, nti Mwami Uhoraho, ni wewe wobimenya.

4Arongera arambarira, ati Vugira kur’ aya magufa, uyabarire, uti Yemwe mwa magufa yumye, ni mwumve ijambo ry’Uhoraho.

5Uku ni k’Umwami Uhoraho abarira aya magufa, at’ Ehe ngira nshire impwemu muri mwebge, nuko muraba bazima.

6Kandi ngira mbashirekw imitsi, mbazanekw inyama, mbarenzek’ urukoba, mbashiremw’ impwemu, nuko muraba bazima; kandi muramenya yuko jewe nd’ Uhoraho.

7Nuko nca mvuga nk’uko mbariwe: maze nkiriko ndavuga, haba umuturagaro, mbona isi itigita, amagufa arafatana, igufa na rigenzi ryaryo.

8Ngize ntya mbona arikw imitsi, maz’ inyama ziyazako, urukoba ruzirengako, ariko nta mpwemu zaribgajemwo.

9Maz’ arambarira, ati Vugira ku muyaga, vuga, mwana w’umuntu, ubarire umuyaga, ut’ Uku ni k’Umwami Uhoraho agize, ati Ngwino muve ku miyaga ine, mwa mpwemu, muhumekere kur’ abo bishwe, babe bazima.

10Nuko nca mvuga nk’ukw ambariye, impwemu zibinjiramwo, baba bazima, baravyuka barahagarara, ar’ ingabo nyinshi cane.

11Nukw arambarira, ati Mwana w’umuntu, ayo magufa ni wo muryango wose wa Isirayeli: ehe baravuga, bat’ Amagufa yacu arūmye, n’ivyizigiro vyacu birabuze, turashize rwose.

12None vuga, ubabarire, ut’ Uku ni k’ Umwami Uhoraho agize, at’ Ehe, nzorangaza imva zanyu, mbadūze muve mu mva zanyu, mwa bantu banje; kandi nzobashikana mu gihugu c’i Bgisirayeli.

13Nuko muzomenya yuko jewe nd’ Uhoraho, igihe nzoba ndangaje imva zanyu, nkabadūza mukava muri zo, mwa bantu banje.

14Kandi nzobashiramwo Mpwemu wanje, mube bazima, mbashire mu gihugu canyu bgite, maze muzomenya kw ari jewe Uhoraho nabivuze kandi ndabishikije, ni k’Uhoraho agize.

15Ijambo ry’Uhoraho ryongera kunzako,

16rit’ Ewe mwana w’ umuntu, abīra inkoni, uyandikeko, uti N’iya Yuda n’Abisirayeli bīherereje kuri we: wābīre n’iyindi nkoni, uyandikeko, uti N’iya Yosefu, inkoni ya Efurayimu, n’inzu yose y’Abisirayeli bīherereje kuri we:

17uheze uzungikanyemw’ inkoni imwe, kugira ngo zihinduke imwe mu kuboko kwawe.

18Maz’ abantu b’ubgoko bganyu ni bakubaza, bati Mbega ntiwodusobanurira ivyo uko bigenze?

19uz’ ubabgire, ut’ Uku ni k’ Umwami Uhoraho agize, ati Rāba ngira nābīre inkoni ya Yosefu, iri mu kuboko kwa Efurayimu, n’ imiryango y’Abisirayeli bīherereje kuri we; maze mbungikanye n’ inkoni ya Yuda, mbagire inkoni imwe, ngo babe umwe mu kuboko kwanje.

20Kand’ inkoni wanditseko zize zibe mu kuboko kwawe mu maso yabo.

21Maz’ ubabgire, ut’ Uku ni k’Umwami Uhoraho agize, ati Rāba ngira nkūre Abisirayeli mu mahanga bāgiyemwo, mbakoranirize hamwe mbakūye mu mpande zose, mbashikane mu gihugu cabo bgite;

22mbagire ihanga rimwe mu gihugu, ku misozi y’i Bgisirayeli; kand’ umwami umwe ni we azoba umwami wabo bose. Ntibazokwongera kuba amahanga abiri ukundi, canke ngo bagabanywemw’ ubgami bubiri ukundi.

23Ntibazokwongera kwihumanisha ibigirwamana ukundi, cank’ ibizira vyabo, cank’ ibicumuro vyabo vyose; ariko nzobarokora mbakūre ahantu bibera bākoreye ivyaha, mbatunganye: uko ni ko bazoba abantu banje, nanje mbe Imana yabo.

24Kand’ umusavyi wanje Dawidi azoba umwami wabo, bose bazogira umwungere umwe; kandi bazogendera mu vyagezwe vyanje, bitondere amabgirizwa yanje, bayashitse.

25Bazoba mu gihugu nahaye umusavyi wanje Yakobo, aho ba sekuruza bāba: ni ho bazoba, bo n’abana babo n’abuzukuru babo, ibihe bidashira. Kandi Dawidi umusavyi wanje azoba umwami wabo gushitsa ibihe bidashira.

26Kand’ ikigeretseko, nzosezerana na bo isezerano ry’amahoro, ribabere isezerano ritazoshira. Nzohabegurira ndabagwize, kand’ ahēra hanje nzohashinga hagati yabo gushitsa ibihe bidashira.

27Ihema ryanje na ryo rizoba kumwe na bo; nanje nzoba Imana yabo, na bo bazoba abantu banje.

28Maz’ amahanga azomenya yukw ari jewe Uhoraho nēza Abisirayeli, igihe ahēra hanje hazoba hagati muri bo gushitsa ibihe bitazoshira.

← Chapter 36 Jump to: Chapter 38 →