Ezekiel 1

Ilonggo (Ang Biblia (1982))

Jump to: Chapter 2 →

1Sa ikakatloan nga tuig, sa ikap-at nga bulan, sa ikalima nga adlaw sang bulan, sang yara ako sa tunga sang mga bihag sa ubay sang suba nga Kebar, ang mga langit nabuksan, kag nakakita ako sing mga palanan-awon sang Dios.

2Sa ikalima nga adlaw sang bulan (nga amo ang ikalima nga tuig sang pagbihag kay Hari Joaquin),

3ang polong sang Ginoo nag-abut sing tuhoy kay Ezequiel nga sacerdote, ang anak ni Buzi, sa duta sang mga Caldeanhon sa ubay sang suba nga Kebar; kag ang kamut sang Ginoo didto sa iya.

4Sang nagtolok ako, yari karon, ang hangin nga mamadlus nag-abut gikan sa aminhan, ang daku nga gal-um, nga may kalayo nga nagaibwal sing dalayon, kag may kasiga sa palibut sini, kag gikan sa tunga sini may daw nagabaga nga metal, gikan sa tunga sang kalayo.

5Kag gikan sa tunga sini naggowa ang kaangay sang apat ka sapat nga buhi. Kag amo ini ang ila dagway: kaangay sila sa tawo,

6apang ang tagsatagsa sa ila may apat ka nawung, kag ang tagsatagsa sa ila may apat ka pakpak.

7Ang ila mga tiil matadlong nga mga tiil, kag ang dapadapa sang ila mga tiil kaangay sang dapadapa sang tiil sang tinday nga baka; kag nag-idlap sila kaangay sang napahining nga saway.

8Sila may mga kamut sang tawo sa idalum sang ila mga pakpak sa ila apat ka mga kilid. Kag sila nga apat may ila sila nga mga nawung kag ang ila mga pakpak subong sini:

9ang ila mga pakpak nag-alangut; wala nagaliso kon maglakat sila, ang tagsatagsa naglakat sing tadlong paatubang.

10Nahanungud sa kaangay sang ila mga nawung, may nawung sila sang tawo, sila nga apat may nawung sang leon sa too nga kilid, sila nga apat may nawung sang baka sa wala nga kilid, kag sila nga apat may nawung man sang aguila.

11Ang ila mga nawung kag ang ila mga pakpak nagbulag sa ibabaw; ang duha ka pakpak sang tagsatagsa nag-angutay, kag ang duha nagtabon sang ila mga lawas.

12Kag sila naglakat ang tagsatagsa sing tadlong paatubang; kon diin ang espiritu magkadto, naglakat sila, nga wala nagaliso kon maglakat sila.

13Nahanungud sang kaangay sang mga sapat nga buhi, ang ila dagway kaangay sang nagadabdab nga mga baga sang kalayo, kaangay sang dagway sang mga sulo nga nagpaibabaw kag nagpaidalum sa tunga sang mga sapat nga buhi; kag ang kalayo masiga, kag gikan sa kalayo naggowa ang kilat.

14Kag ang mga sapat nga buhi nagdalagan kag nagbalik subong sang dagway sang idlap sang kilat.

15Karon sang nagtolok ako sa mga sapat nga buhi, nakita ko ang isa ka aliling sa duta sa luyo sang mga sapat nga buhi, ang isa tungud sa tagsa sang ila apat ka nawung.

16Ang dagway sang mga aliling kag ang pagbuhat sa ila: ang ila dagway kaangay sa berilo; kag sila nga apat alangay, ang pagbuhat sa ila daw subong sa aliling sa sulud sang aliling.

17Kon maglakat sila, naglakat sila sa ila apat ka kilid nga wala nagaliso kon maglakat sila.

18Ang ila mga yanta mataas kag makahalanguyus; kag sila nga apat ang ila mga yanta hil-ob sang mga mata palibut.

19Kag kon ang mga sapat nga buhi maglakat, ang mga aliling naglakat sa luyo nila; kag kon ang mga sapat nga buhi mabayaw sa duta, ang mga aliling nabayaw.

20Sa bisan diin makadto ang espiritu, nagkadto sila, kag ang mga aliling nabayaw sa luyo nila; kay ang espiritu sang mga sapat nga buhi yara sa mga aliling.

21Kon yadto sila maglakat, ini sila naglakat; kag kon yadto sila magdolog, ini sila nagdolog; kag kon yadto sila mabayaw gikan sa duta, ang mga aliling nabayaw sa luyo nila; kay ang espiritu sang mga sapat nga buhi yara sa mga aliling.

22Sa ibabaw sang mga olo sang mga sapat nga buhi may kaangay sang kahawaan, kaangay sa katya nga makakulugmat tolokon, nga nahumlad sa ibabaw sang ila mga olo.

23Kag sa idalum sang kahawaan ang ila mga pakpak matadlong, ang isa nayon sa isa; ang tagsatagsa may duha nga nagtabon sining kilid kag ang tagsatagsa may duha nga nagtabon sa sining kilid sang ila mga lawas.

24Kag sang naglakat sila, nabatian ko ang kagahud sang ila mga pakpak kaangay sang kagahud sang dakung mga tubig, kaangay sang tingug sang Makaako, ang kagahud sang kagubut kaangay sang kagahud sang kasoldadosan; kon magdolog sila, ginapahuyhuy nila ang ila mga pakpak.

25Kag may tingug sa ibabaw sang kahawaan nga yara sa ibabaw sang ila mga olo; kon magdolog sila, ginapahuyhuy nila ang ila mga pakpak.

26Kag sa ibabaw sang kahawaan sa ibabaw sang ila mga olo may yara nga kaangay sang trono, subong sang dagway sang batong zafiro; kag sa kaangay sang trono may kaangay sang dagway sang tawo sa ibabaw sini.

27Kag nakita ko ang daw nagabaga nga metal kaangay sang dagway sang kalayo sa sulud sini palibut, kutub sa dagway sang iya mga hawak paibabaw; kag kutub sa dagway sang iya mga hawak paidalum nakita ko ang daw dagway sang kalayo, kag may kasiga sa palibut niya.

28Subong sang dagway sang balangaw nga yara sa gal-um sa adlaw sang ulan, amo ini ang dagway sang kasiga sa palibut. Amo ini ang dagway sang kaangay sang himaya sang Ginoo. Kag sang nakita ko ini, naghapa ako, kag nabatian ko ang tingug sang isa nga nagpamolong.

Jump to: Chapter 2 →